Sunday, November 21, 2021

敗走台灣 - 大當家問「我可以唔撈嗎?」

 

網上圖片


以下開啟「樹洞」模式😷

前言: 如果有追開二當家個BLOG, 可能知道其實幾年前拎台灣 offer 果陣, package 其實一般般, 再加上大當家來台後二當家無強迫佢打工, 家庭收入其實係減少, 盈餘都係少左。 大當家呢三年都係做自己野, 近來開左間網店, 但規模甚少, 收入...梗加唔好講。但二當家覺得應該試下, 賺過經驗, 做老闆唔係一件咁過癮既事。 


話說「有機會」拎到香港 offer, 我同大當家都 FF 一下, 諗下番香港會點。話無顧慮就假既, 二當家自己好怕香港既壓迫生活環境, 工作壓力, 同自然產生既社交壓力。但正如前文說, 係台灣拎唔到 PR, 番香港收入增加, 仲可以陪下屋企人, 總括黎講都係一件好事黎。係交談中, 大家講到大當家番香港後既生活, 選擇有幾個

  1. 做番打工仔
  2. 做番打工仔 + 兼任網店
  3. 全職搞生意 (網店)
  4. FTW (full time wife)

二當家梗係 prefer 第1第2選項, 而感覺上大當家想選擇3。先講講二當家想法, 如果番香港, 最終都要解決房屋問題 (現實), 大當家身上其實有按揭 (看「前人種樹」系列), 最近家人又話要換樓, 即係我要預舊錢還俾銀行, 大當家宜家係無薪水, 亦即無可能再做到按揭。成舊資產即刻縮一半。

如果要係香港買樓, 基本消費係球半~兩球, 就算供得起, 首期都係一大舊錢。 二當家既如意算盤係用一年時間儲錢, 追番3年既光陰, 如果要咁做, 大當家份收入就好緊要。二當家跟大當家仲係香港果陣, 其實一直奉行財政獨立, 租金等洗費就按收入比例調整, 家用就各自各俾屋企。 來到台灣後, 二當家就要俾份家用大當家, 租金全付, 家用繼續各自搞掂。如果番到香港, 耍用呢個模式, 即二當家份收入, 要包埋香港既租金及大當家既家用, 講真, 搵幾多都唔夠😩。

大當家想繼續搞下生意, 但我心知呢單生意唔係搵到錢既生意。係台灣做生意, 好多人係真心想推廣某樣產品, 搵錢係其次, 交朋友為先, 成本低, 有額外收入可以抵銷成本, 燒錢都唔會燒入肉。係香港做生意, 生存到已經係奇蹟, 搵到錢係後話, 一個唔覺意可以傾家蕩產。二當家身邊都有女中豪傑, 好 tough, 邊打工邊生仔邊讀書邊搞生意, 最後盤生意上左軌道, 最後可以辭左份工。但大當家應該唔係呢個 TYPE。 

二當家好喜歡宅在家, 番到香港, 二當家都想生活品質提升, 希望可以用錢換品質, 亦即空間大D, 地點好D, 裝潢靚D,  食得好D, 等等。公一份婆一份係最理想既方式, 要養埋大當家就即係其他方面要遷就一下。況且我亦都唔想大當家完全依靠二當家, 假設我被裁員, 到時大家真係你眼望我眼。Again, 「貧賤夫妻百事哀」, 如果大當家份生意可以養得起自己, 我真係唔介意, 但二當家又唔係大細劉, 自問未有能力係香港可以養得起一個人。


回到圖最上方, 「靠自己才會幸福, 指望別人會很苦」, 那被別人指望呢? 


呢篇係「樹洞」篇, 意在放下一些自己的想法! No judgment, please! 🙊


6 comments:

  1. totally agree with you, no matter how good the relationship , always have to support our own living, then life can be easier for both.

    ReplyDelete
    Replies
    1. 小資女, thanks for your comment.
      其實現實中好多女性理財投資都好勁, 不過大當家完全唔係呢類人XP。

      Delete
  2. 二當家,你呢個諗法係一個正常人類/男人既諗法,都好難對你有任何judgementXD

    個人覺得最好梗係同大當家講清楚自己諗法,簡單黎講,即係自己條命自己負責番。兩公婆關係點都好,最好財政獨立,自己負責番自己果份,頂盡係互相assist,即可俾部分生活費,如30-50%,無咩可能100%。同埋,當你俾哂大當家既生活費,兩個人既關係就無咁平起平坐,有可能會影響兩公婆既關係架。

    ReplyDelete
    Replies
    1. 機器人兄, 謝謝留言。

      同意你所講, 一定會同大當家傾下。 但男人既感慨, 自己鐘意搵個樹洞發洩下, 放下負 XD。

      整個爛 GAG 先, 女人成日都話要搵個好歸屬, 但其實男人都想學「龜縮」。

      Delete
  3. 試下向大當家傳遞女人搵到錢先可以大聲講野 - 香港真係唔WORK, 靠晒老公一樣咁大聲 XD

    或者鼓勵大當家返工先容易建立返個社交網, 去玩去食去行街都多個伴多D資訊
    幫大當家張羅一下無乜壓力, 工作環境輕鬆既工, 等佢易適應D

    二當家加油

    --Dogdogchi

    ReplyDelete