初五啟市!

二當家祝各位身體健康, 笑口常開, 來年搵多D!

身體健康係最緊要, O係流感高峰期, 日日都聽到身邊D同事既小朋友病, 之後連D同事都病埋, 小則病幾日, 大則病幾個月都未好, 身邊既人咳聲不斷, 希望大家小病小福, 小病過後就身體健康。

身體之外就係要開心, 香港人唔開心, 好多怨氣, 由「政治, 工作, 買樓」等都充滿怨氣。有陣時見到一D落後既地方既人好開心, 會諗究竟點解會咁? 其實到最後都係因為「感恩」兩隻字。當你為滿足於身邊擁有既事, 例如自由,財富等, 個人自然開心, 呢樣野二當家自己都要學。雖然一定有人話好「犬儒主義」, 但社會上有陣時係需要「穩定」, 有好多人聽到「維穩」就怕怕, 但二當家覺我「維穩」沒有錯, 錯就錯在手法上的問題。當人人有屋住, 有份工, 社會自然比較「穩定」, 而社會「穩定」點都俾社會「動盪」好。

錢 - 個個都想搵多D, 其實搵幾多至夠?
要控制自己的慾望, 勿被「物慾」佔據自己。而香港人最高既消費一係係住宿開支, 要人工追上樓價近乎係無可能既事, 亦都唔好期望政府會幫助未上車既人....... 今時今日400萬樓下既盤好有限, 二當家都要好好考慮下係唔係 ALL IN 一層樓。

初二果陣二當家番左去觀瀾, 見到果到既的士有好多已經轉左做電動, 品牌當然係 BYD。消費用支付寶是常識吧! 但最令二當家出奇既係, 過馬路果陣竟然係車讓人, 中國真的不停在進步, 不單是硬實力, 連軟實力也在進步,  香港人再不加油的話看來只能做三線城市。

香港人加油!!!