知識改變命運？

常言道知識改變命運， 以前自己都唔信，但慶幸自己兩年前決定寫呢個blog,  認識到一班喺投資界嘅高手。

當初寫blog嘅心態係想記錄低自己喺股票上面嘅買賣，做番一個記錄。當中除咗股票外，亦學到好多其他嘅投資產品，例如風兄講嘅債券 或者ETD等。

記得上年開始二當家考慮緊兩個問題

一係移民， 由想移民開始，到幫大當家做一啲心理輔導，冇諗到喺半年之後真係有呢個機會，而家只差 一紙合約， 相信好快就會喺台灣繼續生活。

二就係諗點樣增加資產規模。由於自已無樓無生意，要變錢出嚟唔易，多得友人提醒"環境唔轉,自己要轉",二當家開始循幾個方向諗。

一開始係打自己屋企嗰層未補地價嘅居屋嘅念頭。未補地價居屋基本上係唔會賣，最多都係先補地價再按夠錢出嚟，未見官先打八十，所以到最後放棄咗呢個諗法。

之後就一次機會之下得知近親會再買樓，所以就有借層樓黎按嘅諗法。 二當家原本諗住打定輸數，因為一直都冇消息。點知尋日突然間接到個電話個親戚已經簽咗臨時買賣合約，真係高呼一句，"機會又嚟喇, 飛雲!"。

經過仔細考慮之後, 決定用大當家嘅個人收入嚟做按揭。因為去到台灣之後其實大當家可能冇咗收入證明，如果真係第時再係香港置業會有困難。如果借得太多，過咗佢收入嘅壓力測試嘅上限，就要搵我做擔保人，又或者直接由我造一個借貸人。喺呢兩個情況下，喺未來再買樓嘅時候按揭上都會有所影響。

而且我哋又唔係真係好等錢洗呀，只不過覺得full pay 黎買樓好浪廢，不如我哋借咗嚟賺少少息差，所以到最後決定只借200萬，每月還7-8000，還得舒服又安心。

如果台灣嗰部分真係完成咗合約, 強積金嗰度仲可以拎返大概五六十萬，加埋手上嘅嗰150萬，咁我哋兩個嘅資產就可以達到四百萬左右。就算真係加息，月還一皮都應該會輕鬆。

我地兩公婆個目標好細，見到宜家一步一步咁越黎越近自已嘅目標，過程真係又緊張又興奮。希望一切順利！