Take a break! 台南台中精華遊 (Day1)

前文提到: 公司有放假政策希望員工可以在這兩個月內放多點假, 二當家本來打算在六月底回香港與家人聚聚, 所以一早已經請左假, 但一日未開放隔離措施, 回港既時間表仲係遙遙無期, 所以最後決定去台南台中逛逛。


很久之前二當家已經想幫自己做一個社交排毒, 遠離社交平台好好地咁放個假。剛好公司要員工放假, 所以在月底前跟大當家安排了一個台南台中精華遊。

上一次去南部已經是很久很久之前, 但那時候高鐵已經建成了, 去的是墾丁, 當年海角七號還未上演, 陸客也未到台灣。對南部的印象是, 有點像大陸, 說發展, 真係差國內一線城市十萬八千里, 很少看到高樓大廈。 今次去南部後, 印象其實沒多變, 友人說, 台灣就是以「慢.生活」, 10多年前的老店, 你會看到一樣的店員, 一樣的裝潢, 一樣的產品, 是好是壞?

來台南的目標非常明確, 為食而來, 台南有名的美食, 連台灣人都讚好。 由台北去台南, 二當家選的是高鐵, 台北到台南大約2小時的車程便到, 但由於台南站不在市中心, 下火車後便坐「小黃」(taxi) 去飯店。香港人來台灣非常頻繁, 很多香港人都當台灣/日本係第二個家, 不得不提來台灣, 最好先安裝「台灣大車隊」這個 app, 因為台灣很多偏遠地方打車都不方便, 有個 call 車 app 真係方便好多。


二當家第一餐既目標是牛肉湯, 不知道大家有沒有看 KC賞味隨筆 - 一個寫食評既 blog, 二當家都係跟住 KC 去搵食。當中 KC 有介紹到台南好幾間牛肉湯, 二當家就試左「阿棠牛肉湯」, 食評二當家就唔識寫, 但係湯頭真係好湯, 牛肉都好食啦。另外仲點左高麗菜少牛肉同肉燥飯。台南好多賣牛肉湯既鋪都係賣完就收鋪, 每日可能開幾個鐘頭就算, 要食好野要睇時間。

食完第一餐後, 就行去台南國華街二段~三段, 食鼎鼎大名既「邱家小卷米粉」, 未見到鋪頭名已經見到長長既人龍, 當天仲鬼死咁熱, 一路流汗一路等入座。成間鋪只賣兩樣野, 「小卷湯」同「小卷米粉」。老實講真係好普通, 二當家覺得小卷米粉既米粉有D似香港既粉仔, 又無乜味, 真係可以唔駛試, 試下個湯就算。而個湯係清甜既, 但無甚驚喜, 食過便算了。二當家到訪的當天是星期日, 國華街二段及三段正好封閉讓行人慢步, 兩傍也有很多不多小店賣小食, 邊走邊食不亦樂乎。


其實在臺南市美術館2館周還有很多美食, 在府前路一段的「福記肉圓」, 「檨仔林阿全碗粿」, 「莉莉水果店」等,  無耐天氣炎熱, 加上眼闊肚窄, 行下行下, 最後走左去林百貨嘆下冷氣。 坐住部唔知有幾多年歷史既電梯去到頂樓, 一眼望到林百貨內竟然有冰凍既豆花食, NT$40 一碗, 唔算太貴WO, 剩係可以係冷氣環境下用餐呢一點已經覺得超值 (注: 當天台南應該有 33度以上), 二當家其實係台灣食過好多次豆花都覺得都麻麻地, 香港既豆腐花好食好多, 但林百貨賣既豆花, 不論味道, 質感等都非常不錯, 貴得有道理 (😜荃灣豆腐花之戰, 我走果陣賣緊 HK$7 一碗, 宜家台南食一下碗要HK$10)。

行完林百貨後, 坐的士去左「安平定情碼頭德陽艦園區」睇日落, 上左隻小型軍艦到睇下, 興趣真係不大, 但係可以影下相開心一下都算不錯啦, 影完相後就回酒店沖個涼休息一下, 等開飯。


晚飯訂了「村料理」, 這間餐廳是餐廳+民宿合營, 主打無菜單既海鮮料理, 食既係台灣古早味。我們訂了 NT$800 既海鮮餐, 我知係貴, 但這個是大當家下旨要食既餐廳, 偶爾豪少少都唔算過份😋。當中連甜品+飲料總共8個菜, 有鮑魚沙拉, 元貝咸蛋米糕, 蒜香蛤蜊蒸蝦, XO醬炒小卷, 烏雞湯, 及八寶福袋 (入面個餡料似獅子球), 甜品係鳳梨椰汁糕, 飲品係烏梅汁。大當家同我都覺得度度菜都好食, 仲食到鬼死咁飽, 老闆仲好好人咁送左兩隻自己包既台南糭俾我地做手信。


第一天完