期權初體驗 (二) - 心魔

 

番工番到悶, 又上黎寫文自娛一下。

話說做左第一張 SP 700@540後, 唔夠兩日就穿者, 之後二當家又貪心地開多張 SP 700@520, 咁做當然係有風險, 再插的話要接晒2張既貨, 雖然錢係有, 但心態上都係緊張。反問自己, 接左貨怕唔怕, 定係最後又同自己講, 睇定D, close 晒 D SP 佢先再接。心魔既野每個人都有, 因為大家唔知咩係平, 咩係貴, 除非自己非常咁確信自己既估值能力及結果。即係阿里咁, 個個都話平, 值300蚊以上, 但係個價就係唔升, 一年唔升, 兩年唔升, 十年後阿里可能又變左做第二隻 941 又或者005。

呢兩日700又反彈, 上番 550以上, 又係到諗, 如果自己接左貨就好啦, 記得傻貓之前都有篇文, 講述到價後但又無得行駛, 睇住個價彈上去。的確, 二當家都有呢個感覺, 但做 SP 就係咁, 坐下坐下又一日, 開始明白點解D 人話期權, 有時係俾你係悶市中搵下野做, 打發下時間。

股票期權 (hkex.com.hk)

另外, 二當家係勁人谷到睇到各人討論 9988 期權, 至知道原來唔係隻隻股票期權都係一張一手, 例如 9988 咁就係一張 5手, 以後買賣既時候要更加小心, 因為 IB 既 preview 好多時都係只係睇到 margin impact , 但margin impact個 amount 唔係 full covered, 睇 Max loss 至係真正 full back up 需要既錢。二當家估 Margin 係預你唔接貨, 但如果接貨就要預足夠既錢。

例如: 一張 700@540 既 SP

Initial Impact  -  HK$11000

Maintenance Margin - HK$8800

Max Loss - HK$53400

期權初體驗 (一)

 

二當家其實學期權都有好幾年, 由皮老闆講開始聽, 坊間最多人推既係歐陽一心, 後來巴黎兄請左 CODY 兄又講左幾集, AC 兄亦有寫文分享, 但令二當家有行動既, 係傻貓同細胞師姐既分享。可能因為係同路人, 見到人地都勇敢去試, 加上手上有幾個錢, 就膽粗粗就去做左2 張 SP。

先謂自己對期權既認識, 其實讀大學果陣已經有學, 果時第一個諗法係, 邊個傻仔會咁ON9 做 SHORT SIDE, 賺有限而蝕無限。但聽過眾人分享之後, 至發覺 SHORT SIDE 是新手入門必經的階段。期權三式皮老闆已經講過無限次

 

有貨short call, 有錢short put, 唔好貪心 (要有 cover)

聽落好易, 但最難做到既就係「唔好貪心」, 因為違反人性。睇過好多不同既人既期權, 先唔好理複雜既期權策略, 最簡單既做 SC, 好多師兄亦建議新手先做 SC (假設全部都係 covered, 即係唔係賭白頭片), worst case 都係手上既股票升而你交出你手既貨, 就算睇錯市都係  Happy Mistake (賺少左)。

做 SP 就有兩種諗法, 第一種只係諗住收期權金, 唔諗住接貨, 第二種係真心唔介意接貨。二當家一開始係第二種諗法, 因為一直無 700 呢隻股, 所以想係低位接 700, 但今日既低位係明日既高位, 除非接得很安心, 否則唔好太老定, 因為低位可以更低。

第一張開既 SP 係 行駛價 @540, 點知中央收緊下, 話咁快就穿晒個行駛價。今日開第二張 @520, 收市價係 528 。暫時二當家都係學習中, 會睇定D 先, 但落場真係好唔同, 同之前剩係觀戰係完全兩樣野黎。

例如, 做完第一張期權後, 第一時間問自己點解唔做內銀, 因為接左貨又可以收息都幾爽 YY, 點知打開一睇, 期權D 回報低過700好多, 因為波幅低好多。如果唔貪心, 個個月收 0.7%, 一年都有 7 ~8%, 接左貨又可以當收息股咁坐。

暫時二當家既諗法就係咁, 新手上路, 邊學邊做, 各方高手歡迎指導一下。