Monday, February 24, 2020

別人恐懼時我貪婪?



「別人恐懼時我貪婪」, 呢句名言, 街邊阿伯都識講, 但做得到既有幾多人?

以前買股票, 要買PE 低, 之後又學到要買平價股 PB<1, 但到近年, 近幾年無增長「前景」既股票就無升幅, 再近幾個月, 內房物管齊齊飛升, 「別人恐懼時我貪婪」, 還可行嗎?


今日個市2萬7上落, 說恐懼又未到, 其中一個原因係香港股市已經不單單代表香港, 更大部份係代表住中國經濟。不得不佩服一眾企業家的手腕, 不論是魔童的炒高配股, 還是九倉/會德豐/九置昨天停牌傳聞私有化, 都可以話係絕境求生!

作為老散, 我最鐘意鍾記既估值方法, 因為數字永遠都係冷冰冰, 無人既感情係入面。如果你唔同意入面既 assumption, 改改數字又可以出另外一個合理價。例如鍾兄新文, 為金沙做了估值, 用沒有增長黎做估值, 二當家唔同意, 我用2020年 EBITDA 跌了15%做估值, 得出既結論又完全唔到, 我覺得合理價應該係 35.6, 現價仲高過合理價, 所以我走左貨。

無話邊個O岩邊個唔O岩, 估值就係靠估, 問題是我我會否睇得太悲觀?

股壇老兵鍾記 長勝之道 - 金沙中國估值更新(五)


呢期不斷反思自己既投資策略, time the market 真係唔易, 基本上都係有批長倉坐貨, 繼續將新既資本累積作為待熊基金, 邊打邊走, 在錯誤中及失敗中希望找到適合自己既方法。


紀錄:

DJI 27,960.80 −1,031.61 (3.56%)
Gold Price 1,656.60 USD
Hang Seng Index 26,778.66 −42.22 (0.16%)
(25 Feb, 11:31 am HKT)

Wednesday, February 19, 2020

美國工廠 American factory



Oscar 出爐, <寄生上流> 破晒紀錄咁拎左 Best Picture, 但在二當家心目中, 近幾年睇過既最鐘意既電影係<下女的誘罪> <The Handmaiden>, 我會俾 10分!!!!

不過拎獎既野睇天時地理人和, 加上 Oscar 既一貫作風係有少少政治行先, 講黑人白人既Topic得獎機會通常大 d, 所以唔駛咁認真, 當作一場 show 睇下就可以, 最緊要係自己鐘意套戲。

另外今年最曯目既當然係只得 18歲, 剛剛拎左 Grammys Album of the Year 既 Billie Eilish 在Oscar 上唱了Beatles 的 Yesterday 以及久違了17年 - Eminem 在 Oscar 上表演其當年得獎歌曲 Lose Yourself. 當中 Billie Eilish 在 Grammys 中表現的 When the Party's Over 真係非常之咁正, 不過網上面只搵到低清版 (原 VIDEO 在youtube有地區限制)。



講番正題, Oscar 今年最佳紀錄片係一套叫 American Factory 既電影, Netflix 出品。故事好簡單, 係美國一個小鎮, GM 既一間工廠關門造成大量失業, 對小鎮既人既打擊好大, 因為好多工作既人都係藍領, 又無特別技能。然後有一日, 有間中國公司 (福耀玻璃) 決定係同一個地方開設玻璃工廠, 小鎮既人當然對新工作充滿憧憬, 但慢慢發現兩地既文化差異及價值觀有所不同, 有人選擇站出來發聲, 有人選擇為份工默默地忍受不公平待遇。

當中有幾個題目有比較大的爭議
  • 工人希望成立工會, 而資方堅決反對
  • 資方希望提供生產效率, 並要求強制加班
  • 勞方希望提升工業安全, 減少因工受傷
  • 勞方希望可以提高薪酬待遇

其實好多香港人都要北上睇廠管廠既經驗, 對於中國式工廠管理根本不陌生。就以二當家為例, 想當年都有幾份工要不停上廠, 有D 仲要一星期上去住 2~3 日, 公司希望用香港人管廠但係又唔駛俾中國稅。係中國, 工人其實無乜權利, 大部份公司都包食包住, 宿舍通常就係工廠隔離, 起身就番工, 收工就番宿舍, 最多出去食個飯, 但大部份人為慳錢, 都會選擇食公司。離鄉背井(外省工人)係大陸非常普遍, 以前 D人一年一定會回鄉一次, 但越來越多年輕既一輩連春節都唔回鄉。

在工廠, 強制要求加班係非常普遍既一件事, 因為你既朋友, 甚至戀人都係同一間公司到做, 反正放假都係百無聊賴, 不如開工搵多個錢。如果你唔加班, 有可能得罪領班而無左份工, 得不償失。 當然, 每間工廠都唔同, 領班通常要一定人數出席便可, 所以都未必真要要求「強制」加班, 但大部份人都希望同領班保持良好關係, 這些潛規則「你懂的」。

至於安全問題, 只可以講中國既一線城市改善左好多, 尤其係環境保護呢方面, 一線城市既條例比起香港更嚴。但係好多工廠都係2/3 線, 我唔可以話好差, 但都唔會好好囉, 有好多野都係隻眼開隻眼閉, 又或者好多問題都係用錢可以解決得到。而且在中國, 好多工人既安全意識比較低, 反觀美國果邊既工人條命就矜貴好多, 而且比較夠膽發達自己意見, 片中其中一條片係講個美國工人投訴其中一個工作空間只有一道出入口, 當火災時沒法逃生, 我諗係中國會提出呢類問題既人真係少之又少。再者, 在片中福耀請番黎既安全主任感覺上真係為員工著想, 從員工角度出發, 但其實好多中國(甚至香港)既安全主任, 只係為幫公司 pass audit, 因為大家都明白到最後出糧俾佢果個至係老闆。

片中亦提及薪酬問題, 片中工人在 GM 年代的薪金是每小時30美金, 但在福耀, 片尾最後的薪金是 每小時14美金, 只得當年的一半。工人們都有點唏噓, 覺得薪水太低, 但有收入總比失業好。但片中並未有太多的薪酬比較 (e.g. 市價, 最低工資等), 所以好難再入深入深討。


睇完成套戲, 其實無話邊個O岩定唔O岩, 好睇你企係資方角度定係勞方角度。從資方角度(例如股東), 當然希望人工有咁平得咁平, 工時有咁長得咁長, 最緊要係搵到錢, 其他既野都係 Nice to have。但從勞方角度去睇, 每個工人都有屋企有, 當然希望留個時間陪伴家人, 唔好受傷。有人覺得工會制度係拖垮左美國經濟, 因為係美國設廠咁Q麻煩, 好多公司都寧願去發展中國家或第三世界到設廠, D 人又平又聽話。又有人話中國經濟起飛就係由一大批極為廉價的勞動力作為支撐, 但廉價的勞動力並不能長久維持下去, 而今日中國經濟都開始轉型, 相信工人待遇會慢慢提升, 雖然好有可能真係非常之慢............

總括黎講套電影都係值得睇既, 雖然唔算好好睇, 但至少大當家無睇到訓著, 亦看到兩地不同既文化差異 (當中請美國員工去中國參加尾牙, 及曹總既毛澤東式畫象真係睇到有少少不忍入目), 令到觀眾有一定程度既反思。

二當家俾 👍👍👍👍👍👍 / 10





Monday, February 17, 2020

肺炎的日與夜

2/20 - 每個販賣點的成人口罩數量加倍

希望每日睇「口罩地圖」撲口罩既時間快D過去



  • 公司要求因個人理由出國的員工 (不管任何地方), 回台後自我隔離14天, 沒薪假, 有誰會申報?
  • 公司要求員工上班必須配帶口罩, 但公司沒有提供口罩, 罩從何來?
  • 台灣政府配給口罩, 每人一星期2個 (如果你排到的話), 那其他日子呢?
  • 公司準備在疫情嚴重時, 強迫員工分兩班避免交叉感染, 每班工作一星期, 但不能work from home 的同事要請沒薪假? 半個月的薪水就這樣沒了?
  • 台灣政府建議的14天防疫假, 沒有強調是 paid leave 還是 Unpaid leave, 到最後基本上是沒人敢請假。
  • 除了市民撲口罩外, 更多的是企業幫前線員工撲口罩


Thursday, February 13, 2020

投資的二三事


個 BLOG 越黎越偏向講下廢話, 投資反而無乜好 UPDATE, 為免偏離得太緊要, 點都要講兩句。

個市宜家仲係27000之上, 新年後既急跌已經升番晒, 二當家看後市是比較悲觀, 香港未來一年真係無運行。二當家做左少少換倉動作, 首先內銀, 金沙都走左, 入齊左 ATM (阿里, 騰訊, 美團), 買左恆基, 預左佛系地坐, 加左少少內房。未來香港經濟都唔會好得去邊, 身邊開始越來越多人被「雞」, 一開始大家都可能無乜感覺, 反而食下肥雞仲開心, 但當4~5個月都搵唔到工果陣, 人就會開始怯, 當失業潮開始, 到時再睇下邊個底子夠硬 。

大陸疫情嚴重, 內需都太大折扣, 全世界都預左阿爺會放水, 銀行究竟係會受惠, 定係受制呢? 至於金沙, 雖然話就話關門15天, 但我覺得至少會影響整個季度收入, 賭場人去樓空, 一日疫情未受控制, 無人知道影響有幾嚴重, 但個怪市仲跌唔落, 認真古怪!




Thursday, February 6, 2020

遠離垃圾人


網絡偷圖, 在台灣還有人拿垃圾人做插畫 😂https://www.facebook.com/trashxxman/



話說二當家在台灣時, 每月都有自己的朋友或大當家的朋友過來, 有時候會碰過面食過飯, 相熟的甚至會在我們家過夜。大部份的朋友過來總是忍不了談兩句過去半年的社運事件及近來的肺炎口罩事件。 基本上二當家奉行的信念是少談, 少動氣, 因為大家一係圍爐取暖, 一係劍拔弩張, 無論那一方面, 我都覺得獲益不多, 真係可以有論點, 有觀點有見解及有獲益既交談是少之又少。

當中二當家最怕就是碰到「垃圾人」, 如果在網上面找「垃圾人」三隻字, 第一個出來的結果便是 MBA智庫百科, 以下為垃圾人定律的解釋。

//垃圾人定律,來自於某明星對於網路媒體人的回應,形容本身存在很多負面垃圾纏身,需要找個地方傾倒垃圾的人。世界上存在很多負面垃圾纏身的人,他們需要找個地方傾倒,有時候被人剛好碰上了,垃圾就往人身上丟。 許多人就像垃圾人。他們到處跑來跑去,身上充滿了負面垃圾:充滿了沮喪、憤怒、忌妒、算計、仇恨,充滿了傲慢與偏見、貪心不滿足、抱怨、比較,充滿了見不得人好、愚昧、無知、煩惱、報複、和充滿了失望。隨著心中的垃圾堆積又堆積,他們終需找個地方傾倒;有時候,我們剛好碰上了,垃圾就往我們身上丟....//

簡單來說就是充滿負能量的人, 並且將自己負能量向外傾倒。二當家曾經都是一個「垃圾人」, 深知這種充滿負面想法的人的恐怖, 這個也是其中一個二當家要離開香港的原因。因為覺得整個香港彌漫住一股負能量, 而我們的 social media 更加令負能量傳播得更快更強, 要改變自己便要逃離這個環境。

說一下自身經歷, 近來有個朋友 A 過來台灣散心,朋友A因為藍黃之見同屋企人關係唔好, 我們當然好言相勸, 希望唔好因為政治事件同家人關係疏離。但在朋友A短短三天的旅程中, 朋友A基本上手機不離手, 不停的翻看香港新聞及FB ,看到一些他覺得不合理的事 (例如777的訪問) 便向我們分享她的負能量。二當家跟大當家其實十分無奈, 他回家第一件事便是把手機充電,之後就不停看手機, 不懂欣賞生活之美, 亦不珍惜與朋友相聚之時刻。他放出來的新聞, 我們也早以收到/看到, 只是我們覺得不需要把這種負能量向外傳送。

這只是其中一個例子, 生活上非常容易找到垃圾人的足跡

  • 在馬路上不停響號的人
  • 每次見面也說不滿自己的公司/工作, 但又從來不願往外投CV
  • 不停的發出/轉寄一些情緒化的信息, 每一個留言都是帶著怨恨寫成的
  • 只懂羨慕他人的成功, 卻從不肯改變自己, 縱使別人已經幫你安排好, 最後還是因為各種原因放棄進步


最後, 在網上看到一位朋友把垃圾人與小人做出區別, 二當家覺得非常不錯,  節錄如下



垃圾人 我覺得是一些情緒失控的失敗的人

小人 則是比較取巧奸詐 爭功諉過 人格低劣的人
因此 相較之下
垃圾人可憐可鄙 小人可惡可恥 

面對垃圾人 我們要閃避
面對小人 我們則要提防
垃圾人 通常是隨機臨時發作
小人 則是處心積慮 無所不用其極 

垃圾人發作時 是垃圾
平常可能還可以當朋友
小人 則是 時時像朋友
刻刻都是恐怕的殺手 

垃圾人的問題是情緒管理的問題
小人則是人格的問題
雖然有些垃圾人也可能同時是小人
有些小人也挺垃圾的
不過 能夠加以分辨
還是有利於我們避免去踩到狗屎