Thursday, December 16, 2021

2021 - 自我回顧 (上)

首先恭喜風兄出新書, 祝一紙風行!!!

疫情

疫情咁快又一年, 上年回港居家隔離14日, 但今年再番香港的話要酒店隔離21天 (已經唔知14定21), 二當家實在頂唔到酒店隔14/21日, 再加上有公事, 所以今年無打算再番香港。疫情真係好折磨人, 相信大家已經慣左出街載口罩,  但無得飛呢下我想好多香港人都快被困瘋。年尾又整隻 Omicon,  所有野又好似從新黎過咁, 部份地方又開始旅行禁令, 打加強針, 沒完沒了, 雖然一開始就知道今次呢隻病毒既厲害之處, 但沒想到呢場科技對病毒既戰爭可以打咁耐。


經濟

「通賬來了」 -  應該係近呢幾個月最熱會既話題, 供應鏈失衡, 人工又貴, 反全球化又開始, 資金又多, X咁多個原因, 昨晚 FED 又出左聲, 減買債加息 (聽住先), 我覺得其中一個中國同老美最唔同既地方, 老美將股市表現同政治表現劃上等號, 而中國既羽白大大就打死晒中慨股, 不論內房, 高科技股, 教育等等都無人幸免, 再加上老美既制裁清單, 尋日D生物科技, 藥物股都死埋。

香港 - 货币供应量M2 | 1969-2021 数据 | 2022-2023 预测 (tradingeconomics.com)

但睇 HKMA 既M2, 到十月為止都好正路, 無大增, 亦無大跌, 咁宜家開緊邊瓣, 真係估唔到。另一方面, 內房債正式違約, 外債死先, 定內債死先, 其他中企要再集資又會點, 無數個問號。當然, 成熟既投資者可以從認購率, YTM 等大慨知道資金既想法, 但二當家覺得, 天下無樂土, 美市 overpriced, 港股就政治因素, Hold cash 就等被通脹蠶食, 誰是韭菜? 定還是我們都是韭菜?


政治


Joe Biden 上台果陣, 個個都話佢係 China Joe, 係親中派, 但兩國關係又好似無咁好。 那邊廂要抵制中國冬奧, 但法國/意大利又唔跟隊, 五眼有五眼玩, 歐洲又出另一套套路。德國 Merkel 終於落台, 未來德國既政治路向又會否改變呢?


工作

在台灣的工作邁向第三年, 一切都順利。在5月~8月, 台灣的疫情突然爆發, 由於當時的疫苗接種率低, 殺到各行各業一個措手不及。公司隨即啟動緊急方案應對, 由於已經有了2020各國疫情的經驗, 公司內部尚算順利, 而二當家都係呢段時間第一次 WFH。二當家對在家工作的態度係半正面半負面, 正面當然係無野做果陣所以做下自己野, 打下機, 睇下電視。負面就係每日都差唔多, 同大當家朝見口晚見面, 困係屋企到悶到發癲。 到8月中大家都 back to normal, 突然又喜愛番上班😄。

年底時收到老闆個 call, 話可能有個位, 對我黎講係 good move, 二當家自認「豬頭骨」命, 別人唔要既野我就係執, 台灣呢個 position 係咁, next move 都可能係咁。但一切都未定落黎, 如果成真, career 真係行快3~7年, 正式去到唔駛再向上博既地步 (因為我對權力不戀棧), 雖然宜家係咁講, 但二當家其實都真係一個好怕悶既野, 到時個心態又可能再變。

 

小生意

二當家個小Project已經被打靶, 因為個客已經搵到個 solution 而且仲平一大截, 二當家就算做都係執雞碎咁多, 無謂玩落去。但二當家無放棄 2nd career 既想法,但呢一刻真係無 idea, 唯有先 focus 做打工仔。

反而大當家好積極做佢單小網店, 可能佢都悶得太耐。 一做生意, 仲有係 one man band, 果種辛苦二當家當然明, 所以家裡既事二當家都幫得就幫。生意額就.....唔好提, 始終 startup 最難挨就係初出道果陣, 大當家既然佢有團火, 二當家都會支持佢。如果番香港會點? 到時再算啦。


健康/人生大事

身體上無大問題, 行得走得, 人生就快走到四張, 事業上已經差不多達到自己目標, 現在尋找緊下個目標。 如果用擁有自住樓+穩定現金流當作財自既標準, 咁 FIRE 對我黎講仲差十萬八年里, 在未來十年二當家能否達標呢? 


興趣

上年說要學鋼琴, 但最後放棄了。但我重新去學習一種曾經玩過既學器, 尋回玩音樂的樂趣。

先說說為什麼放棄, 其實二當家係個乜都想學既野, 但係「周身刀冇張利」, 不如深造番自己本身有玩開既樂器。除左音樂, 今年仲做左好多新既嘗試, 學左潛水, 又學品酒, 算係非常充實既一年。


樓&錢

這方面有點隨遇而安, 但應該不會買台灣樓, 原因好簡單, 台北買唔起, 新北亦唔平, 再遠D 唔熟。又再者, 拎唔到台灣身份證, 未來有機會番香港, 各種因素都令我無買樓既意慾。

至於香港樓, 真係番香港至算, 無香港收入, 想買都做唔到 mortgage。至於錢, 增長緩慢, 港股食左屎,  手上既阿里累跌4成, 仲未計小量內房。另外之前都有提到, 香港既家人想換樓, 要預備定還番份按揭, 暫時都仲可以拖幾個月, 但如果真係要變現, D 股就要賤價而沽。 



Monday, December 13, 2021

雜談 - 妒忌心與自卑感


廢文

二當家近期情緒又有起伏原因係乜我自己都唔知可能係 Home sick, 可能係未來有機會轉變既 uncertainty 刺激到自己亦可能係自己既妒忌心發作, 自己同自己既內心交戰。

 

細細個阿媽就教「人比人比死人」。但要做到呢樣野講時容易做事難尤其 social media 將人同人既距離拉近。二當家以前係大西北人好多同學都係公屋仔居屋仔住私苑果D已經叫有錢人。細個果陣未被世界同化唔會覺得品牌係咩去到某個位個個都著 nike 波鞋, Boy London 手錶至知原來物質會拉遠人既距離。

 

二當家屋企唔係有錢中三四已經出黎做 part time, 麥記百佳馬會跟車補習 通通到做過時薪由 HK$20 > HK$45 > HK$100 好記得自己做麥記果陣時薪都唔夠食個餐果下係我第一次意識到自己真係好窮既事實。

 

到大個少少有次要頂人地更去到銅鑼灣幫人補習, 見到個個「小朋友」都已經名牌上身人地打 hockey, rugby, 我仲停留梗係街邊猜枱(乒乓球)果個時間。去到大學就梗加唔緊講二當家邊讀邊打工邊搵生活費屋企都幫唔到咁多身邊既朋友有真係可以好有錢亦有D係一般般既但講到窮應該都係以我為首。

 

Social Class 呢樣野好奇妙大家都窮果陣係無野一大班人只有一兩個有錢而其他人窮都無野但當個個有錢得你窮呢下就好慘。唔知大家有冇睇「寄生上流」果種心境真係O係底下階層打滾過既人至會明。例如D人話我屋企都唔係好有錢但可能中學就已經過左外國讀書。而去「外國讀書」呢個 option 從來都無出現過係我本字典到。

 

到出黎做野發現個個都係家山有福屋企有層樓留左俾佢地結婚又或者幫手出左首期。二當家當然知道社會上仲有好多底下階層但二當家一直往上爬去到另一個 social class, 就會發覺原來自己係幾咁井底。又或者大家可以睇下Netflix 一套叫 Bling Empire, 果種有錢同洗錢既方法大家都覺得係荒謬聞所未聞。而二當家每上一個 social class 其實就會有類似既衝擊。

 

好多人都講 FIRE, 目的都係為左每個月唔駛做有幾皮野生活費但當你FIRE果陣, 又發現有班人由畢業到宜家都唔駛點奮鬥, 又或者可能有無限資金追夢。呢種自卑感其實係成長過程中老是常出現, 果種 dissatisfaction 就係來自於自卑, 呢種自卑感可以轉化做動力 (亦即二當家點解想向上爬), 又可以成為壓力。

要靠搵幾多去證明自己既價值係好蠢既方法, 但呢種妒忌心其實又係與生俱來既情感, 就好似兩個小朋友但得到一個玩具, 天生大部份小朋友就唔識分享, 見到人有我無就會發老四, 大部人都係後天修正自己既思想及行為。但就算係成年人, 其實現實中呢種妒忌心還是每天都存在, 例如如果你知你同事搵得多過你, 你都可能會唔滿意, 大家做一樣既工作, 點解佢可以搵多我成倍。

 點樣 Manage 呢種心態亦係人生既課題, 二當家明顯修為未到, 但人就係咁, 不同既情緒一直圍繞著自己, 只能繼續修為。

Wednesday, December 1, 2021

投資日誌 - 2021-12-01

 

  • 通脹 - YOY 6.4%, 30年新高, 通脹究竟是否暫時, 而呢個暫時, 又究竟係指幾年呢?
  • 假設真係不受控既通脹, 聯儲局又會否加息呢? 機率有幾高?
  • 加息既話, 有咩股受惠?
  • 唔知由幾時開始老美就用股市表現黎做政績, 呢樣野真係好錯
  • 洗米華 被捉, 二當家無睇詳細睇新聞, 好似話係非法咁開網上賭場 wo。而網上紅人 Starman 就話係防止資金外流, 賭股應聲下挫。
  • 阿里巴巴繼續向下尋低, 低見 120, 2XX 買果陣覺得好平, 咁宜家呢? 
  • 阿里的第二季業績, 最大問號是 120億的投入? 究竟係乜來? 保護費?
  • 哪邊廂又話 700 同 9988 既支付平台, 個人收款碼將不能用於經營收款, 即係嚴打走稅?
  • TSM 終於郁左兩下, 至令到個倉無咁難睇, 當其他科技股升天之際, 可憐既 TSM 仲係踱步中。
  • 簡而言之, 資金不信「羽白帝」, 泊晒係老美到。老實講, 搞個人祟拜呢套又真係好難信服, 睇下什麼「歷史決議」, 同以前朕比堯舜有乜分別? 唉............
YTD - 0.4%...........今年又得個吉 

Symbol

Description

Gain/Loss

% of Portfolio

TSM

TAIWAN SEMICONDUCTOR-SP ADR

7%

9.4%

9988

ALIBABA GROUP HOLDING LTD

-41%

6.3%

700

TENCENT HOLDINGS LTD

-3%

6.3%

697

SHOUCHENG HOLDINGS LTD

-15%

4.5%

2318

PING AN INSURANCE GROUP CO-H

-6%

3.6%

1883

CITIC TELECOM INTERNATIONAL

3%

3.1%

P40U

STARHILL GLOBAL REIT

20%

3.0%

FFC

FLAHERTY & CRUMRINE PREFERRE

-9%

2.8%

659

NWS HOLDINGS LTD

-1%

2.7%

Sunday, November 21, 2021

敗走台灣 - 大當家問「我可以唔撈嗎?」

 

網上圖片


以下開啟「樹洞」模式😷

前言: 如果有追開二當家個BLOG, 可能知道其實幾年前拎台灣 offer 果陣, package 其實一般般, 再加上大當家來台後二當家無強迫佢打工, 家庭收入其實係減少, 盈餘都係少左。 大當家呢三年都係做自己野, 近來開左間網店, 但規模甚少, 收入...梗加唔好講。但二當家覺得應該試下, 賺過經驗, 做老闆唔係一件咁過癮既事。 


話說「有機會」拎到香港 offer, 我同大當家都 FF 一下, 諗下番香港會點。話無顧慮就假既, 二當家自己好怕香港既壓迫生活環境, 工作壓力, 同自然產生既社交壓力。但正如前文說, 係台灣拎唔到 PR, 番香港收入增加, 仲可以陪下屋企人, 總括黎講都係一件好事黎。係交談中, 大家講到大當家番香港後既生活, 選擇有幾個

  1. 做番打工仔
  2. 做番打工仔 + 兼任網店
  3. 全職搞生意 (網店)
  4. FTW (full time wife)

二當家梗係 prefer 第1第2選項, 而感覺上大當家想選擇3。先講講二當家想法, 如果番香港, 最終都要解決房屋問題 (現實), 大當家身上其實有按揭 (看「前人種樹」系列), 最近家人又話要換樓, 即係我要預舊錢還俾銀行, 大當家宜家係無薪水, 亦即無可能再做到按揭。成舊資產即刻縮一半。

如果要係香港買樓, 基本消費係球半~兩球, 就算供得起, 首期都係一大舊錢。 二當家既如意算盤係用一年時間儲錢, 追番3年既光陰, 如果要咁做, 大當家份收入就好緊要。二當家跟大當家仲係香港果陣, 其實一直奉行財政獨立, 租金等洗費就按收入比例調整, 家用就各自各俾屋企。 來到台灣後, 二當家就要俾份家用大當家, 租金全付, 家用繼續各自搞掂。如果番到香港, 耍用呢個模式, 即二當家份收入, 要包埋香港既租金及大當家既家用, 講真, 搵幾多都唔夠😩。

大當家想繼續搞下生意, 但我心知呢單生意唔係搵到錢既生意。係台灣做生意, 好多人係真心想推廣某樣產品, 搵錢係其次, 交朋友為先, 成本低, 有額外收入可以抵銷成本, 燒錢都唔會燒入肉。係香港做生意, 生存到已經係奇蹟, 搵到錢係後話, 一個唔覺意可以傾家蕩產。二當家身邊都有女中豪傑, 好 tough, 邊打工邊生仔邊讀書邊搞生意, 最後盤生意上左軌道, 最後可以辭左份工。但大當家應該唔係呢個 TYPE。 

二當家好喜歡宅在家, 番到香港, 二當家都想生活品質提升, 希望可以用錢換品質, 亦即空間大D, 地點好D, 裝潢靚D,  食得好D, 等等。公一份婆一份係最理想既方式, 要養埋大當家就即係其他方面要遷就一下。況且我亦都唔想大當家完全依靠二當家, 假設我被裁員, 到時大家真係你眼望我眼。Again, 「貧賤夫妻百事哀」, 如果大當家份生意可以養得起自己, 我真係唔介意, 但二當家又唔係大細劉, 自問未有能力係香港可以養得起一個人。


回到圖最上方, 「靠自己才會幸福, 指望別人會很苦」, 那被別人指望呢? 


呢篇係「樹洞」篇, 意在放下一些自己的想法! No judgment, please! 🙊


Wednesday, November 17, 2021

閒聊: 那些我用過的3C產品

 


辛苦搵來志在駛, 二當家好食, 好玩, 好飲, 好旅行, 亦好買3C產品。女人買包包, 買首飾, 買化妝品, 而男人的浪漫則是車, 音響, 相機, 又名「敗家三寶」。荷包有限的二當家, 都係買番D 平民會用既 3C 產品算。


Bose Quietcomfort Qc 35
呢隻 headset 都買左3~4年, 宜家好少用。本身二當家因為怕熱, 唔鐘意載 headset, 但來台灣前因工作需要成日飛, 最後買左隻 QC35 獎勵自己。二當家雖然係木耳, 但都覺得 Headset 既音效絕對比起 earbud 好, 但 earbud 就勝在方便。QC35除左音質好, 最勁既係 ANC (active noise cancellation) 既技術, 怕嘈既二當家靠佢陪伴左無數既旅程同失眠夜。 有時坐長途機, 當附近有小朋友, 二當家就會非常感恩有呢隻 headset。 另外, 就算唔開 ANC, 都會有一定既隔聲功能, 而且配載上係非常舒服, 唔似 earbud 會有「un」耳既問題。 除左藍牙配對, QC35仲可以有線連接, 但用既係唔太普遍既 2.5MM <> 3.5MM 插頭, 二當家都係用原裝線, 長度一般, 常用於連接 PS4 手制。


Jabra Elite 65t
呢對 Jabra 係早期係 smartone 用績分加錢換, 宜家已經退左役。
老老實實, 其實我覺我音質並唔差, 我都唔覺得同 Sony WF-1000XM3 (下個ITEM) 有好大分別。二當家無用開什麼高質編碼(e.g. Tidal), 基本上都係 Spotify,  聽到樂器, 低音有 dynamic, 唔好爆聲我都已經覺得不錯。IP55 防塵防水, 65T 仲未有 ANC, 但我自己用落, 載左 earbud (原裝耳膠) 後都減到60%聲, 用左>3年, 後來換耳膠時整爛左個耳膠, 買左SpinFit CP3X0, 個人還是偏好原裝耳膠 (主要係顏色品題, 原裝係黑色, SpinFit 係白色半透明), 而且副廠耳膠有機會唔O岩位搞到叉唔到電。 
最後死因: 換左耳膠後成日頂起個蓋, 所以合唔實個蓋而差唔到電, 最後因叉電盒個連接位老化而爛左, 一氣就之就換左 SONY 了。
注: 市場上已經有 75T, 85T, 外型一樣, 我未試過 85T 既 ANC, 但粗用黎講我覺得唔駛 ANC 都夠殺。


Sony wf-1000xm3
呢對 SONY 係 WM4 推出之前買既, 見到 SONY 減價, 而且已經吹左一陣風今年會推 WM4, 但二當家又唔駛追新款, Jabra 爛左之後又急忙搵過一對 replacement。最後就買左呢對 WM3。
SONY WF-1000xm3 以音效為賣點, 但正如我前文所說, 唔好期望同其他中價既ear bud有非常大既分別, 我自己感覺上差不多。平價既 earbud 有大把, 大家可以上網搵搵, 基本上就係晶片既分別, 來來去去都係果幾家 Realtek, Qualcomm, 又或者係大陸晶片。二當家非技術人, 買 SONY 最大既原因其實係因為呢對 earbud 係可以單獨獨立使用(左耳/右耳), 市面上好多耳機話可以獨立使用, 但只係得其中一隻耳可以單獨使用 (通常係右耳), 而因為二當家就係因為呢個原因買呢對XM3。

以二當家既認知黎講, 除左 APPLE 既 Airpods, 大部份既通話/降噪功能都非常一般, 包括呢一對 ,大當家經常性投訴聽得唔清楚, 有雜音, 同好嘈。所以常常要講電話既就唔多建議用呢對。呢外有個小問題係呢對 XM3 既重量同外型, 比較容易跌出黎, 尤其係常常除口罩時掃甩隻耳機, 反而 65T 我好少發生呢個問題。網上有影片教正確配帶方法, 的確有幫助, 但都係易跌出黎。



小米盒子國際版
二當家一直都想換左個電視盒 (Apply TV😏), 但呢隻小米盒子奇蹟地好長壽, 真係估你唔到。
先講講我既要求, Netflix, YouTube, KODI (streaming), Spotify, ViuTV, Casting, HDP直播 (極少用)。小米盒子最大既問題係個 firmware, 用咁多年, 有一半時間都係差既, 最大問題係如果唔 restart 個盒, 睇片會卡, 另外就係偶然會同個 REMOTE 配對失敗, 要重新配對。睇片會卡呢個問題係近一兩次更新時已經減少左極多, 以前係要每一次開機, 先跑一次 restart 至開始開 APP。
最大問題........其實又無乜問題, 你可以話無4K, 無光纖輸出, 但從重量去考慮, 真係一個完美裝置, 二當家連去旅行都會拎埋去, 電視一接 HDMI 就用得, 方便之極。
二當家仲有買 Chromecast, 但功能上就無得同小米盒子比了。





Sony soundbar ht-x8500
二當家對影音唔係無要求, 但我租屋包電視, 有得用就用住先, 一直以來二當斬都係用 3.5mm 出電腦喇叭解決電視本身垃圾音質既問題 (平價解決方法, 木耳都聽得出分別), 見到 Sony 出左 X8500 就有D興趣, for 未來升級用 (男人買野既籍口)。先講講背景, 之前用既電腦喇叭多為2.0, X8500 就係 2.1 (內置低音) 及聲稱模擬 7.1.2。 你見我放大隻字就知咩事, 模擬既野唔好咁大期望, 同 7.1.2 差 10 皮。 HDMI 插口有2個, Input and output (ARC/eARC), ARC/eARC 原本個構思係好完美 (即電視可將信號送回 soundbar, 由單向變做雙向), 即係用電視 (用緊部電視非SONY)個遙控控制音量, 信號會由電視經 HDMI 再控制 soundbar, 又或者 PS4 駁電視, 音訊由電視再射去 soundbar。但實際操作上經常發生電視認唔到 soundbar, 又或者認到 soundbar, 但 soundbar 無聲。最後要熄晒所有 devices 再重開。另外, 二當家都少用藍芽連接, 一黎switch input 會令到上面講認唔到device 既問題變得更嚴重, 另外經藍芽出既音效都係非常麻麻。


Synology DS210J
用左快10年既NAS- 210J, 配上兩隻 3T 既 WD Green, 到呢一刻都仲未打柴, 勁!!!
早期用途多為 BT, 因為夠靜, 用電量低, 同埋唔駛開住部電腦 DL 野, 後期改左做 RAID 1, 主力 backup 相及重要文件為主。功能上個 interface 都做得非常簡潔, 後期都加入了雲功能, 到呢一刻二當家仲經常使用。 



Insta 360 - One R
呢部 One R 唔知算唔算係第一部模組化既機, 原本二當家諗住買去滑雪, 但到宜家都未出過國😭。呢部機最正梗係可以當 action cam, 又可以玩埋 360, 有好多 360 既 template / effect 可以玩, 例如 bullet time, AI object tracking等。玩熟左部機後, 出黎既效果至會好。另外有 Leica version, 聽聞畫質更強, 但二當家就只買普通版本。雖然用既機會唔大, 但如果出去行山, 室外活動等, 一機兩用, 可以避免左帶兩部機既煩惱, 另外換鏡頭都唔算煩, 我相信係雪地上都 handle 到, 前後唔駛1分鐘。部機聲稱裸機5米防水, 但二當家就無咁既勇氣。 



想買又未買系列



PS5
 一直玩大抽獎, 由「想買」到宜家已經無感覺, 可以等到出 Slim version or Pro version 至購入都唔嫌遲。求神拜佛部 PS4 唔好死住 (間中出面死亡藍燈)。



Switch
由一開始好多人買, 到宜家好多人買完之後封塵, 出完 Lite, 出埋 OLED 二當家都仲未買機😓。其實我對 Switch 的興趣並唔係咁大, 但想玩 Game 王 <爾達傳說 曠野之息>, 多數番香港問人借機。

圖為 LSX



KEF LS50 / X300A
音響這條路好長, 一入坑便無回頭路, 所以一直想一步到位, 買套主動性喇叭聽歌就算。 一開始想買係 X300A, 但睇睇下, 又見到對 LS50好靚仔 (但個價...), 而且KEF 的 Marketing 做得超好, 基本上打 Best Active Speakers 就一定會有 KEF 份。其它 Speaker 最大個問題係個 design 做得太...........classic.........

Sunday, November 14, 2021

打工仔記事 - 機會黎啦, 飛雲!

 




近日聽左止凡, 麥加文同匯君兄個 LIVE, 真心多謝佢地無施既分享。有時二當家覺得人同人既關係一索涉到利益就好複雜, 所以二當家做人既宗旨都係「君子之交淡如水」。二當家非出生大富之家, 記得大學時同學夾份請我去食飯, 幾個兄弟仲話夾份買樓, 二當家常常婉拒, 一黎係唔好意思, 二黎二當家真心覺得無有利益既關係係最真摰。所以二當家知道自己創業既能力好弱, 因為無 social 既技巧, 老闆們都唔介意這種互利既關係, 越識得多人, 有事上黎可以搵到幫手既人就越多。

講番正題, 之前係<敗走台灣>系列都已經講過, 未來有機會想番香港, 估唔到機會咁大就黎。公司內部某位 peers 會離開, 雖然係 Peers, 但高級過二當家好多。二當家係公司內部黎講, 只係一個Junior mgmt, 公司俾機會由一個無管人經驗既二當家黎擔當呢個位, 其中一個原因係二當家人工低, 連 pay cut 都唔需要, 二黎台灣呢個 market 根本無人有興趣。

經過兩年多, 老闆們都算滿意二當家既表現, 宜家香港有個位將會空出黎, 問題係邊個會 take? 如果沒有社運, 國安法, 疫情, 我深信有排都未到我, 多數係HQ安插個人落黎。因為個 position 係高二當家宜家個位至少2級, 能力都係其次, 而係公司內部 rising star 咁多, 而且公司都偏向由西人出任高管職位。但今時唔同往日, 去香港要隔離 21日, 外資都唔知會留係香港幾耐, 二當家突然成為最佳人選。

雖然老闆口裡已經講左係安排中, 但二當家都係盡量平常心, 但同時又暗自興奮中。 如果爭取到呢個機會人生會突然行快左4,5,6,7年, package 有望去到 top 10% 個 group (二當家的理財日誌: 打工仔記事 - 又到加薪時? (vicemaster2nd.blogspot.com)), 最終希望去到 top 5%, 同時番香港可以再睇下有咩創業既機會, 又或者繼續儲 Asset...........

收得呢個人工, 壓力都係加倍咁黎, 尤其係香港班同事既個性我都非常清楚😩。但管他的, 有 offer 至算。 二當家都有同大當家傾下, 如果事成, timeline 黎講應該仲有半年多, 有咩想係台灣做, 想係台灣食, 就盡量係呢半年內達成, 番到香港, 深信我地都會非常掛住台灣。


Wednesday, November 3, 2021

投資日誌 - 2021-11-03

 

網上圖片


l   FB 轉名 META - 元宇宙呢個慨念唔係新, 問題係幾時至可以實行到。要進份完全既模擬世界 (例如刀劍神域/ Matrix/ Ready Player One), 仲要普及化相信仲有十萬八千里。但FB 今次轉名, 令到公司有更明確既方向, 至於改名後有咩動作, 大家真係要拭目以待  

l   TSLA 1200 – TSLA 1200, 當中COP26 應該幫唔少, 減碳好似已經成為各個國家既國策大方向, 綠能更加係重中之重。二當家未有深有研究, 手上既 TSLA 只係早前 FOMO 前既貨, 估唔到咁快就升左一倍, 扑中既師兄就係恭喜晒。

l   工作成功感 有師兄話打工既成功感係偽命題, 其實我又唔係咁睇, 一樣米養百樣人。之前台灣疫情下要WFH, 我公司班同事其實唔係個個都咁 enjoy, 無錢既唔想係屋企開冷氣, 有錢既唔想係屋企對住奶奶同囝囡, 或者工作上既成功感對佢地黎講只係 bonus,最重要既工作提供左一個舒服既社交環境, 聽落雖然係好ON9, 尤其今時今日個個都講 FIRE / 被動收入, 但事實上又真係有一班打工唔係為錢既人

l   Google Map – 我自己真係好討厭用 google map 搵餐廳, 平時慣左係個 map 到打 restaurant 搵有咩食, or 其他 key words 例如咖喱, Google Map 既選擇性提供資訊真係好L麻煩, 明明我知有間餐廳係附近, 但有偏偏唔唔俾我知係邊到, D Google 霸權真係不要得。

l   二當既財報target 又慢下來, 1011月都忙, keep 住開會無得悠閒地睇下財報, 見到 Group 內討論不絕, 二當家都係 mark 低下D Number, 有時間至再研究下

l   睇番 2021 網紅既小炒倉, 年初一百萬, 現值……自己睇, 唔輸當贏, 其實你同我都可以做網紅

BOOM 小炒倉 - Tasty Money

l   YTD NAV +4.7% (incl. Dividend/Interest), 無野值得炫耀, 曾經仲負數TIM, 應該係因為TSLA又抽番少少,   宜家個倉雖然動能不足, 但至少可以唔駛長期 monitor 住  

 

Symbol

Description

Gain/Loss

% of Portfolio

TSM

TAIWAN SEMICONDUCTOR-SP ADR

1%

9%

9988

ALIBABA GROUP HOLDING LTD

-29%

7%

700

TENCENT HOLDINGS LTD

-2%

6%

697

SHOUCHENG HOLDINGS LTD

-23%

4%

2318

PING AN INSURANCE GROUP CO-H

-2%

4%

1883

CITIC TELECOM INTERNATIONAL

7%

3%

P40U

STARHILL GLOBAL REIT

26%

3%

MDT

MEDTRONIC PLC

3%

3%

FFC

FLAHERTY & CRUMRINE PREFERRE

-4%

3%

659

NWS HOLDINGS LTD

3%

3%

Others

46%

Cash

11%