投資日誌 2018/08/31

Stock	Name	Ratio	Buy Price	Market	Delta%	Remarks
0255	龍記	16%	3.85	3.70	-4%	Avg. Buy Price in 2017/2018
0087	太古B	13%	10.31	14.30	39%	Price @ 2017-12-31
0005	HSBC	10%	77.45	68.85	-11%
87001	匯賢	5%	3.23	3.18	-2%	Price @ 2017-12-31
1113	長實集團	5%	64.63	55.95	-13%
2238	廣汽集團	6%	10.64	8.52	-20%	Avg. Buy Price in 2018
0044	香港飛機工程	5%	68.71	69.00	0%
0296	英皇娛樂酒店	3%	1.74	1.58	-9%
1132	橙天嘉禾	1%	0.85	0.27	-69%	Price @ 2017-12-31
3389	亨得利	1%	0.38	0.32	-16%
		35%

股票面值 (Face value) -6.4%
整個組合(連已收股息) -0.77%

大風大波的8月份, 股票面值由月初的 - 3 %, 月中時因為廣汽去到6.8, 面值跌至 6%, 其後國家隊進場, 廣汽幾日就升番到 8.5 , 面值又升番到 -3%左右, 估唔到月底前幾日, 橙天又一單 GAP 水, 令到成個組合面值再跌到 -6.4%。

除左以上兩隻, 獅王都跌到落 68.85 呢個52周新低。 而長實弱到一個點既股價亦進一步拖累整個組合。

8月份既操作

減持
太古B @ 14.25
廣汽 @ 7.23
廖創興企業 @ 12.48

以上操作主要目的是減輕投資比重, 不過自己都係衰貪心, 35% CASH 唔算高現金比率, 今日阿 TRUMP 哥又話加碼貿易戰, 下個月應該會繼續減磅。

劉鳴煒先生又一名句

我承認, 我是多少有點仇富的。

劉鳴煒先生繼幾年前既「睇少啲戲、去少啲日本」, 今次又有名句「十歲時收十萬現金」做生日禮物。

有錢唔係罪, 但無知係罪。你覺得劉鳴煒無知嘛? 我深信不。他絕對比起大部人聰明。

平心而論, 佢叫人儲錢唔係錯, 但當大學生畢業仲欠十幾廿萬學費, 你那邊箱話自己10歲收10萬 (1990年), 好難有共鳴姐。

友人說, 佢似「何不食肉糜」的晉惠帝, 但以前皇帝都話係深宮唔知世情, 大臣又報喜不報憂。今時今日, 打開手機乜都睇到, 你覺佢唔知d人點講佢咩?

只不過他根本連「應酬」我地呢班蟻民都費事, 唔知由幾時開知, 政府/保皇黨連呃你「乙水」你都廢事, 直接黎搶, 量你都不敢反抗。劉生做既只係 「口裡說幫你, 暗裡笑鳩你」, 你覺得佢離地咩, 佢答你 「我係離地呀, 吹咩?」


有傳聞他鋪緊路選特首, 係都唔出奇, 如果我地仲有特首既話。

貨幣系統真相

Sad but true......

0255 龍記集團 2018 上半年業績短評

//龍記集團就是以標準模架、訂造模架、高精模架等生產與銷售為主營的世界四大模架製造商之一，其餘三家為(哈斯科)德國模具、FUTABA (雙葉)日本、(美國)D-M-E公司。//

//何为模架
现时模具的应用涉及每项产品（大如汽车、航天、日用品、电器通讯、医疗产品设备等），只要是数量多的产品都会应用模具生产，而模架是模具不可分割的部分。现时对模架精度要求，会按不同层次按产品需求而定。

模架是模具之半制成品，由各种不同的钢板配合零件组成，可以说是整套模具的骨架。由于模架及模具所涉及的加工有很大差异，模具制造商会选择向模架制造商订购模架，利用双方的生产优势，以提高整体生产质量及效率。//


簡單黎講, 模架係 MOLDING 不可缺既一部份, 不同既產品都有可能用到模架, 汽車, 手機, 玩具等。中美貿戰, 二當家有兩樣野係擔心龍記既, 一. 係鋼材價格, 二. 係中國出口貨品數量。始終龍記有8成半既生意都係來自中國。

鋼材價格: 根據龍記網頁, 佢地係國際知名品牌例如日本大同、瑞典一勝百、德國葛利茲、法國奧伯杜瓦、日本新東等中國主要代理商, 新關稅應該龍記無直接影響, 但人民幣跌, 對其利潤或多或少都會有影響, 但應該未 REFLECT 係今年上半年既年報到。

出口貨品數量: 雖然無具體數字, 但未來一定有影響, 多與少的問題


單看數字, 上半年收入 13億, 比同期增加 13%, 但係除稅前溢利1.6億, 比同期跌 24%。撇除其他收入, 公平值, 出售資產等一次性影響, 核心稅前溢利其實係增加左 18%。 EPS 0.196 (P/E 9.5, 3.8 / 0.4)。

以核心溢利來看 PROFIT MARGIN, 同前幾年一樣都係 11%, PROFIT MARGIN 其實算都幾高 (2013 年~2015年 MARGIN 只有 4~6%左右)。
以 GROSS MARGIN 黎睇,  MARGIN 仲有 58%, 對比早幾年係 6X% 低左, 估計下半年會更差。

以 BALANCE SHEET 黎講, 仍然非常靚仔, 低借貸, Quick ratio 2.2, NAV 3.58 (P/B: 1), 現金有5.7億, 總負債至 3.3億。ROA 半年計4.5%, ROE 半年計為5.5%, 同上年相若。

唯一唔開心既一定係派息, 中期每股 0.12, PAYOUT RATIO 61%, 其實同前幾年差不多, 不過無左特別息。

如果以全年派息 0.24 咁去計, 回報率 3%=8, 4%為6, 5%為4.8, 6%為4, 7%為3.42。現價為 3.8左右, 52周高位為 4.4, 低位為3.14。

*DAVID WEBB 持有 5%


REFERENCE:

土豪龍記集團(00255)還要再發1.5億 - 2017
百度 - 模架

Relocate, 我有本事嗎?

話說二當家心裡想著如果有機會，希望公司安排到relocate. 尤其當公司有內部招聘時，如見到有心儀職位就即刻搭下路，睇下有冇機。

我諗同大部份MNC 一樣，中國一定係最多JOB POST 嘅MARKET, 二當家其實心入面都準備好番中國做野，亦都同大當家傾過下，係差左未同老闆表態。

係一個機緣巧合嘅情況下，同一個係上海做左兩年嘢嘅舊同事食飯，就請教一下佢係過住兩年嘅生活係點。佢話講消費，其實同香港差唔多，但佢唔建議我番去，一. 好多公司唔會幫你交稅，中國收緊30% 稅率，香港當你15~17%, 都講緊差一半稅，除非公司幫你俾，否則一樣人工但係打個7折。
二. 上海啲租都好貴，就算租金呎價低過香港，但因為普遍住嘅面積都好大，最後舊租金都可能大過香港。

佢話其實係有暗招交少啲稅，就係上網買發票谷大租金開支(二當家無去證實真確性), 令到taxable 果舊錢細啲，但你都知政策嘅野朝令夕改，唔知邊日政府會堵塞呢樣嘢。

聽完之後暫時打消左個念頭，始終人工係我唯一嘅收入，無數咁上去打工並非易事，加上要拋低晒所有嘢。去大陸，就交多左稅。去台灣，就減人工 (台灣最多稅率40%, 但應該係打工皇帝級別)。新加坡，怕悶。澳洲，太遠。二當家真麻X煩。

最後都係決定要先做好自己本份, 人地求你永遠好過你求人, 你有本事既唔慌無出路。

風雨過後的晴天? 還是暴風雨前的平靜?

在前篇 winter is coming 後, 二當家放了部份股票, 包括

廖創興, 部份廣汽, 部份太古, 把現金水平提升去35%.......最緊要睡得安心。

龍記今晚放榜, 且看如何...

投資好講性格, 二當家係贏唔到大錢格, 膽小如鼠。

加上本細就係慘, 如果我同你講700會贏大錢, 但身上得幾皮野, 一手就等於 ALL IN, 你會買嗎?
16 (分拆前) 一年成十皮野, 買都買唔起。
大灣區D 樓好平, 一球一個單位, 諗都唔駛諗。

投資是講門檻, 但財急又不入門, 點樣可以快速升「呢」呢?

影響香港樓市既因素 (歡迎提供)

影響香港樓市既因素 (歡迎提供)

• 市場利率 - 香港暫時定存差不多有2~3%, 美國國債 YTD 2YRS AROUND 2.6%, 30YRS AROUND 3%
• 供求 - 在大媽滿地既情況下, 多多都唔夠
  //6月份私樓落成量錄1,056伙，按月跌61%，今年上半年共6,220伙落成，按年同期減近3成，僅佔全年預測目標34%。業界料，一手空置稅或令發展商延緩申請入伙紙，將難達全年目標。
• 政治原因/政策 - 居屋同收入掛勾, 首置450伙, 150人照樣落黎, 空置稅, who cares?
• 升值潛力 - 一直都唔明點解香港D 樓可以升到咁勁, 睇完「葳言大意 - 唐山三子」果兩集, 即刻明晒, 因為國內原來唔計回報率, 只睇升值潛力
• 投資價值 - 港樓回報率將 2.6~ 3%左右 (租金/樓價), 計埋一般洗費應該低過呢個數
• 天災人禍 - 最安全的城市
• 法制 - 比上不足, 比下有餘好多..........
• 教肓 - 算係好掛..........
• 地點 - 有山有海, 好過好多地方, 空氣質素都可以

//
[8.17] 剛好看到其他網站有一個新的「房價崩跌-泡沫指標」, 分享一下

股感知識庫 : 房價真的會崩嗎？2018 十大泡沫指標

Winter is coming...

減持一部份, 最緊要睡得安心


Dr. Ng
大陸P2P事件 分析
P2P雷暴潮：誰製造了中國的「金融難民」？
彭博：8個問題帶你探析中國債券違約情況
金融去槓桿 中國企業債信拉警報
潘迪藍：特朗普反覆 實為政治計算
【貿易戰】傳華為退出美國市場 決定裁撤全部據點
拆解伊朗朝鮮核威脅 川普布大局抗中俄

0194 廖創興企業 2018 上半年業績簡評

0194 廖創興企業 2018 上半年業績簡評

廖創興是悶股, 絕對唔係倍升股, 最風光果陣應該係賣左創興銀行俾越秀, 我買果陣已經賣左仔, 所以並唔係有咩先見之明。

廖創興主要收入是來自物業投資, 物業發展, 物業管理, 財務投資, 貿易及製造及酒店經營, 當中頭兩樣的收入已經佔了8~9成。

廖創興2017年交了一份非常亮麗的成績表, 主要是因為賣樓成績理想, 但廖創興不是發展商, 不會每年都有樓賣, 所以收租收那部份的收入顯得很重要。

物業投資

物業投資的上半年收益是184,965千港元, 上年同期179,128千港元, 微升3%。營運支出2018上半年是-63,045千港元, 上年同期-72,642千港元, 減少左13%, 營運溢利 121,920千港元 (不計入公平值變動, 比上年同期 +14%)

整體出租率都係90%。而位處干諾道西181–183號ONE-EIGHT-ONE酒店及服務式公寓, 由原本2017年開始營運, 改到2018年第三季至拎入伙紙, 無2019年都唔駛諗住。

物業發展

佛山翠湖綠洲花園一至三期已經賣晒 ,第四期賣左 1081 個單位, 佔推出數量90%, 第四期總數提供1,377個住宅單位。計晒未賣既野, 仲值20億 (2017年既物業發展收入才16億)。
//若佛山項目所有剩餘（未售）物業（包括住宅單位、零售商鋪和停車位）按目前市況出售，則本集團預計可進一步獲得總銷售收益約港幣20億元。//

營運數據

每股基本盈利上半年為1.07元, 比同期0.84元, 增加27%。估算PE為 5.84 [現價12.5 / (1.07x2)]。

派息每股0.22元, 比同期0.18元, 增加22%。派息比率為20.6%。

每股資產凈值(NAV)為31.66, 以現價12.5元計, PB為0.39。

每股現金價值6.78, 現金減去負債後, NET CASH 為每股4.21元。

長遠發展

大埔汀角路29號地段 係年報到隻字不題, 無番三五七年都唔好諗。

2017年買入兩個位於日本既物流倉, 睇回報好似幾好咁, 但好少詳細資料。
//該項目的總投資額約港幣191,000,000元。截至二零一八年六月三十日止期間，這些倉庫所產生的租金收入約395,000,000日元（約港幣27,800,000元）。而根據會計權益法，所佔合營企業業績約為港幣38,600,000元，佔該項投資資產淨值的50%，其中包括租金收入及資產重估收益。//

新酒店帶來的收入, 好保守咁去計, 未來每年應該可以增加1000萬盈利。
[1000蚊一晚*183房間*365*80%入住率*18%淨利率]

結論

執笠又未輪到佢, 未來又好似無乜發展, 宜家係等第四期賣樓之後睇下有冇好消息。

圍爐取暖

圍爐取暖

//意思是人總喜愛與想法相近的人「埋堆」，當他們聚起來互相分享著相近的思維，這群「圍爐」的人就很容易認為自己是主流意見，也只有自己的看法才是真理，其他不認同的人都是「港豬」。//

尋日同幾個識左十幾年既朋友去食飯吹水, 呢班朋友係因為二當家既興趣而認識, 以前大家出黎都會傾下睇緊咩書, 近來有D咩戲, 聽緊D咩歌等。今次出黎傾既話題就現實得多, 莫非真係人到中年。

當中我地傾左幾個 TOPIC, 1)港鐵, 2) 香港生活質素, 3)子女讀書 4)退休/海外居住

1)港鐵

當大當家話停牌後唔知港鐵會跌幾多, 點知港鐵個價仲硬到不得了, 只係輕微跌左2%。朋友A話呢單野對港鐵既影響係九牛一毛, 對港鐵既營收係不痛不癢。今次成堆人跳船, 可能仲慳番唔少人工, 最大既影響可能係其信譽, 因為港鐵都有BID一D海外既PROJECT。二當家覺得一日唔傾賠償/補救方案, 一日都未知對港鐵有咩影響, 要斬掉重練, 定係簡單補救,係全港人幫手埋單, 定係港鐵自己UM荷包呢? WHO KNOWS?

點都好, 除左呢單野外, 港鐵仲有好多沉降問題, 短期內都會被人釘實, 睇黎沙中線下年都通唔到車。

2) 香港生活質素

朋友B住荃灣, 十年前, 都仲算係一個比較偏既小區, 但近十年, 荃灣西鐵站既項目仲未完成, 單單係L HOTEL, 環宇海灣, 萬景峰等半新盤/酒店, 已經令荃灣變天, 未來幾年一眾大盤入伙後只會更迫爆荃灣。變天既除左樓價, D鋪租升, 小店開始被淘汰, 多左D中上消費店舖食市。而最慘既人多, 星期六日去荃灣真係多人到暈, 中午開始就見到荃灣廣場既停車場大排長龍, 當中又勁多人響HORN, 人又勁燥。你用幾百蚊係香港食個飯, 分分鐘野唔好食, 無服務, 仲要個半鐘交枱, SUPPOSE 成個社會進步左, 我地既生活質素應該好左, 但奈何只覺生活質素下降中。

3)子女讀書

朋友A兩公婆對小朋友讀名校既取態不同, 一個就想對子女入傳統名校, 一個就覺得只要對子女生活得開心, 讀邊間都一樣。 我以前覺得我地成班朋友都係會偏向生活得開心就夠, 但係估唔到今次大家都係偏向支持試入傳統名校。當中最大既討論係, 入名校, 唔代表唔開心, 而一間學校周圍既朋輩, 讀書既氛圍會影響到一個小朋友既成長。讀一間普通學校, 朋輩既出生同父母既教育又未必咁好, 近誅者赤, 近墨者黑既情況下, 成功既機會及人際網絡都會減少。

對於呢個討論, 二當家都係覺得有少少天生天養, 當然, 我好明白點解我朋友唔太支持讀傳統名校, 因為一讀, 可能分分鐘要搬屋, 仲可能要買學卷, 對一個普通「中產」家庭既經濟真係有一定壓力。

4)退休/海外居住

朋友B 經廣大傳媒攻勢下, 開始幻想在海外退休, 睇下海外物業。 無他, 有好多地方既生活指數都係好低, 你將手上香港既物業加按, 放租, 第二個地方買個物業, 平平地咁生活落去。當然, 呢個只係好初步既睇法, 真係要轉地方仲有好多野要考慮。而二當家都考慮緊公司有冇機會轉到去上海工作, 二當家並唔係乜野專業人仕, 要RELOCATE 唔係咁易, 就算公司安排都未會有 EXPAT PACKAGE。咁點解仲想轉? 因為係香港真係睇唔到咩希望, 咁多年黎都係炒樓炒樓同炒樓, 政府政黨政棍一齊賣走香港, 地產霸權將你既所有生活洗費用賺盡, 無實業, 網上係仲有好多機會, 但要成功China Market 一定不可缺, 如果有一日沒中國旅客黎香港會點? 與其日日屌中國乜乜七七, 不如上去睇真D, 真係唔鐘意咪走囉, 97前大把人移民走, 到最後拎到個PR咪又係回流打工, 人最緊要係有得選擇……….我想。

此乃圍爐取暖, 沒智慧的交談, 不喜勿屌。