給初心者: 二當家投資練功記 (上)

『練拳不練功，到老一場空』

這篇是分享給年青一代, 無咩投資經驗既人看的, 藉著二當家的錯誤經歷, 希望可以提供到一點指引。以下是二當家不斷睇 BLOG, 睇書後構成的一些想法, 同樣的想法已經有好多人寫過, 我只不過是用吸收左他人既想法, 再轉化為自己的想法。

投資本來就係「同枱食饭，各自修行」, 無話邊個嬴邊個輸, 最緊要就係達到你心中所想的目的。有人一個月收息十萬都唔夠, 有人一個月收一萬都過得好豐盛, 沒必要比較, 最緊要係活得瀟灑。

二當家以武功去比喻投資, 把投資分成四個階段, 在第四階段之後不是終結, 而是完成了一個周天, 再由第一階段開始不斷的巡迴去加強自身功力 (refine自己的 portfolio).

投資的四個階段

1. 累積資本 > 2. 資本增值 > 3. 資產配置 > 4. 建立現金流

第一階段: 累積資本

如果你有父幹, 有祖業基本上可以跳過。

累積資本來來去去都係果幾個方法, 開源, 節流, Income - expense = saving

自己做生意既就要提高純利/現金流, 打工既就提升薪金, 再唔得既就做下副業, 網上BUSINESS, 盡量搵多份收入, 因為洗費會隨著年齡增加, 有升無跌。

我明白好多初出茅蘆既年輕人會希望炒下股票, O係無乜資本既情況下利用股票去增大資本 (二當家都試過), 除非你真係好醒, 否則二當家不建議係無知識既情況下做小炒王。

資本/風險/回報呢三樣野有好奇妙既關係, 初心者好多時見人地好易咁賺錢就想賺埋一份, 希望利用有限既資產追求高回報既投資項目, 但又唔了解當中既風險所以最後一頭煙。最常見既情況係玩衍生工具(牛熊), 細價股等, 務求短時間內快速增加資本(升三四成至幾十倍), 可惜好多時都係賺頭蝕尾, 最後一鋪清。

至於資本多少才夠, 二當家建議先建立短期目標, 先以五萬為第一目標, 慢慢增加到十萬, 二十萬, 五十萬, 一百萬。五十萬為初成 (一手股票由幾千到十萬都有, 普遍藍籌都要二至四萬一手, 分散投資計, 10隻股票各2手, 便差不多50萬左右)。

係呢個階段, 忍唔到手既, 建議

月供 ETF, 股票等減低風險

第二階段:資本/資產增值

資本增值話難唔難, 話易唔易。最容易理解既就係 賣出價 > 買入價 = 資本增值

而一個初心者最容易得到既資本係你既知識, 因為知識係跟你一世既, 以投資知識計, 只要不斷咁睇相關既野 (BLOG, 書, 新聞等), 好快你就可以打好個底, 因為好多時同一件事, 每個人都有唔同睇法, 理解別人不同既論點會加快你學習既過程。另外就係人脈, 呢樣都係好重要既資本, 正所謂「識人好過識字」。

除左知識/人脈, 錢係最實際既資本(以購買力加流通性黎計), 但係錢係唔會生錢, 除非你放入定存 (零息年代下), 記住, 通脹會蠶食錢既購買力, 乜都唔做既話錢會越黎越唔見駛。而要令到資本增值, 通常都要經歷一個過程 - 就係將資本轉為資產。

資產最簡單易明既係解釋係有市場上有價值既野 (有市價/幫貨品增值/幫你搵到錢), 例如你買部車, 車可以係二手市場上賣出, 又或者用黎揸 UBER 搵錢, 所以可以當作資產。 

但如果你用錢去買左部大陸無牌子手機, 根本無二手市場, 你又唔可以手部電話黎搵錢, 咁二當家會介定為消費。問題黎, IPHONE 算唔算 ASSET 呢? 呢個情況下好睇你個人情況, 例如我做TRADING, 買入左10部IPHONE (GOODS), 再賣俾人賺差價/積分, 咁當然可以定義為資產。但如果你自己買一部自用, 無賣出既打算, 咁就唔算資產啦。

而資產係可以用唔同既型態下出現, 係香港最常見既係樓同股票, 但能否達到資本增值, 就要睇下不同資產既質素同特質及市場環境。要衡量不同資產, 要從流通性, 需求, 波幅, 市價等不同角度去考慮, 建議先修好內功(下篇會講), 無內功即盲人摸象。

資產既不同既型態 

例如: ETF, 股票, 樓, 生意, 鋪, 車位, 工廈等

講到資本/資產增值, 不得不提一把雙面刃 - 槓桿 / 借貸。呢把雙面刃, 利用得好, 可以加快增值速度, 但係利用得唔好, 隨時會損手損腳。

二當家個父母細細過就教育二當家 「有借有還上等人」, 所以二當家初初畢業果陣就盡快還晒讀書借既錢, 直到呢一刻都好後悔, 因為如此低息既貸款真係可一不可再。

咁何謂利用得好, 第一件事要問自己點解要借, 第二件事係要諗有咩風險。如果借錢黎炒短線/ 衍生工具, 首先要問自己勝算有幾多, 就二當家而言,  炒短線/ 衍生工具同過大海無乜分別。你過大海買50,000蚊大細, 有48.61%可以嬴double。而炒短線/ 衍生工具呢? 我怕勝率連4成都不夠。

好多師兄會利用槓桿賺息差(即係借平錢, 用賺到既利息去cover借錢既利息), 風險係較低 (所有投資工具都係有風險),  所以回報都係會較低, 但係你寧願穩穩陣陣咁收錢, 定係轟轟烈烈咁輸錢?

槓桿 / 借貸都係有風險, 最好先了解一下何謂 LTV (LOAN TO VALUE), 好多時新聞聽到既斬倉, 平倉都係同槓桿 / 借貸有關係, 如果你連 LTV 都唔知係就最好唔好借或先睇風兄既文章。最後提一提, 買樓做按揭都係槓桿既一種。

單親爸爸撞牆記@懶系投資法 - 槓桿計算方法

世上無免費午餐, 記住:

高風險, 高回報

低風險, 低/平穩回報

乜都唔做,負回報

高風險, 低回報, 你會唔會做?

低風險, 高回報, 通常資本要求高。

待續...