阿媽...我得左啦 - PMP

係邊到跌低, 好彩唔係O係果度再跌低....阿媽, 我得左啦😀 !!!

二當家由9月肥左佬開始, 意志低沉左一排, 因為考 PMP 真係一個煎熬, 或者真係二當家天生不是一個讀書既料子, 就算睇多兩次本書都係無用。先講一下二當家第一次考試既失敗歷程。

首先, 我估考PMP 既人都會去一個叫 Edward Chung 既人既blog, 因為呢個哥哥仔真係好有心咁集合晒有用既資料, 最難得既 keep 住仲有 update, 有用既資料包括 free exam 既 resource (重點), flashcard, 同埋一d 好易混淆既 terms。

其實做完晒佢提供既免費 mock exam, 大慨都要做一千條 mc 左右, 正如我上次所講, 都係60分~75分左右, 所以去考果陣 50/50, 根本唔知自己 ready 未。 除左做 mock 同睇pmp 本書, 另一樣二當家有用到既就係人稱 pmp天書 -  Rita。Rita 最有用既地方二當家覺得係 Rita Chart, 如果你唔想買本書, 剩係上網搵個 RITA CHART 黎睇, 再玩佢個 GAME (免費的) , 幫助已經非常咁大。當然, 本書仲有提到好多考試既 tricks 同 exam, 所以二當家還是覺得本書是有一定價值, 但非必須。

但...點解第一次會肥佬呢? 原因係, 大部份既 mock exam 同真正既考試差太遠, 可以話係 not even close..... 每個 mock 其實個重點都唔同, 有d mock 專登問你一d 書入面出面過 1~2 次既 terms, 睇完都唔會記得。有d 著重計數, 但真正考試要計數既應該唔到 10條。而 Rita 或者另一個好出名既網上免費 mock - Oliver Lehmann 既題目, 就鐘意玩有咁複雜得咁複雜, 睇題目都要睇 2 分鐘, 但其實真正考試既時候, 要係 240 分鐘內回答 200條 MC, 每題平均只可以花 1.2 分鐘。所以我覺得做 MOCK 係必須既, 但唔好以為做完 MOCK 就一定 OK。

另一個原因會「肥」係集中力問題, 連續做 4個鐘頭卷其實真係會頭昏腦漲, 有時個腦實到根本轉唔到, 所以第一次考試時試過多次對住條題目發呆數分鐘。另外二當家第一次考試時仲有個小插曲, 上網睇到之前D 考生建議選用「中文」做 2nd language, 因為如果考試時有d 咩英文字唔識都可以睇到個翻譯, 同埋聽埋個 question bank 係有d 唔同。二當家就聽從建議考之前 reg 左「中文」做 language aid, 點知考試時, 成份卷係用中文對問, 每題題目中有個小按鈕, 打開就可以睇原本英文版既題目, 我見到果下真係粗口都講埋, 因為個英文翻譯係要每題都要 click 一下至會出現, 即係每題我可能要花 0.5 秒係 click 題目中既英文翻譯, 而最慘既係對一個香港人黎講, 根本唔會嘗試去睇佢中文題目, 因為我地讀既 text book 係英文..........

就係咁...二當家就肥左第一次考試...




經過9月考試後, 二當家唔想俾自己再拖下去, 一黎個會籍就快同期, 再續會籍又要科水唔化算, 另外就係呢個係我 2019 年既目標之一, 唔想再拖到去 2020 年。決定後隨即上網科水報考第二次, 但點樣令我第二次既 hit rate 高d 呢, 上網睇d 鬼仔 (reddit)講, 大部份人都係去報一個 prepcast 既 exam (其實本身想報 PM Training, 因為平一半, benchmark 可以睇下呢到既評分), 唔知係唔係間公司搵人落廣告啦, 但見負評既人不多, 算啦, 豪氣地用左 us$125 買左個 simulator, 再加上 us$275 既補考費用, 咁又無左幾千銀。(Total US$400 / HK$3000)


Prepcast 一開始唔多識用, 剩係見到佢preset 左 8個 mock exam, 每個 mock 200 題, 即係 total 成 1600題問題, 最慘係一開始個 MOCK就無得停, 計時 4 小時, 真係尿都無得呵。 咁樣太唔 flexible, 因為番工既時候根本唔夠時間做份 mock, 上網一問之下, 至發覺有個 learning mode, 可以揀 20條~100條既題目, 仲要不限時, o岩晒我, 基本上番工果陣就開個 50題 (around 1小時), 有時間就做, 收工前應該做得完。PMP 既考試重點係流程順序同埋不同 Projects Document 既作用, 而 Prepcast 既問題對比起真正考試既題目我覺得係較易容易同直接,  打個比如:

假設問題係: 1 -> 3 -> 5 -> ?

Prepcast: 既 MC 答案選擇可能係 A. 9  B.13  C. 8  D.21

而真正考試果陣既 MC 選擇可能係 A. 101  B.102  C. 182  D.116

無錯, Real Exam 既選擇好多時都係「無厘啦間」, 佢表面上問緊你 next step, 但俾你既選擇係 10 個 steps 後既野, 而且 PMP 考既都係 process 而非數理, 所以更難用推理既角度去搵到正確既答案。

例如問題係: 你肚餓, 你會?

Real Exam: 既 MC 選擇可能係 A. 打開雪櫃  B.著鞋  C. 禁電梯  D.上網

因為題目提供既背景資料不多 (RITA 有建議你去點 make assumption), 所以表面上樣樣都有可能, 但你要揀既係 PMP 入面佢覺得最好既選擇, 而非實際真正既工作情況。例如老闆俾左個唔合理既 deadline 你, PMP 叫你要反映俾老闆聽個 deadline 唔合理, 但現實中PM既 value 就係同老闆死掂佢。


到最後, 講下點解去考 PMP。其實二當家非IT, 亦非工程, 考個試純粹俾個目標自己, 正如上年都有提到, 其實我梗想完成左個 MASTER 佢, 但又唔想俾咁大舊錢, 所以搵D 野黎讀下。讀完唔會升職, 梗不會因此加薪, 至於 PMP 有冇用真係各花入各眼, 係外界既評價係要讀 PMP 果個應該係老闆, 因為大部份不合理既要求都係來自老闆或上司, 如果真係跟從 PMP 果套方法去做野, 真係有10條命都唔夠。