公正 + M型社會 + 黑天鵝 +路西法效應

二當家既思想有D 跳線, 往往係由一個想法跳去另一個想法, 睇唔明係我既問題, 唔係你既問題。

上面幅圖好多人都睇過, 道理大家都明, 但實際上當有利益衝突時, 有幾多人可以好超然咁接受? 就講今次股災而言, 政府既資助往往係直接流入大企業, 及低下階層, 作為貧窮線以上既打工仔, 工要你番, 稅要你交, 樓要你買/租, 但係往往受到唔政府既幫助, 因為政府覺得你地搞得掂。

香港其實都唔算係福利型社會, 但長期下來既政策不衡, 向上流機會不足下, 呢班打工仔往往就最慘。呢度可以引用一下路西法效應, 制度上既不衡 (分配不均)係好容易引起衝突既。

假設學校都有分午餐, 要令一班原本好好感情既同學反面, 其實好易。 只要將部份同學既份量/質量減少, 而另一部份人增加, 在最理想既情況下係學生自行重新分配。但如果只將一部份人既份量/質量減少, 而另一部份人沒有增量, 學生自行重新分配既意願就會減少。靠自發性既重新發配去平衡其實係一件好難既事, 因為人性本貪, 自私, 尤其係社會上獎勵緊D又貪又自私既人, 變相鼓勵緊呢種行為, 最終只會更多令更多既人加入, 造成更大既不均。

被減少食物既人固然不高興, 而呢種不高興可能會轉去敵視另一批同學或分配者。假設分配者係老師(權威), 所有既不高興情緒自然會轉去無被減少食物果班同學到, 而食物減少既程度會影響佢地既行為, 假設佢地己經去到日日都食唔飽既情況下, 最後可能會發展到搶掠, 打鬥, 甚至挑戰權威。

作為分配者最重要既考量係公平, 但有極多既原因下, 分配者更偏向不公平既分配。而最大既挑戰係如何令到被分配既人覺得自己被公平對待。二當家諗到兩個方法, 1. 只有極少數人受惠
2. 資訊既不透明性 。再回到上圖, 現今社會下, 最理想既情況下當然係 Justice, 人人睇到球賽。

但現實中最有可能發生緊既係一小眾既人坐係 VIP 箱下, 輕輕鬆鬆咁飲住香檳, 嘆住冷氣咁睇球場, 望住呢班仲因為有個木箱企係上面而開心既平民, 心內暗爽, 因為呢班平民連有 VIP 箱既存在都唔知。



M型社會有好多原因, 其中一個原因係「邊個想做水魚」。一係你就盡力向上爬, 一係就讓自己向下流, 做水魚係最慘, 上下一齊壓迫, 住係三百尺唔夠但值幾百萬既屋入面, 心內即刻出現一個想法, 應該夠18歲就抽公屋, 。上一輩既人覺得你唔夠努力, 呢個時候睇番黑天鵝呢本書 (我只係睇左 YOUTUBE), 就會解釋到時代既改變, 亦改變左機會既分配。以前比較多「平均斯坦」, 大家都係有限時間, 有限既能力, 有限既資源去工作, 分配上比較平均。

即係做司機咁, 每個司機都係開8~10個鐘, 大家最多都係開一部車, 多勞多得。但如果自動駕駛真係成功, 創作「自動駕駛」果個團體可能就可以取代成個市場, winner take all. 唔通你去話班司機唔夠努力去開車, 定係要話班司機唔去進修增值自己?

黑天鵝本書入面, 介紹到「極端司坦」就係 high risk high return, 成王敗寇。願意去投資呢筆錢既人往往本物已經肚滿腸肥, 你睇下什麼什麼「天使基金」就知, 講到尾都係魚翁散網, 本身終勝。再者, 低息環境下, 大企業既借貸成本極低, 可以投入改善, 研究, 革新既資源更多, 亦即我地成日講既「護城河」之一。


講左咁耐, 其實我想講既係, 身邊既朋友一個一個咁被炒, 香港人有部份家底厚, 唔憂做既大把。但又有一部人家底無咁好, 又或者剛剛成立小家庭, 今次被炒, 心理上既壓力好大。你說他們工作不努力嗎? 努力又如何? 最終又係得一個大信封。失業率急升, 最終壓力又落番去政府到, 政府又要保企業, 又要保呢班失業既人, 連供緊樓既都要保埋。往後政府應該如何面對龐大既失業人士呢?

~奴動節快樂~😢

小生意: 台灣的優勢及劣勢

先說說二當家的小生意, 在香港的公司戶口仲未搞掂, 遙控咁搞真係好 Q 麻煩, 3個月既野搞左半年都仲未開到公司戶口。而近日同大當家討論投資移民的可行性, 因為在3月份台灣的投資移民改了要求,

1. 係經營期由 1年轉做3 年, 如期內執笠有可能會收番個定居權,
2. 要期內請兩名全職台灣員工,
3. 台灣公司要有實體地址 (非網店)

咁其實台灣做既野都好明顯, 第一項係因為好多人黎台灣開間殼, 一年多就執笠, 為左個身份而來。 第二/三項就係希望製造就業機會, 提高門檻。所以是否真係搞移民, 呢個都仲係考慮中, 始終移民既成本唔低。

不過移民係一件事, 搞小生意係另一件事, 二當家之前都講過, 係為了一個客而想做一個 dummy。 其實年頭果陣個客已經話唔係台灣呢邊做, 會番去家鄉搵 supplier, 所以中間二當家又心內涼了一截, 個 project 未開始已經停。但全球疫情漫延底下, 全世界既經濟活動好多都停晒, 二當家覺得個天幫我 buy time, 如果係呢個時候到做到個 dummy 俾個客, 話唔定可以 sell 到。

如是者, 就同我老闆 - 大當家傾下個 idea, 其實之前都講過下, 不過心內始終因為我倆既個人問題而有所保留, 宜家結果已經出左, 無後顧之憂, 而她也休息了一年, 有點蠢蠢欲動。大家商討後, 她也十分 buy in 我的 idea, 亦都覺得有得做, 最後決定 - 去馬 💣!!!


二當家要做既野有專業要求, 之前問個香港freelancer價, 要 HK$/400 以上, 但二當家係台灣, 又番唔到香港住, 搵香港人合作係有D 難度。而在台灣又沒有 network, 所以決定了網上搵 freelancer 去合作 (台灣叫「外包」)。 由於自己又唔熟行情, 所以先去幾個台灣外包網看看, 比教出名的有 Tasker (518), 104 外包, PPT 的 SOHO 版, 睇下D 外包既成交價錢同叫價。

基本上, 用香港人既角度黎睇, 價錢真係非常咁合理, 尤其係D 用無/低成本又非專業類既工作 , 比如設計, 拍照等 (我對所有設計師唔住😅, 我知你地有你地既專業性), 都係平到笑。如果你要搵某類專業人士, 其實台灣都好多 (尤其寫 APP, 設計 PCB, 剪片等), 要知道台灣既大學入學率係 9X %, 雖然讀書大學唔代表 D 咩, 但人力資源充足及相對便宜, 對創業者來說係一個福音, 始終資本有限。

而租金水平亦無可能同香港比, 係 GAMER.TW 到搵到一篇非常詳盡既開銷報告, 再加上網上 KOL 拍既實況紀錄, 心內都已經有個底。 如果要係台北開地鋪, 店面租金 around NT$30000~50000 (約一千尺, 月租HK$10000), 人工每人每月約 ( NT$30000~NT$40000)。成本雖然有數得計, 但台灣人既消費力真係唔強, 食個飯 NT$150 內, 所以做內銷其實唔易做。早前同個台灣朋友傾, 佢話好多台灣人都鐘意做生意, 但係主力做小生意, 所以有大量小店爭生意, 利潤不會太高。再加上國內消費力唔強, 年青人向上流既動力一般。朋人又說台灣人都愛錢, 但好多時唔肯等價交換 (加班, 犧牲個人時間), 無向上流既動力, 大家聽下就算, 二當家自己就不盡同意。

在台灣做生意, hardskill 易搵, softskill 難求。 softskill 包括語言, business mindset, 國際視野等。
例如一般香港人講講下野或多或少都會夾雜英文, 但如果同台灣人對話時夾雜英文, 好多時佢地都會聽唔明, 簡單如點咖啡, 在香港叫杯 cappuccino, 應該好多地方都明, 我甚至唔知cappuccino在香港的翻譯, 因為唔會用到。但在台灣, 你叫cappuccino, 好多台灣人只會「黑人問號」,唔知你講乜, 主動性強D 既只會問你「是否卡布奇諾?」無錯, 在台灣 cappuccino就係叫做卡布奇諾。

至於 business mindset, 其實同整個地方既風氣有關, 台灣就係以人為本, 香港係以錢為本。係香港, 同人傾生意, 利益大於關係。而係台灣, 關係大於利益, 無人脈唔單單係事倍功半, 甚至乎係寸步難行。簡單如租個店面, 複雜有如利益衝突, 上法院等事情 (我都係上網聽人講), 原來靠關係都可以解決。

另外就係國際視野, 例如平面設計, 餐品包裝設計等, 店舖裝潢等, 其實同香港都仲有好大距離。請別誤會, 二當家唔係想話台灣點差, 香港點好, 只係作為一個係兩個地方都工作/生活過既人, 加上自己係外資打滾左一段時間, 知道中間既差異係邊到。

而作為小小小創業家, 要思考既係如何利用地方優勢去幫助自己 及 盡可能避免地方劣勢的影響, 希望不日有更多既 update.


【心得】分享一下開了兩年咖啡店的心得 有心想開咖啡店的進來

敗走台灣 - 續租 + 近況 (六)

生活: 現居的地方已經差不多住了一年, 景氣唔好, 準備要 COST DOWN。 跟大當家在591 上看了不同的租盤。 在台北, 租盤真的不算多, 能符合我們的要求就更少。不要以為台灣的房子一定很大, 其實近年台北新建的房子也越來越少, 建坪 10~20坪為主 (約360尺~720尺建築面積, 實用面積約為70%) 。我們原本的目標為 35000台幣以下 (9000千港紙), 20坪以上, 另外要包電器, 要電梯大樓及希望係新裝。係左揀右揀之下, 選擇真係唔多, 同埋租盤都好搶手, 一放盤幾日就已經無左。

上網搵一搵台北租金資料, 大慨1300~1500台幣一坪(建評) (約400蚊, 36尺, 尺價HK$11). 當然, 呢個價無得同香港比, 但以我同大當家既想法, 我地 benchmark 既對像係本地人, 慳得一蚊得一蚊。

係一輪觀察及計數後, 想多一事不如少一事, 原因有三, 一. 搬屋都有成本考慮, 二. 有可能要再添置傢俱電器, 三. 如果搬屋要再簽過張死約, 萬一真係被辭, 隨時要著草番香港。考慮完以上幾點, 就膽粗粗咁向房東傾價錢。

##2020/05/04, 原來台灣既租約係要每年 review, 黎緊二當家都要再簽番一年, 唔怪得咁多房東唔肯等。

房東本身都係生意佬, 我地吉起條尾就想知我地做咩啦, 一開口就問我地如果下年唔加租, OK 唔OK。而另一邊廂我地梗係想減多少, 但 so far 房東都對我地非常唔錯, 大部份電器都係新置, 上年壞左冷氣都即刻同我地換晒, 我都無謂大刀闊斧, 係咁易傾左個價減 7%。房東都好快應承, 呢段時間大家心知未來經濟會差, 只係唔知會去到幾差, 同心抗疫不單單係載個口罩, 同理心呢個時間都非常重要。 最後我個 DEAL 係低過一千台幣一坪, 包管理費同第四台😘。


在台北市租屋，到底有多少困難？一張表看：整層住家、套房、雅房平均租金坪數
你租得起哪裡？「大台北房租地圖」看完準備搬家



工作: 因為疫情改善左, 只係 WFH 左一段好短既時間, 宜家又 resume normal。如果你問我, 我覺得 0 確疹 14 日至叫做第一階段勝利。但台灣呢邊0 確疹左2~3日已經有人覺得要開檳 , 點知昨天突然在敦睦艦隊上有21單確疹, 再一次提醒台灣人疫情係仲未完結, 不能有絲毫鬆懈。

至於 Job Security, 壓力一定會有, 就算唔係炒我, 但要我炒人都唔想。宜家望中國既經濟可以快D回復, 歐美應該仲有排。我地公司都係靠中國食飯, 如果中國唔掂, 未來我公司應該會非常地咁慘。

人生大事: 之前講左做第二次 IVF, 其實做一次 IVF 好快, 係女性一個 period 內就完成。而結果...係無野發生既😞。今次比起上一次易左接受, 一黎已經有第一次既經驗, 二黎就算得左, 頭4個月我深信每日都會擔驚受怕。自己一早已經做好左期望管理, 既然已經有答案, 人生終要 move on, 向下個目標進發。

而另外一個人生大事係考慮移民, 我同大當家都黎左台灣近一年, 開始熟悉呢邊生活, 所以近來二當家又再次同大當家傾呢個問題。我記得自己前文講過, 係呢邊做5年野可以拎到「永久居留」, 原來呢個只係俾「外國人」申請, 並不包括香港人。亦即不論我係呢到做幾耐野, 都唔會有係台灣定居既權利。而點解自己之前唔考慮移民宜家又再考慮, 其一我過黎果陣香港未有社會事件, 二黎自己對台灣亦都唔熟悉, 再加上三月份台灣又再修例, 移民又難左。 二當家移民並唔係希望搵到個避難所, 而係真係覺得呢個地方係適合自己, 才考慮移民。今次疫情後, 我身邊都好多移左民既朋友都話要回流香港, 不輪英美澳。當中最大既原因係接受唔到外國唔載口罩果套, 當我同大當家傾果陣, 我話俾佢聽「完美既地方根本唔存在, 我地只係尋找一個在接受範圍內可生活既地方」。

挑戰/創業: 因為以上既人生大事, 加強左要創業既意願。好多香港人黎移民, 都係搞下搖搖杯, 當俾少少錢去買個 passport, 但係此實乃非我所願。既然無後顧之休, 不如諗大D, 宜家心內有兩單野。

一單係之前一直講緊既, 以 project 型式做一個 product, development stage 3~4 個月, 諗住搵一班畢業生一齊搞個小項目, 但不符合移民條件。大當家已經 approve 左去馬。
另一單係用黎搞移民, 想幫一D台灣本土企業出口佢地D貨去外國, 但係我乜都唔識, 要由零開始。

有經驗既大神們, 如果有意見既可以指條唔黎行下。


投資: 繼續佛系, 個市 V 型反彈, 見到幾隻大股都升破高位, 有機會就繼續換馬。

打工仔記事 - Work from home (WFH)

係香港, 好多朋友同事一早已經 work from home, 而二當家係台灣情況相對較穩定, 但公司最終決定實行 work from home, 暫時未知行幾耐。雖然只係一個簡單既 work from home, 但對二當家來說實在是一個挑戰, 因為二當家所做既工作雖然部份同事可以拎部電腦番屋企, 但有部份同事係無辦法在家工作, work from home 對呢部份同事黎講只係代表放假。

在公司同老闆既立場黎講, 理得你乜疫情, target 一樣為照舊, 雖然有好多人覺得點解公司無人情味, 呢D 咁既時候仲講 target / KPI, 但商業社會好多時就係咁, 呢D咁既時勢就更加要做好D數, 否則下個被雞既就可能係你。而二當家要諗既就係點平衡, 如果我成 TEAM 人得一半人番工但係 KPI 等仲搞得掂, 老闆分分鐘一個屈尾十問你點解要咁多人。但如果搞唔掂條數, 老闆就會捽爆二當家。 如何又要搞得掂條數, 但係又要表現出唔夠人手果種無奈係一種藝術。


Work from home 後, 二當家其實有少少悶到發慌, 又唔可以離開部電腦, 好在屋企仲有大當家係到, 未至於對住四面牆發呆。 過來台灣之前, 有考慮過 lunch 過去附近既 gym room 做一個鐘運動, 結果梗係...............無疾而終。 今次 work from home, 決定pick up 番, 用 lunch hour 係附近跑圈加上做簡單既 HIIT, 希望身體可以健康D。疫情底下, 大家 Stay Strong & Stay Healthy!!! ✌

打工仔記事 - 冰河時期

無諗過二當家過來台灣, 竟然可以在未夠一年內體驗到世紀大冰河時期。 二當家打工果間公司係做零售既, 由社運開始已經衰到貼地, 今次仲要黎個全球疫情, 唔 cut 人就有鬼。

係香港, 前線既員工上年年底已經開刀, 二當家好運過左黎台灣, 心諗都叫避過一劫, 但今次疫情係全球性, 去邊都死。二當家係賣豬仔過黎, 保障當然無咁好, 但好在老闆們都知我係做野既人, 應該未LAY 到我。

但大環境壓落黎, cut cost 就一定, 原本二當家仲係前文到懶醒咁預左 buffer 被cut, 點知未開年, 二當家果 team 既 buffer 已經完全被 cut 晒。亦即係話, 如果疫情繼續拖延落去, 迫住再 cut cost, 可以 cut 既就係人(大部份都係 fixed cost), 呢點係二當家最唔想既。

打工既好多人係手停口停, 今時今日無左份工, 要再搵過份收入唔係咁易, 快則幾個月, 慢則幾年。二當家都係到諗, 如果被 cut 果個係我會點, 7 折出糧又會點, 我應該番香港, 定係留係台灣?

番香港, 就會變成「敗敗走香港」, 係香港又無樓, 單係租金都已經係一個問題, worst case 係食屋企住屋企。

留係台灣, 要搵番一樣既收入非常難, 分分鐘一半都無, 自己慳極都仲要供養香港四大長老。要大當家要係台灣再打工, 又可以嗎?

諗了又諗, 最後最有可能既係係台灣創業, 逆市創業從來都唔易, 但暫時係我想到既一條出路。

暫時都係得個諗字, 開源節流就一定要, 所以租約差不多到期了, 又要再開始搵樓租.......

下篇再講。