近況 (八)

如果用 Product Life Cycle 黎形容打疫苗, 我們應該還在 Early Growth 吧

轉眼又到年中, 台灣在5月中開始受到疫情打擊, 二當家簡簡單單的聊聊自己的近況。 

投資

在疫情下, 少睇左股票, 心都靜左落黎, 唔會下下都想買賣股票。可以唔睇住個市, 某程度上代表二當家對自己所選既股票都有一定信心 (定係鴕鳥政策😂), 市場上雜音太多, 如果下下將所有信息收為己用, 再係短時間內做決策, 犯錯的機會非常大。始終自己唔係內行人, 不如看遠一點, 看深一點。 繼續維持部份現金, 等待下個機會來臨。

生活

公司在疫情下開始了 WFH, 但二當家有一半時間還要在辦公室工作, 老實說, 我自己是比較享受在辦公室, 在家中最大的問題還是 setup 的問題, laptop 太細, 放係枱到, 頭向下望, 頸又痛, 手放上枱到肩又痛, 如果長時間在家工作的話二當家一定會弄一個更好的 setup。 在家工作, 私人的時間的確多了很多, 多了很多的時間大部份用來追劇, 追到一個地步覺得自己好廢, 繼而又重新思考人生, 在後面再談這個題目。

近日又有個同學身體又出毛病, 已經唔係第一個 fd 身體有事, 而且有既都係大事, 真係生死之間果隻。知道無事之後, 大家在 group chat 內互相問侯一下, 轉眼間, 原來大家都已經快四張, 再唔係十幾廿歲果陣。 男人四十, 應該係黃金時間, 但一場大病, 可能令到好多野都改變晒, 生活習慣改變, 不能再亂飲亂食, 甚至不能完全恢復體能狀態。二當家又再一次感受到生命既脆弱。 

工作

工作上, 長遠黎講應該唔會留係台灣。在個人黎講, 二當家是非常享受在台灣生活, 但如果二當家繼續打工的話, 係無辦法拎到長期居留証, 所以我永遠在台灣的身份也是一名「有限期的工作簽証」。在工作黎講, 台灣算係一個小市場, 在大陸不斷邊緣化下, 事業的發展也受到很大的限制。再加上同大當家傾過後, 如果要搵番一個正常既 social life, 番香港可能係最好既方案(人棄我取)。

如果有機會 relocate 的話, 二當家自己是 Open 的, 但每次 relocate 都唔係一個人的事, 在疫情下, 更令到 relocate 既難度直線上升, 每次回鄉都要隔離2星期, 未來又未知是否要有「疫苗護照」才能出境? 如果是的話, 台灣本土的疫苗能作證明嗎? 有太多太多的不明朗因素要好好考慮一下。

創業

之前搵左一間本土公司做了一個 Prototype, 終於完成了........花了整整一年時間, 效果........其實都幾差。首先係 budget 問題, 所以今次搵左一個業餘團體去做, 功能上是可以接受, 但外觀上差太遠, 而且好快就脫期, 原本3~4個月既 project 用左超過半年至交到貨, 測試後再 back and forth 一段時間, 我都唔想再花時間係呢個供應商到, 暫時告一段落。

前陣子又睇到個 competitor 既 solution, 人地拎個完整既方案出黎, 雖然唔係完美, 但自己手上既 prototype 實在同人地差太遠, 天同地比, 暫時都係繼續留意下個客既動向, 睇下佢地想點先再決定下一步。

興趣

我今年的目標是學鋼琴, 但今天的我又打倒了昨日的我。二當家今年把目標, 放回一樣已經學了幾年的樂器。原因是覺得自己應該專攻一樣東西, 唔想每一樣野都係得半桶水, 想再係呢樣學器上再進一層, 深造落去。有呢個想法, 係因為有日二當家問自己有咩專長, 最後發覺自己乜都係半桶水。 

感悟

下面係幾點呢期人生既感悟...

利得者疑

二當家越黎越討厭傳媒及政治, 因為大家都唔係討論問題, 而係互拖後腿。其中一個最大問題係無限上槓陰謀論, 最簡單既方法就係用「利得者疑」去方法去猜度人心, 例如推出一個法案, 大家唔係考慮呢個法案對社會帶來D 咩係好處同壞處, 而係先從可以從中獲利者去推論背後陰謀, 只有我非獲利者, 或者我覺我某人不應該獲利, 便寧願拖垮整個法案也不妥協。傳媒也是用這個方法去報導新聞, 有否證據已經不重要, 傳媒只是提出單方面既「質疑」。 不過講到尾, 都係一個「信任」問題, 人而無信而不立........

被害者理論

除了利得者疑, 另一常用方法就是用當「永遠的被害者」。例如台灣疫情, 二百幾天 0 確診後爆發, 突然發覺疫苗唔夠, 部份傳媒就大大力插政府無超前部署。呢D 咁既 bull shit 就好似係公司到見到個老屎忽同你講 「一早話左你架啦」咁難聽, 呢D 無養份無內容, 對事情無幫助既新聞但往往最受讀者認同, 因為千錯萬錯, 都係錯左政府, 市民唔載口罩唔係錯, 有自費疫苗又無人打都唔係錯, 只要永遠代表被害者論歪理, 就能立自己於不敗之地, 因為無人鐘意承認自己做錯。

以有岸除無涯

「以有岸除無涯」係講對知識既追求, 但今時今日用來講娛樂也行得通, 以有限的時間追無限的娛樂。在 WFH 期內, 在家中打開 netflix, youtube 同 ps4, 真係有3世都唔完既娛樂。最近爆左兩隻 game, 總遊玩時間係百幾個鐘, 加埋自己追過既劇同電影, 花既時間就更多, 二當家有時會反問自己, 如果用呢類時間黎學習, 又或專心一意去做件事, 我既人生是否會有更大既改變, 而唔係拎到一隻虛擬的白金盃。呢個就係想專攻一樣樂器既原因, 希望在某個項目上更上一層樓, 雖然唔知今次可以堅持幾耐。

疫苗與歐國盃

最後想講講香港朋友打疫苗既情況, 部份朋友已經打左兩針, side effect當然有, 但so far大家都平安。在後疫情時間, 政商合壁, carrot & stick 乜都出齊要推打針, 因為要經濟回復正常好大程度取決於接種率。由數據來看, 接種後加大了抗病毒能力, 及大大減低死亡率。接種疫苗當然也有風險, 但由於好難去 correlate 死亡同接種疫苗是否有關聯關係, 相信只有科學家才可以證實。以死亡率去計, 接種疫苗後既死亡率遠低於染病後既死亡率。各人有各人既考慮, 有人唔介意宅在家, 唔出國, 唔參加多人派對, 咁的確無乜誘因去打疫苗。二當家自己最大concern 後打疫苗後可以縮短幾多隔離時間, 外國又接受邊D 疫苗。最近開始左歐國盃, 已經有現場觀眾, 仲唔駛載罩, 好似真係曙光. 

接種機率 100% x 接種後死亡率 VS 染病機率 X 染病後死亡率 2~3%