投資日誌 - 海水退潮就知道誰沒穿褲子游泳

 

此文目的為自我反省, 並非要挪揄任何人

最近勁多鋪王唔掂, 又再一次應驗畢老既「海水退潮就知道誰沒穿褲子游泳」。二當家非畢老死粉, 但佢D 金句係我諗唔係死忠粉都聽過。

如果要「覆盤」, 究竟D 鋪係幾時開始唔掂呢。二當家找回自己的文章, 原來 2017 年已經寫到尖沙咀勁多吉鋪 「二當家的理財日誌: 投資組合 2017/08/31 + 恆指 279XX 當下心情」, 有吉鋪唔代表會跌, 只係代表左一個現象, 根據下面李生所講, 真正既 turning point 係 2024年既通關後。 咁即係代表d 乜, 某程度上講你見到既現象同現實係會有出入, 有陣時你睇到某D現象而推斷既結果, 往往未必即刻出現, 只有不斷地觀察, 反思, 至會搵到多一D 既線索。 

當然, 宜家再睇番轉頭, 其實最主要既數字並唔係出租率/空置率, 而係利息。 利息既增加係由 2022年~2023年 年直線上升,  當然市場上既人都賭幾樣野, 自由行, 經濟復甦, 及「高息不能長時間維持」, 我諗到今日都仲有好多人講好快就減息, 但要 time the market 何其難。成年事又令二當家聯想到 Starman 的 "Leveraging today is to achieve deleveraging tomorrow" Starman 投資世界 : 槓桿的意義, 雖然 Starman 已經無乜寫blog, 最多有時係 fb 到寫兩句, 但今日睇番, 其實講既野好有前曕性。

市場有 cycle, 一生人中終會遇到市場上既大上大落, 「站在風口上，豬都會飛」, 順勢而行永遠都係最易, 但要管理好風險, 尤其係現金流。 太保守, 如二當家, 市場大升無你份, 但求保本不求發達。但做大茶飯既想法係完全不一樣, 就算今日我地笑x 人連蝕十間鋪, 但人地買個單位 5800 萬, 我諗大部人一世都未必搵/借到呢個錢。 而且果班大孖沙, 就算點破產都好, 我心信佢地收埋既仲夠佢地正常開心咁生活過世, 雖然未必日日魚翅撈飯, 但至少衣食無休。就算今時今日破產又如何, 咸魚番生既人大有一在。

而下面既訪問, 大部份既點我都唔認同阿李生, 但有樣野係要學既, 就係「正向」。呢個同二當家既性格係完全不一樣。投資好講性格配合, 有D 人好 attention to details, 有d 人好正向, 有d人又好保守, 搵番一條o岩自己既路, 共勉之。

打工仔記事 - stakeholder management

 

二當家做緊果間公司, 最臭名遠播既就係人事關係, 皆因好多山頭好多大佬, 好多時都係面和心不和。

咁有幾多大佬呢, 周年飯局, 主家席都4圍, 4圍入面仲要有高低, 你唔認識人事關係真係死左都唔知咩事。簡單講下幾個例子:-

• 同一個EMAIL 同一個 CONTENT, 有陣時係唔可以 TO 晒呢班大佬, 因為佢地會覺得你唔尊重佢。有好多時都要分開SEND。OR 分別同佢地傾晒先至 SEND EMAIL.
  
  
• 拎 APPROVAL 都有分先後次序, 有陣某一D老闆會講, 你有我 APPROVAL 得啦, 點解仲要問另一個拎 APPROVAL? (大佬呀, 公司有 POLICY 架, 我話事架咩)
  
  
• POLICY 只係適用於大部份人, 4圍入面都只係有小數人(權力中心)可以特事特辦, out of 呢個小 GROUP, 話之你係大佬都被人「木查」正黎做
  
  
• 就算你 RESIGN, 都要先同「有關人事」先打點打點, 如果正式 ANNOUNCEMENT 出左而某一D人唔知 (而佢覺得要知), 咁佢就會小9氣, 正所謂, 凡事留一線, 日後好相見, 大部份人都唔想斷自己米路

除左呢D 人事野, 公司既政策有時都好正。 無端端又話要 CUT COST, 以前都會有原因, 即係疫情呀, 生意唔好呀, 今次即頭原因都唔俾, 請自行交數.......WTF.............

明明我身處一個有通脹既世界, 但係班大帝就好似住係天上面咁, 唔單止無通脹, 仲有通縮。做細既可以點, 慳D 囉, 但係你慳幾多都唔夠班大帝飛 B CLASS, 開支酒啦, 咪玩啦! 

無錯, 「肥上瘦下」至係真理 , 當你見到高層既分成, 你就知道D 錢去左邊。 雖然你知, 我知, 單眼佬都知, 但改變唔到規則就順住個勢行 (if you can't beat them join them)。

人, 有陣時係要自私D, work smart 幾時都緊要過 work hard, 你覺得唔公平姐, 老闆又有另一個睇法。呢一刻, 二當家要做一定唔被人炒既鹹魚, 不求有功, 但求無過。

學友台米兄講, 「榮譽歸於上司, 功勞歸於下屬, 人工歸於我!」