日元折倉 - black monday - 話說上星期一, 8/5, 日經突然急跌超過 10%, 而且各大市場都有下跌既績像, 二當家當日要番工, 後知後覺, 睇番至知原本咁大件事。市場當然跳出黎解釋, 最多人講既係日元拆倉, 日本加息, 美國失業率升至4.3%, 薩姆規則, 經濟衰退等等等等等。其實所有野都有可能, 但係所有野都關乎程式交易事, 否則好難一下子崩盤。事隔2星期, 各大市場都已經收復部份失地, 如果緊貼市場, 可能大家都會係上星期 TRADE 下野, 而二當家只係當新聞, 看看便好。
新樓 - 高回佣 - 之前已經講緊, 呢D咁既不透明手段完全令到一眾買家「資訊不對稱」, 一個通晒天既消息, 港府竟然隻眼開隻眼閉。就算我係買家, 去田土廳到睇成交價, 都唔知個價係實價定面價, 咁同澳門賭底面有乜分別? 用呢招黎谷個樓價, 之後「乙水」班水魚入局, 到最後遭殃既可能係買家, 可能係銀行, 可能係下手接貨果個, 但賣出既發展商同經紀就已經袋袋平安。
新樓 - 不可抗力 - 最後傳到錦上路既樓盤「柏瓏」又用不可抗力既因素去延遲關鍵日期145天。唔知真定假, 但就二當家所知, 之前已經有樓盤用同樣既原因延遲交樓。其實遲都唔係最重要, 而係咁 last min 至出 notice, 是否應該交代一下所謂既「不可抗力因素」係咩呢? 市場隨即傳話發展商希望年底減息會令到市場氣氛轉好, 令到一眾買家唔駛抬錢上會 (或者抬少D), 其實呢鋪都係賭大細, 用差唔多 2 萬蚊尺既價錢去買錦上路, 最後會撻訂定係抬錢, 點都好, 真係祝你好運。
上唔到會, 誰負責? - 承上, 又有新盤業主話上會估唔足價, 又或者按揭唔批等等等等。其實政府係呢件事上面有冇責任。從商業角度黎講, 其實無, 一買一賣都係個人決定, 除非牽涉到形事。至於會否變為社會問題, 又或者帶來社會穩定問題, 呢個就好難答, 二當家覺得要解決左個隱藏回佣問題先, 否則所有野只係空談。例如1000萬樓, 回三成佣, 實際層樓只值700萬。今日樓價回落, 可能層樓只係值800萬, 但舊回佣點計, 買家會唔會走出黎誠實報告先? 定係諗住昆左銀行錢先, 宜家賺得無咁多, 就係到嘈, 一眾市民根本唔知個 DEAL 係乜, 就算上唔足會, 又與人何尤?
新政策 - 有按保都可以借 - 又一件多舊魚既政策, 放款左數次按保後, 宜家又話有按保既, 只要符合特定條件(有新成員, 失業, 同特定原因) , 可以申請黎放租。 有新成員點解可以代表層樓可以用黎放租, 個 rational 係咩? 失業, 都唔係第一日既問題, 今年至有失業咩? 最後特定原因, well, 模糊到一個點。首先二當家唔知有幾多人會申請, 但係個感覺就好似話緊俾大家聽, 黎緊就快會有大失業, 不過就算你供緊樓都唔駛怕, 因為可以用黎放租, 就算唔係完全頂到每月供款, 至少都頂到下, 至於你住邊, 就自行搞掂啦, 最緊要唔好 panic sell。
銀行收遮 - 各大老闆都走出黎話要銀行借錢, 話銀行落雨收遮無陰工, 又話要加強審批按揭速度等。又有老闆走出黎話金管局唔應該單單叫銀行管理風險, 仲要鼓勵銀行多放貸, 否則分分鐘被攻擊為「惡勢力」。其實上年金管局已經放款左按揭, 銀行要借多左, 又取消晒辣招, 求仁得仁, 仲想點。最搞笑班友唔係無得賺, 只係賺少左已經咁惡, 又唔見佢地小班發展商唔投地, 唔加快起樓, 要知道做生意, 最應該貨如輪轉, 不斷係到玩擠牙膏, 不如減多3, 5, 7 成咪次次一Q清囉。
打風股市照開 - 阿超哥真係勁, 勁過李氏力場, 以前就話打風都要番工, 因為要工照番, 市照炒。宜家打風都無有怕, 因為市都可以照炒。雖然唔知呢樣野會點樣吸引到國際投資者, 但係一眾服務港交所既打工仔打風前真係可能要7/24 STAND BY。 但我最唔明一樣野, 點解為人垢病既一手買賣仲未改到, 如果可以改到一股一股買, 咪更加可以加強港股流動性同吸引力。
