近況 (九) - 虎年快樂! 身體健康! 心想事成! 生活愉快!

生活

在台灣, 今年的年假特別長, 前後總共9天。因為疫情的影響, 今年決定暫不回港。番香港要酒店隔離, 番台灣又要隔離, 一來一回3~4萬港紙走唔甩, 而且困係精神時間屋內, 想唔癲都幾難。

朋友問我新一年的計劃, 老實說乜計劃都無, 講好聽一點叫做「隨遇而安」。唔單止新一年, 連過年我地都無計劃, 原本想在假期做多D運動, 出去行下山, 點知9日假期落早8日雨, 原本諗住兩丁友係屋企煲劇打機, 點知最後又日日都有聚會, 再多既安排都係無用, 有時讓自己空閒一點, 新事情突然會出現。

O岩O岩睇到新聞, 香港疫情又創新高, 六百多單確診, 疫情的終點仍是否遙遙無期, 估計開關更難。在台灣, 新年前二當家都係每日睇實新聞, 因為怕隨時升至第三級, 最終台灣政府維持在第二級警戒, 大家才可以開心過年。未來疫情會否在台灣大規模爆發, 二當家相信會有很大既機會, 但願二當家是錯的。

投資

投資方面, 美市來個下殺, FB (META) 一日跌左 2X%, 現價好吸引, 其他美股都非常敏感, 一個唔覺意又 -1X%。 雖然係咁, 但二當家煩緊還按揭, <前人種樹>, 新年又同親戚傾左電話, 真係越傾越氣, 親戚果種好似幾百萬未開頭既想法真係好奇怪, 未夠3年已經想放盤, 提佢又好似阻仍發達咁, 實情係佢手上既錢根本唔夠買到佢既心頭好, 再者, 買樓每次都有開銷, 搬屋, 律師費, 厘印一定走唔甩。當初已經係親戚最後一層樓, 估唔到話咁快又話換樓。

二當家再三想想, 自己怕麻煩, 所以想盡快係3年期滿前解決左按揭既事, 到時親戚想點賣, 點買, 俾DSD, BSD 都係別人的事。



工作

工作上都係咁, 來台快第3年, 有機會回港, 有機會升職, 但呢個有機會都令二當家諗多好多野, 因為習慣了台灣的生活質素, 點港又要重新面對以前的問題, 但始終家人全都在香港, 新年期間, 已經有不同既家人問我地今年既去向, 好明顯佢地都 count 住我地係台灣既時間。亦有親戚在香港入院, 二當家真係覺得非常無奈, 明明香港同台灣只係 1.5HR 既飛機, 宜家搞到這麼近, 那麼遠。而且, 離港的朋友越黎越多, 有時真係反問自己番香港是否一個合適既決定, 但都唔敢諗咁多, 因為家家有本難念的經, 去到外國不一定好, 番香港不一定差, 所以二當家還是「隨遇而安」。



身體

將近4字頭, 身邊的朋友越來越多出現身體既問題, 輕則影響升遷機會, 重則影響生理表現。託賴, 二當家仲行得走得, 身體並沒大礙, 但見到身邊既朋友一個一個咁大病小病咁, 都唔到我唔擔心。未來Keep 住至少一個星期打一次波, 可以的話就每日做下 plank, 拉下筋。每年做一次 body check, 飲食都要開始注意下。

思想

二當家成世人都靠自己, 所以思想上有自己偏執既地方。前陣子遇上一個 Life Coach, 二當家既個性既先懷疑, 所以對好多想法都係先拒絕。二當家對Life Coach既認知等於心理輔導, 但隨住自己有好多好多負面想法, 有時 Life Coach 又真係幫到你。Life Coach 其實並不會幫助到我解決問題, 只會提醒我唔好咁固執, 唔好咁執著, 先從一兩件小事做起, 再慢慢由小事改做大事。我並非 100% 相信我個 Coach 既想法, 但有外力去推自己放下某D 事情都係好既。可能到最後會發現, 放過既唔係別人, 而係自己。