Thursday, January 10, 2019

前人種樹,後人乘涼 (三)




話說二當家同大當家講左大計後, 大家有左共識 (至少佢知我唔係借錢黎賭), 之後就同近親傾呢個計畫。

一如所料, 近親當然唔太願意, 之後就同我地無端端做乜借錢, 又話一但失業又點點點點, 又話留左筆錢幫我地兩公婆上會等等。二當家有求於人, 當然照單全收, 反正結果一早預左。上一代人既思想都係最好唔好借人錢, 我好明白, 因為我父母都係咁, 要同佢地講今時唔同往日, 我諗講半日都未講得明, 反正對二當家黎講, 呢個係一個機會, 而唔係必須。

過左幾個星期, 近親又同大當家講, 話佢地已經開始睇樓啦, 因為租約就快完, 佢地唔想再租多年, 所以呢期密密出動。

講返呢個近親, 其實佢地本身住緊村屋頂樓, 間屋風水又好, 前面仲有風水樹, 個 VIEW 好正, 又有天台燒野食, 種下野咁, 我同大當家都好鐘意。但因為年紀漸大, 唔想行幾層樓梯, 所以上年果陣無同我地商量就賣左間屋, 激到大當家扎扎跳。不過始終係人地既財物, 我地係無 SAY既, 如果佢地一早同我地講, 可能我地會接手左間屋, 大家各取所需。

今次佢地再買樓, 好有可能住一世,  大當家亦再三叮囑要同佢商量左先, 近親亦好坦白咁同大當家講, 手上只有 430萬, 仲有係大陸有塊地等收, 預計有150萬~200萬。二當家第一個想法係, 430萬宜家可以買D乜.........? 😱    一於所料, 佢地宜家睇既單位, 無論地點, 環境都好, 都不及以前所住個單位, 所以換言而知, 佢地今次完全係「落錯車」😓。

「落錯車」係過往十年好普遍, 但問題係近親係退休人士, 已經無能力再上會, 租左一年發覺D 樓只有越黎越貴, 手上既錢越黎越少, 既然不能再等, 只有焗住買次一線既單位。

當二當家收到呢個消息, 隨即寫低左幾個重點同大當家傾

1. 借層樓黎套現係小事, 可套可不套, 對佢地買樓係無任何影響既
2. 大當家/二當家, 有機會移居台灣幾年, 佢地買樓前要考慮呢點
3. 大陸收樓係有不確定性,  幾時收, 收幾多錢, 呢D 都係風險, 唔好成日預左有呢筆錢
4. 買樓要睇買唔買得起, 因為佢地無能力做按揭, 唔好成日當大陸塊地一定會收就買貴野

下回分解..............






6 comments:

  1. 這個大浪「落錯車」的確是回頭太難。因為樓價、按揭成數及壓力測試都是在不斷踢走潛在買家。同時地,上漲的租金卻有如追兵在後面追趕。而且年紀大的租客,亦非業主杯茶。二當家近親想重新上車亦是理所當言。不過,二當家可能要跟近親說明持有足夠現金的重要性,免得買了樓後,手上現金用得七七八八。退休生活總得要有錢在手,自住單位不可能當飯食的...

    ReplyDelete
    Replies
    1. 三兄, 我覺得「落錯車」都唔怕, 但係退休年紀至落車風險真係好大。
      係過住十年落車既人, 不外乎1.自覺聰明(二當家是其一), 2. 誘惑太大。
      一係覺得睇通左個市, 每次一講樓市就拋出一句「下年應該會跌」, 誰不知樓市食左偉哥咁, 金鎗不倒。
      一係升左>一倍, 太吸引, 覺我自己摸到個頂, 賺左個差價先。

      可幸的二當家仍正值壯年, 叫做仲有得揀。所以特此寫下提醒自己, 引以為戒。

      Delete
  2. 在這種"乱世"中換樓要高難度動作, 需要高財商才能順利完成換樓。現在唯一可以做的是看準機會再上車。

    ReplyDelete
    Replies
    1. 其實無按揭能力咁落車, 係任何時候都非常危險。至於要「等機會」, 對退休人士來說時間至係最大敵人。

      Delete
  3. 攞住430想FP,又真係慘過返大灣區...

    「橫掂都要借,拿拿臨整間六百樓下HKMC啦...」下刪一千字。

    (430-140=290)

    ...我真係恭喜你啊 XDDD...

    ReplyDelete
    Replies
    1. 退休人士無收入, 銀行都唔會理你啦。

      Delete