海外工作? 留港工作?

小弟近來為了自己的工作事宜煩惱, 本身自己係一間跨國公司到做, 宜家個 ROLE 係REGIONAL ROLE, 但其實唔多OPERATION 野近。我個鬼佬上司同我講要再上, LOCAL OPERATION EXPERIENCE 係好重要, 本身我已經REJECT 左一次, 但係近來因為幾樣野又再考慮番呢樣野。

如果早幾年有咁既機會, 我可能孑然一身就走左去。但係宜家已經有自己個家庭, 雖然未有小朋友, 但都打算會有。加上要考慮大當家既感受, 去到一個陌生既地方, 如果言語不通都幾慘。另一方面要考慮既就係家人, 唔知係唔係香港人既特質,都係特別鐘意痴住屋企, 好似我同阿大當家講話第時買樓會考慮邊區,其實好多時都係盡量靠近父母, 30MINS內到就最好, 宜家你叫阿大當家離鄉背井,近極都要2,3個鐘飛機,遠既分分鐘10個8個鐘頭機程。

另外就係如果有小朋友, 你想俾一個咩既生活環境佢,我自己都諗左好耐香港係唔係一個好既地方呢? 如果我地住係另外一個既地方會否更好呢?

而小弟點解會咁認真去考慮呢個問題, 有好多大部份既原因係近來香港的氛圍真係麻麻, 又雨傘運動開始,D人既諗法越黎越激進, 樓價又越黎越高, 最慘係法治變差。而公司又有個咁既機會俾到我, 對我既CAREER PATH 亦都有正面既影響, 所以今次至會再認真考慮。

係一個新環境到生活, 唔代表會更好, 尤其係你未真正係果到生活過, 我當初都有考慮過去‏台灣, 但係對於咩都講效率既香港人黎講係唔係真係適應到?

考慮過既國家/城市

1. 上海, 新加坡, 台灣

2. 瑞士, 法國, 澳洲, 日本, 韓國

唔知大家又會唔會考慮到海外工作呢?