打工仔記事 (一)

簡單說一下二當家在台灣的工作近況。二當家在台灣的工作算是非常順利, 因為二當家已經在同一間公司工作了5年, 在香港時已經對現在的這間公司各方面有相當的認識, 算是有點「手到拿來」。

打工, 老闆不外乎睇幾樣野, KPI, 錢, 有冇鑊氣, 有冇得罪人, 同你有冇影衰佢。呢幾樣都無事的話基本老闆都唔會同過唔去。 KPI 都係做靚條數, 相信好多人都明白到, 其實 KPI 好多時候都係非常之 ON9, 例如 HR 請個人, KPI 係一年內果個人唔會離開公司。又例如 FINANCE 做 BUDGET, KPI 可能係要誤差10%內。一間公司其實同好多一般人一樣, stick with the plan, no surprise 就係最好。

二當家所在的 DEPT 也是一樣, 有D 好鬼無聊既 KPI, 只要學懂個玩法, 其實也條數靚仔又有何難。但事實上, 二當家就真係遇過好多人都係不求甚解, 你話 KPI 係咩就咩, 有點「隨遇而安」既味道, 呢種人當然唔會得老闆歡心。

在新的位置上, 責任大了, 工作性質也改了不少。最大既改變應該係由落手落腳做, 變成 「管人」同「管錢」。簡單黎講, 以前同老闆 work 得好 close, 有D 咩事都要同老闆講, 聽老闆決定。 而宜家老闆只會講一句, 唔好爆 BUDGET, 其它野, 你自己搞掂佢。




「管人」- 其實「管人」真係一門學問, 做左咁多年野, 聽身邊同事/朋友讚自己老闆既, 真係屈指可數。亦代表做得呢個位, 預左唔會同下屬做到朋友, 終於明白以前點解皇帝自稱「寡人」。打工仔可以好簡單咁用以下個 Matrix 去分類 (呢期讀 PMP 讀上腦, 鐘意整 MATRIX)。

	有能力	無能力
上進/野心 ambition	得力助手	小心管理
過日晨 Hea 做	找推動力	密密做, 唔做錯就 OK

就二當家既個人經驗, 其實大部人都係落係「密密做」呢個範疇, 因為香港人實在太富裕, 唔駛俾租金/家用, 份糧其實好夠洗。無需求就自然無動力去進步, 大家都係想朝9晚6, 有小朋友番工就想早d 番屋企陪小朋友, 日日密密做, 唔識或唔想拎 credit, 只係想做一d 佢地熟悉既野, 你叫佢做多d 都會 say no.

而「有能力又無動力」既, 最難就係推動佢地做野, 因為佢地已經無所求, 但自己又想搵到個幫手。明知下屬可以做多D, 但係就拉牛上樹, 推極都唔郁。要同呢類人 WORK, 一係就打關係牌, 一係就俾高帽佢載, 佢條氣順, 自然就易D 合作。

「上進又無能力者」, 亦都比比皆是, 而且好多時候都身居要職。皆因在一間公司入面, 上進或有野心既人通常都會更加勇於表達自己, 亦即會更勇於「擦鞋」。呢一點從 HR 或者老闆既角度黎講係非常地受落。正所謂「千穿萬穿，馬屁不穿」。

最後梗係有能力, 又有野心既「叻仔」, 呢類人通常2年就轉一轉工, 因為知道間公司無伯樂, 亦無上升空間, 唯有靠轉工轉環境。公司當然想留低呢樣員工, 但因為公司架構, 利益關係, 及太多長期服務既員工關係 (老屎忽), 通常都好難留得住呢類員工。

正所謂「竹門對竹門 木門對木門」, 一個有料有野心既上司, 當然要求D 馬仔一樣咁 FIT。如果個老闆唔想再上, 佢地都會想條 team 穩穩定定, 唔好搞咁多野。所以不論你打工好, 管人好, 認清你自己及你上司/下屬係必須既。



至於「管錢」則比較簡單, 二當家做緊間公司每年都要做 budget, 而老闆最緊張既係唔好爆 budget (除非果年公司好好數)。作為 「管錢」既人, 學問就係點樣洗到o岩o岩好。例如我今年 plan 左 100k 去 training, 去到年中就收收風今年駛唔駛 cut budget, 如果要 cut 就預定個 buffer 先, 如果唔駛 cut, 就要諗點樣可以用盡呢100k。 如果到最後只係用左 50k, 咁下年個 budget 就會根據今年黎 adjust, 亦即下年只係得番 50K 黎做 TRAINING。

聽落好 ON9, 但呢個係大大少少公司每日都做緊既野, plan 左要洗既錢就要洗盡佢, 唔駛就會無, 為左霸定D 資源, 所以每年都要強迫地洗錢。例如二當家做緊間公司, 要幫同事安排 TRAINING, 又要買下機械, 又要做下機械維修, 每年BUDGET 都唔同, 有時 10個煲得9個蓋, 有時5個煲但係有 10個蓋, 點樣拉上補下, 點樣駛得 SMART D, 最緊要係識同老闆解釋, 做到以上幾點既話, 其實「管錢」唔算太難。暫時二當家都仲係學習中。




這幾天有很多想說時的東西, 但奈何時間不夠, 在此先定下幾個想講既 TOPICS

1. 海外收入, 買台灣樓, 買香港樓
2. 覺悟人生 - 你為什麼不快樂
3. IB  HK > LLC 轉倉記事
4. 打工仔記事 - Prepare for the changes