2020年, 空白的一年

投資

2020年過得很快, 3月時的股災還像昨日的事, 熔斷, 負油價, 每天都是新的負面消息。二當家的靈感是會強力反彈, 可惜滿手是貨。 2019年的現金流組合成了重災區, 二當家一開始唔肯斷纜, 慢慢損害加深, 看到很多前輩都斬斷重練才知道自己已錯過最佳時機。年頭炒得熱烘烘的物管股, 年尾竟然回一半, 二當家諗極都諗唔明原因。有人說市場/錢是理性, 但二當家覺得市場是感性主導, 升時找個原因, 跌時也可以隨便找個原因。

在最差的時候, 二當家的組合是 -30%, 說不驚是騙人的, 尤其手上的債券並非優秀的, 隨時會有破產的可能, 在低位把組合重整, 慢慢收復失地, 最後二當家的組合是 -2.8%, 算是力保不失了, 優秀當然說不上, 但上了寶貴的一課, 明白到一招到老是不行的 (其實並非不行, 但自問懶, 功力又未夠)。投資表現年年都係咁, 睇黎要俾個時限自己, 真係唔得就要放棄。

工作

工作上尚算順利, 在環球經濟咁差既情況下, 公司雖然有凍薪, 但都攞得番部份花紅。要再晉升不容易, 學歷上, 人際關係上, 手腕上都再再加把勁, 時機更是非常重要。未來一年大方向已定, 多一事不如小一事, 靜觀其變。

小生意

拖左一年既小生意終於有小小進展, 但一年後信心減弱。原因好簡單, 經濟差, 公司唔肯俾錢, 雖然我會繼續做落去, 但點 sell 仲未諗點。

在台灣, 同大當家傾左好多次搞唔搞投資移民, 始終放 150萬去搞壇野唔係易事, 仲要請人。 自己有份工係身又無乜諗法, 拖拖下又無左件事。當然, BNO 既放寬亦都令港人多左選擇, 台灣並非唯一出路。

在2020年, 大當家竟然有做生意既念頭, 二當家其實係 200% 既 support, 因為如果佢可以獨立 run 到一盤生意, 二當家就可以有更多既自由去做自己既野😋。 非常希望佢單野可以 run 得成, 賺錢都係其次, 但 go through 成個 process 已經可以學到好多野。

人生大事

要做既都已經做過, 宜家只可以「相信一切是最好的安排」。

不得不說年紀漸大, 眼睛轉換焦距時, 未能對焦的時間漸增及會有模糊, 要book 個時間 check 下眼底。至於其他身體機能尚算可以。

興趣

上年說要重新 pick up 樂器, 成年都無做到, 失敗! 

今年我要學鋼琴, 決定了! 一定要做到!!!

樓&錢

繼續做我的無殼鍋牛。

錢還叫夠, 有考慮在台灣買個小單位, 但台灣的樓價著實不低, 為買而買是否值得? 

2020年的總結, 是做得不好, 頂多算是 partial meet expectation👎, 說要研究股票, 最終又係跟風買的多, 手上多個項目都拖了又拖, 唯一慶幸的是讀了幾本好書, 自己對世界的看法又有多一點理解。二當家在2020年的文章多為心理思考的文章, 但太理性在投資上是沒有好處的, 股市上的大升大落都係由情緒主導, 這是一個資金充裕的時代, 這是一個炒作「夢想」的時代。