Monday, September 27, 2021

打工仔記事 - 公司奴隸



二當家自己好鐘意呢個「打工仔記事」系列, 因為當大部份人都講緊被動收入, 收租, 創業外, 其實仲有一群人密密地打緊工, 儲緊第一筆資產。如果財自係目標, 打工可以係其中一種手段, 正如做生意一樣, 打工既目標都係賺越多既錢。當然, 創業最理想既係利用別人的時間黎搵錢, 打工仔只能用有限既時間賣錢, 但係做生意並非只賺不賠, 台灣有好多人都自稱係老闆, 成功既生意人唔係無, 但係更多既係到D 鋪頭執完又開, 開完又執, 開業半年未到就已經要倒閉。咸魚白菜, 各有所愛, 二當家係打工仔, 但自問以自己既知識, 做生意未必能大賺, 但要平手過活應該無問題。

以前打工, 見到D 高管拎住部「黑莓 Blackberry」好威威豬, 又成日出 Trip, 埋頭苦幹咁對住部「黑莓」, 用個細到不得了既鍵盤打字, 覺得好 Charm 呀! 後來好多公司都轉投 Iphone, 大當家應該仲記得炒 Iphone 時代, 被公司分佈到部 Iphone 係身份同權力既象徵。宜家睇番轉頭梗係好傻豬, 但如果唔係打工, 相信有D 地方我成世人都應該唔會有機會去, 亦都未必了解到成個商業運作模式。

作為公司, 用一部 IPHONE 既錢就換到你既額外工作時間, 24HR 隨傳隨到, 其實真係平到笑。後期少少, 大部份公司都由 Desktop 轉去 Laptop, 大家可以帶工作回家, 再無籍口唔夠時間做。再近期D, 隨住不同既技術創新, 近幾年既企業不單單想操控你既私人時間, 甚至係操控埋你既資源同社交。



就二當家自身為例, 雲端已經成為常態, 最常用既電郵, 由 Lotus Note, 轉 Outlook, Outlook 垃圾既 Web Mail, 到好多公司都直用 Gmail。Anywhere, Anytime 都要睇 Email 已經成常態。Microsoft 365 入面, 最令我討厭既係 Yammer 同 Teams。 討厭既原因並非係唔好用, 而係太好用, 好用到有D 煩。

先講 Yammer, 簡單介紹就係公司版 Facebook, 如果你既 FB 入面有做保險既朋友, 可能你都對「正面撚」心存反感, 日日拎獎, 做運動, 裝備自己, 達標, 賣保險係為左幫助朋友等等。而 Yammer 就係公司內部平台, 令到不同人將自己既「豐功偉績」係公司內部分享。亦有人開設不同主題既小群組, 組成「興趣班」, 例如 Data Community, Anti Money Laundering, 等, 分享自己既 Project, 如果其他地方既同事有興趣既就可以「抄考」。以前, 公司多用 Workshop / Townhall 既型式, 即係一班高管聚埋一齊, 分享自己一年黎既成就 (當然係下面D人做, 佢負責 Present), 再傾下下年既 Target。宜家有 Yammer 後, 個個都分享得, 高管當然繼續要用心分享, 增加曝光率, 但非高管都會有活躍分子, 希望自己既 achievement 俾有心人睇見。公司點解咁鼓勵分享, 都係人性問題, 利用「競爭」心態促進進步, 否則個個都躺平仲邊會進步? 但你問我, 大家分享成功例子, 有幾多成真, 有多成假? 誰知道。 又再再者, 當老闆見到人地D 正野, 叫你跟住做, 之後你同佢解釋, 系統/資金/知識問題所以 copy 唔到個 project, 所有既問題都會變成你既問題。就算你去跟個分享者攞相關資料, 你估又會真係好多人真心分享俾你, 公司唔鐘意山頭主義, 但山頭主義才是企業的核心, 亦是人性。

而 Teams 相信好多人都知係咩黎, 集合左雲端/社交/通訊等等既混合體。你可以放不同類型既檔案係 Teams (Cloud), 其他組內既人可以一齊 Edit, 亦有 backup 功能, 組內有 Chat 功能, 亦有 announcement, 甚至可以安裝唔到既 APP/ extensions, 來達至不同既功能 (例如 project planing), 為怪獸級既軟體。就係因為太好用, 太多 feature, 所以至煩, 例如有D 粉樣係個 excel 到係咁 cue 你 update 某個 excel 入面某個 cell, 又或是留低 comment 但 tag 左你, 二當家都唔知係預設值定係點, 每次都會收到電郵通知有人 cue 左我個名。另外就係 assigned task, 好多時明明唔係我做, 但都被人放左落 assigned task 到, 情況就如被放入 CC, 但係 assigned task 又會 generate email, 剩係清呢D 咁既垃圾 email 就已經煩死。


公司最近同 Linkedin Learning 合作, 又大搞 self-learning. 而 Linkedin 亦都係 Microsoft 其下既企業, 將 social / marketing/ job hunting 等 mix 埋一齊既網站。以前二當家自學可以用 Coursera, 宜家 Linkedin 收購左 Lynda 後連呢部份都做埋。疫情下, 公司剩左落黎既 Training Budget, 又要搵有名氣既online 課程, 姣婆遇著脂粉客, 兩者一拍即合。本身自學呢樣野我真係無乜 comment, 公司俾錢我學野, 二當家開心都黎唔切。但係公司又點會咁易放過你, KPI 文化下, self-learning 就 active join 變成 passive join, 被要求達至一定時數既學習時數/目標。 二當家都係到諗, self-learning 係指自我學習, 定係自發性學習? 為左達標既學習又是否有意義? 但無論點都好, 完成左既 cert, 再 share 係 linkedin 到, 一定會有人 like 同 實扑你, 二當家係 Linkedin 既 Like 數, 仲多過自己既 FB。你可以幻想下, 係 Linkedin 到每個人都係保險從業員, 個個都非常正面同主動, 因為呢個係世界想睇到既面相。

Linkedin 除左呃 Like, 仲係搵工既好地方 (至少聽聞係咁), 而新世代既畢業生好多已經有將 Linkedin 貼金既能力, 懂得將一D Key words 同 Key skills 放係Linkedin 內, 明明係 Interim 身份, 但工作內容就講到 manager grading 既工作咁, 呢類例子比比皆是。 二當家身為打工仔, 亦要玩呢類唔鐘意玩既遊戲, 但自己都有自己既宗旨 - 「希望盡量不打擾同事既私人時間」。打工仔有 1/3 時間係辦公室, 有D 工種甚至去到每天 12~13 小時, 下班後仲要服務公司? 二當家自己就幸運D, 仲可以係工作時間內做下私人事, 睇下 Blog, 學習下新知識, 希望有日終能換回自由身。

Thursday, September 23, 2021

前人種樹,後人乘涼 (五)

 


好耐無 update 過呢個系列, 話說二當家去台灣前利用家人買樓既機會, 用大當家當時既收入黎做左按揭, 套左兩舊出黎, 放入定息產品。市場升升跌跌, 好難話最後個計劃係成功定失敗 (應該都係失敗多😞), 但二當家就一面收息, 一面去還按揭 (型D既可以叫去槓桿 deleverage)。

最近家人又打黎, 話宜家住緊果度麻麻地, 又想換樓, 仲睇緊樓, 問我地如果換樓, 按揭果到有冇問題。老實講, 二當家都預左有呢一日, 因為家人就係成日覺得自己幾百萬未開頭, 我同家人講, 你要買放心去買, 錢我地搞得掂, 我差在未講我借財仔都會還晒D 按揭。

家人再買樓, 二當家就要硬掘番兩舊出黎, 而且無法再用同一招, 因為我同大當家都身在台灣。 再者, 大當家都無收入。二當家既係海外收入, 做按揭更麻煩, 人又番唔到香港, 簽個字都唔得。又再再者, 假若我真係番香港, 到時自己都要買樓, 無理由用左自己既信貸額。

二當家望望自己戶口, 辛苦D 嘔番兩舊出黎都唔係唔得既, 最怕係突然要姐, 籌備要D時間, 家人宜家叫提早通知, 算係咁啦。但二當家再諗諗, 唔對路WO, 家人又話已經睇緊樓? 但我去台灣都未夠 3年, 3年內換樓要先俾 SSD wo。再加上, 舊錢又唔係大, 家人又無能力上會 (退休人士), 最多都係貴賣貴買, 中間仲有洗費, 我當傭金 1%, SSD 10%, 未計雜費, 4百萬既樓都要 40幾樓支出, 就算係先買後賣可以 exempt, 3% 既 stamp duty 都要俾, 都成 12萬啦。

二當家身在台灣, 好耐無跟香港D 政策, 好心提提家人要 check 清楚, 唔好想買就簽, 同我地商量下先, 再者要確定

一. 要夠3年至可以賣, 否則要俾 SSD (先付後免) 
二. 要先賣後買, 否則 cash flow 可能會有問題 (二當家知家人身上無錢)
三. 買樓係有洗費, 400萬賣, 無額外既資金, 再買可能只買到 380 萬既樓

講者無心, 聽者有意。 二當家自問「我心可照日月」, 但老人家卻又以為我資金有問題, 我都廢事解釋太多, 有陣時人就係鐘意聽外人既說話, 外親有借無還就話我地唔識「人情世顧」, 好心提醒又以為我百般刁難。但點都好, 二當家做左要做既事, 離3年仲有少少時間, 係時候睇下個戶口, 準備還錢。

Thursday, September 16, 2021

Don't Fight the Fed ....and...

廢 UP 文😋

近日市場大起大落, 相信大家都知道二當家講緊咩, 由內房, 滴滴, 網絡, 雲空間, 教育, 北京交易所, 到賭牌問題等, 新聞上日日新鮮日日金, 過往價投所著重既 MOAT, 一夜間就好似被取消或取代左, 不熟國情既人究竟點投資好?

二當家無詳細既分析, 但各位相信或多或少都有睇過望上既分析員, 簡單黎講如果共富既指再分配及配合國策, 未來呢類型既新聞只會陸續有來。回想上年內房既 3條紅線, 令到融資更困難, 企業要加速賣地賣房還債, 玩 cash flow management, 個黑洞有幾大, 大家都唔知, 靠個信字, 呢個都係點解內銀, 內房等呢年幾都積弱, 年初華夏幸福爆, 近日就恆大日日上新聞, 內地政府有冇預到今日, 二當家相信有, 亦都係預計之內, 所以網上有人用「擠泡泡(squeeze the bubble)」形容內地既政策。

但內房既三條紅線後, 更多既「指導式」 政策下台 , 上網有 KOL 話用處不大, 因為只係影響到部份地區, 亦有人話掛牌 10萬/1米變成指導性5萬/1米, 令到買家百上加斤。內銀亦不願意借錢。

除非 in the market 既人, 否則作為「離岸」投資者, 大家都係聽消息就走, 寧願轉戰美國。「政治風險」到到都有, 要完全避免係無可能。但今次中國政府既強硬政策係嚇親好多人, 作為小投資者, 究竟應該接飛刀?

二當家無水晶球, 但如果只投資「股票」呢類產品 (即非衍生產品), 賺錢只可以靠「低買高賣」同「派息」, 咁股價既低同高都係相對既, 而企業能否活下來就係靠有冇「克服」既能力, 就拎疫情下既香港黎講, 企業都要靠「走位」, 線下唔得就線上, 唔變既企業最終可能難逃淘汰, 如果你相信企業既能力, 而非靠補貼/政策傾斜養命, 今次跌市可能的確係接貨時機。

到最後, 根據係「接飛刀」定 「入貨時機」, 每個人既定義唔同。 如果要根據國策去買, 那人口增加相關, 減炭排放, 運動相關, 電動車, 國產晶片等的確係更加 Juicy。 


Tuesday, September 14, 2021

1299 友邦估值: Rubbish in Rubbish Out


华金证券-友邦保险(1299.HK)泛亚寿险标杆--内地分改子、迎接新气象-210106.pdf (dfcfw.com)

在網上搵不同既分析,  見到內地有1299 既分析報告, 就打開黎望下

前半段都係講營運方面, 二當家唔熟所以無乜 comment

報告最後用 DDM 幫 1299 做估值, 個 assumption 真係睇到二當家眼到凸埋

Assumption

1st Phase EV Growth: 14% (2021~2025)

2nd Phase EV Growth: 10% (2026~2033)

2034 ~2053: EV 每年遞減 0.4%

2054: EV 續 2% 增長

固定分紅率 21%

//無風險收益率取香港十年期政府債收益率 0.779%(近十年來7以來貝塔值為 1.02,市場預期回報率取近十年恆生指數年化回報率 4.76%。//

Discount Rate: 0.779% + (4.76% *1.02) = 5.63%



永續果個 904.41 係來自原文,  二當家唔知佢點計, 二當家計到條數應該係

2053 EV * Growth Rate = 936.46 *102% = 955.2

2053 分紅= 2053 EV * 分紅率 21% 

= 955.2 * 21% = 200.6

貼現後 = 200.6 * ((1/1+R)^34) = 31.11

Perpetual Value = 31.11 / (R - G) 

= 31.11 / (5.63% - 2%) 

= 856.14 

原文計出黎既價值係 1959億美元, 而用二當家既永續價值, 則係 1911億美元

發行股數 121億股, USD /HKD 7.78

1959/121*7.78 = ~125

1911/121*7.78 = ~ 123

綜合得出,友邦的目標市值為 1959.46 億美元,按照 2020 年 12 月 31 日匯率結算,得 125.66港元/股,距 31 日收盤價尚有 27.51%空間。

綜上,我們認為投資者對友邦的信賴,很大程度上是對未來持續盈利的預期較強。尤其是在內地分改子之後,有望一掃近兩年新業務價值 NBV 增長的頹勢。目前(2021 年 1 月 6 日收盤價)公司對應 2020E P/EV 2.28x,首次覆蓋,給予買入-A 評級。 

上面係原文係總結, 二當家唔明要預計未來 30 年既增長得出來既估值有咩意思, 而且獲利空間只係 27.51%, 你話 200% 可能都仲會考慮下, 再加上當中既假設一D 都唔保守, 至少未來10年 1299 要達至 >10% 以上既成長率, 折現率只係 5.63%, 如果係咁, 簡簡單單用 P/EV 去估值咪仲方便, 擺明係 P/EV 太多, 夾硬屈條靚仔既數出黎。Rubbish In / Rubbish Out, 學識估值未必搵到大錢, 但至少減少被搵笨既機會。



Tuesday, September 7, 2021

敗走台灣 - Next move?


太耐無講過二當家既自己野, 襯有空發噏瘋。

二當家去台灣快兩年半有多, 當中喜多過悲, 活得自在左, 眼看香港被一步一步咁破壞, 生為香港人點都會於心不忍。去台灣後, 亦不斷同大當家有傾將來既問題, 二當家對將來係開放既, 始終係自己既 Career / Experience。如果無疫情, 相信番香港唔會係我考慮之列。


as of Sep 6


但係疫情下, 所以野又改變左, 首先同家人見面既機會真係少左好多。明明係一個半鐘頭既機程, 但宜家變左做 14 + 7 既隔離, 回台分分鐘又隔多 14日, 暫時都仲未見到香港有開放既跡象。現時西方世界同亞洲有截然不同既處理方式, 西方以提高疫苗接種率後開放, 而亞洲國家暫時未見有跟隨, 其中一個原因是接種率問題, 亞洲暫時接種率最高既係新加坡81%/79% (首支/兩支), 作為香港主要假想敵, 新加坡以高效率獲得疫苗, 而本身都係強權政府, 所以打唔打疫苗都唔到你揀。而中國接種率都跟隨其後, 有77%/64%之高, 而其他亞洲各國則面對不同問題, 例如台灣, 疫苗不足既問題嚴重, 雖然已經陸陸續續有疫苗到台, 但接種率還是略慢 44%/4%。

未來會係點? 無人講得埋, 但新加坡已經由「清零」轉去「與病毒共存」, 呢個政策會否影響其它亞洲各國既政策? 二當家覺得未必會, 至少中國唔會咁快跟, 況且, 病毒會否再度變種都係未知知數。半鎖國狀態下, 正好配合「兩循環」, 由「工業大國」變身做「消費大國」, 但近來又吹呢個「全過程民主 」同「共同富裕」, 政策既野快到跟唔切, 怪不得外資都話唔玩。但肥肉在前, 不食白不食, 二當家深信老外們唔會就咁罷休, 只係等時機...有好多人覺得西方一定好, 中國一定唔好, 二當家自認牆頭草, 世界如果係非黑即白就好, 可惜既係兩邊都有好有唔好, 烏托邦只在腦中存在。

說回二當家, 合約期將完, 同大當家傾過, 又同老闆摸摸低, 放放風, 未來都高機率番香港, 點解個個都走仲番香港? 其一, 二當家無小朋友, 唔怕洗腦, 二. 家人朋友都係香港, 如果未來兩三年都仲要咁隔離法, 有D咩事就後悔一世 (「愚」家思想😔) 三. 多人離開, 內部高階職位多左空缺, 以前西人霸晒D Key position, 宜家要搵人填, 搵生不如搵熟, 就算 offer 唔得, 係香港再搵過第二份工都易D。 四. 台灣無永居權 五. 最重要個點, 大當家想番香港😄。Happy Wife, Happe Life! 同投資一樣, 最緊要係知道自己做緊乜就得。 



Foreign businesses threaten to quit Hong Kong over strict quarantine rules | Financial Times (ft.com)

Relocation of top luxury brands’ regional headquarters to China likely to weigh further on Hong Kong office rents | South China Morning Post (scmp.com)

VF Corp to relocate business operations out of Hong Kong - Inside Retail

回香港風險唔係無, 其中一樣就係外資撤港, 其實由社運開始一直都有風聲吹緊撤港, 但爛船都有三分釘, 香港差極都有佢好既地方。就算撤, 都多數係將個 Regional Office 搬離香港, 留低個 Local Office 係到。但撤去邊......一係中國, 一係新加坡, 如果以 business size 黎睇, 中國既 business 係好多外資公司都差不多佔 > 50%, 一個係新加坡既 Regional Office 係唔係可以支援到國內既生意呢? 況且國情既野, 新加報人又對中國有幾熟呢? 呢D咁高階既問題都係留番俾班董事決定。 

未來係點, 暫時未知, 但有時間 FF 下都係小確幸既一種, 期待下次再 update 大家。


Wednesday, September 1, 2021

投資日誌 - 2021-08-31

 YTD NAV +4.7%

  • 2020年出文53篇, 但在今年7 月份已經出文 13篇, 8月份出文 17篇, 這份傻勁唔知可以維持幾耐
  • 點解出咁多文? 因為二當家知道自己懶, 又成日唔明扮明, 所以至出文寫, 俾自己壓力, 盡量睇多D年報, 理解公司多D, 信心是來自於做左幾多功課
  • 生吞左唐朝三本書, <手把手 1 及 2>, <價值投資實戰手冊> ,當中<手把手2> 其實係可以 skip, 因為主力講內銀, 泛用性效低
  • 勁人谷2 有推介書單
    • 呢三本買左三本實體書, 未來將會睇, 既 <當代投資大師的估值課>, <巴菲特寫給股東的信>, <為什麼現金比獲利更重要>
    • 網上睇左 <財報就像一本兵法書> <大會計師教你從財報數字看懂經營本質> , 呢兩本書唔似一般工具書, 反而真係從經營角度去分析財務報表, 書中係將同一行業既公司財務報表放埋一齊睇, 再去思考公司既競爭力。此類書是更高階的思考😵, 例如我分析平保, 係應該將中人壽, 平保, 新華, AIA 等等既公司放係一個天秤到量, 要做呢個動作, 至少要知公司既競爭者是誰, 及做大量功課。當然, 無一間公司係完全一樣, 做成個產業鏈 (橫向及垂直)既分析並不是容易的事。呢兩本書暫時快過了一輪, 老實講吸收唔到幾多, 遲D要再睇多次。
  • 做平保分析果陣, 見到鍾記都有分析過中國人壽, 諗起價投人既惡夢
  • 投資方面, 以為今個月會差到 PK, 因為手上有 9988 同 700, 多得隻 TSM 月底發力升左 5%, 叫做頂得下
  • 暫時二當家會離場一陣思考一下未會應該點買, 買D咩