謝謝麥加文 - 不要浪費時間

 

二當家開左個 PAGE 都幾年時間, 一直想 beat the market, 但係至從番左香港之後, 自己可以用黎研究既時間越黎越少, 再加上心理素質既問題, 手上就算HOLD 住一D 素質不錯既股票, 但面對股票既升升跌跌心理多多少少都有壓力。 而外圍環境, 政策, 公司內部問題等, 都唔係二當家可以左右到, 且手上有 700, 9988, TSM, 823等, 表現均未如理想。

又再者, 小當家既誕生,令到二當家既優先順序改變, 「投資」已經唔再係我既 priority, 反而放更多時間係自己身體健康管理, 陪伴小朋友既成長等更為重要。 二當家多次提出個要做月供, 不過最後都係無做到, 咁O岩見到麥加文段片, 有如「當頭棒喝」, 即日起, 二當家會轉往月供計劃, 而個 Portfolio 會參考 Ray Dalio 既 All Weather Portfolio (30% Stocks, 55% Fixed Income, 15% Commodities). 

大道至簡, 目標為 15年後退休。

Weight (%)	Category	Ticker	Currency	ETF Name	Investment Themes	Remarks
30	Stock	VTI	USD	Vanguard Total Stock Market	Equity, U.S., Large Cap	or SPY, QQQ, 2800
40	Fixed Income	TLT	USD	iShares 20+ Year Treasury Bond	Bond, U.S., Long-Term
15	Fixed Income	IEI	USD	iShares 3-7 Year Treasury Bond	Bond, U.S., Intermediate-Term
7.5	Commodities	DBC	USD	Invesco DB Commodity Tracking	Commodity, Broad Diversified
7.5	Commodities	GLD	USD	SPDR Gold Trust	Commodity, Gold

Ray Dalio All Weather Portfolio: ETF allocation and returns (lazyportfolioetf.com)

近況 (16) - 平凡的幸福 + 投資日誌

 

轉眼又無UPDATE 幾個月, 投資上荒廢了, 簡單講下近況市況

首先, 我同大當家既愛情結晶 - 小當家已經安全回家, 生活上有大幅轉變。 大部份時間及注意力都落晒去小當家到, 小當家大叫一聲, 二當家就算訓緊, 都即刻落床睇下小當家咩事。投資界既 KOL 又為人父的都有不少, 風兄既俠骨柔情, 福祿壽忙於湊小朋友消失於 BLOG 界, 仲有 AC 兄既關懷備至都令二當家佩服得很。

有睇開二當家既 BLOG, 可能都知道二當家其實一切都係隨緣, 結婚初期無諗過要小朋友, 因為想二人世界, 再加上仲未準備好為人父, 過左幾年二人世界, 就一切隨緣, 都係抱住有就有, 冇就冇。 到年紀去到咁上下, 就博一博, 試過 IVF 都唔得, 為免帶來太大壓力, 又放低左呢件事。點知, 最後又突然搞掂左, 我地已經過晒「計日子, 食生蠔」既時段, 真係隨緣。中間好多野都係戰戰兢兢, 因為年紀已經唔細, 再來就係二當家家庭背景上既問題, 會擔心一D先天性既缺憾, 幸好, 暫時一切正常。

新生命既誕生, 令到二當家既 PRIORITIES 又改變了不少, 雖然我還是我, 但對自己及家人健康, 對家庭既負擔會更加既著重, 例如保險既 coverage, 未來既居住環境等, 二當家會花更多時間去思考。

廢嗡一下 - 放寬按揭, 賣樓

 

前果排金管局星期五六點突然開會, 以為有D 咩新既措施, 原來係玩放寬按揭。聽落去以為利好樓市, 再睇埋詳細介紹, 原來係放寬「銀行」既按揭成數, 將個風險由HKMA轉去銀行, 市民係可以慳到個按揭保險, 至於會刺激到人入市, 暫時就睇唔到有乜反應。

如果睇番最緊新盤既情況, 大家都知邊D 盤賣得好, NOVOLAND, 飛揚(減價), 瑜一, 其他D 盤都係 pend 住係到, 一Q清袋真係得啖笑。 另外重貨區啟德, 緩慢出貨中, 一堆貨尾究竟會點搞呢? 另一邊阿比卡照係咁起臨時房屋, 周圍都起, 睇黎係佢任期內既重要政績, 但多得佢既土地規劃, 成個市都係觀望中, 否則用過千萬買既住宅, 旁邊可能係幾千蚊月租既臨時房屋, 見到都令到自己既心理唔平衡。

講番金管局既措施, 對象當然唔係香港人, 而係新腥港人或者係尊才, 吸引D 錢落黎。一般市民最大問題都係一. 首期唔夠, 二. 入息比例過唔到。而呢兩條線唔變的話, 一係收入/資產增加, 一係就要等樓價回落。要睇分析, 小子兄都已經講晒, 出左政策後, 係咪利好樓市? 我諗大家有眼睇, 最新北部都會區重點項目「匯都」賣成點?  二當家食住花生等睇戲, 繼續做我的租奴。

周大福企業全購新創建

 

//周大福企業提全購新創建 新世界擬派特別息1.59元

周大福企業以每股9.15元提出全購新創建集團(00659)股份；新世界(00017)預計套現近218億元，將派發特別股息。//

隻 659 上星期停牌前抽升, 都估到有好事發生, 但估唔到係玩全購。

現價 8.84, 收市前 7.99, 二當家平均成本7.5左右, 唔計收左既派息, 現價有 18% 既水位。用9.15黎計約有22%水位, 算係自己咁來以黎最成功既投資。當初都係勁人谷來聽到人講呢隻, 自己又 STUDY 下, 最緊要係持有得有信心。 9.15 既收購價, 同 新創建 既估值仲有一段大距離, 但有食唔食, 罪大惡極。 宜家先等全購既結果, 未來都係煩要搵邊隻做腳, 宜家二當家儲埋儲埋都係做定期, 希望搵到D更好既投資物。

二當家的理財日誌: 股票研究 - 659 新創建 (vicemaster2nd.blogspot.com)

二當家的理財日誌: 股票研究 - 659 新創建 (二) (vicemaster2nd.blogspot.com)

溫書 - 扣稅年金抵唔抵?

 

//扣稅年金扣除額上限$60,000 最多可慳$10,200稅

到了領取期，投保人可定期收取年金。 現時扣稅年金扣除額上限為60,000港元，意味每年3月31日前一筆過支付60,000港元保費，便能夠趕及稅季享扣餘額。 以薪俸稅17%稅率計算，每年最終可慳稅10,200元。//

近來二當家回港後努力學習有咩扣稅方面, 最普遍既扣稅三寶, 自願醫保, 強積金自願性供款, 及扣稅年金。 MPF 二當家已經拎過一次, 唔會再諗住, 因為要到 65 歲至可以拎番。自願性醫保會買, 但都係講緊 4000~6000 一年 (二當家個歲數), 為左屋企人著想都會買。最後就係扣稅年金。

同個 SALES 講起, 佢話市面上大部份人都係買 5年, 一買就買60,000, 用盡扣稅額。供5年, 到第8年時就 end contract 拎番同額既供款本金 (用保險公司假設既回報), 到時候再決定是否做一個rolling 既動作， 二當家今日溫下書， 又計計數， 睇下咁樣有冇著數。大家唔知係咩黎既可以睇番下文溫溫書。

二當家的理財日誌: 幫自己釐清 IRR, CAGR, NPV, PV (上) (vicemaster2nd.blogspot.com)

假設每年供款 $60,000, 期限為5年 (year 0~4), 每年可以慳到 17% 稅 ($10200), 實際供款既為 $49800 一年。

假設 R 為 4% (ref to HIBOR - 1M 3.6%)

計算出每年實際付出的 PV 值

PV = FV/(1+R) ^ Period

PV0 = -49800 /  (1+ 4%)^ 0 = -49800

PV1 = -49800 /  (1+ 4%)^ 1 = -47885

PV2 = -49800 /  (1+ 4%)^ 2 = -46043

PV3 = -49800 /  (1+ 4%)^ 3 = -44272

PV4 = -49800 /  (1+ 4%)^ 4 = -42569

將以上5個 PV 加起黎, 總PV 為 -230,569

根據保險公司既回報表, 第8年終止合約的話可以收到 $300,476

PV = FV/(1+R) ^ Period

PV = 300,476 /  (1+ 4%)^ 8 = $219,555

NPV= -230,569 + 219,555

NPV = -11,014

再放入 CAGR 既 FORMULA 到計計, 

=RRI(nper, pv, fv)

=RRI(8 , -230,569 , 300,476) = 3.37% 

以上例子只係用第8年完 contract 去計有冇著數, 大家亦可以等到某個年齡再收取年金。

投資角度黎講, RRI 3.37% 還不如無風險利率 4%, 保險公司出名回報低就預左, 但除左回報外, 其實仲要睇好多野, 例如流動性, 退休計劃, 風險管理, 紅利實現率等。 買唔買都係個人決定, 二當家志在溫下書, 希望呢個 study 幫到大家。

近況 (15) - COVID + 迎接新生命

 

先報告一下投資結果, YTD +8% (Incl. div & interest)

二當家既現金流尚算不錯, 不過都只係一名打工仔, 好容易一無所有。 有正向現金流, 就要諗下D 錢點泊, 暫時都係港紙3個月定期rolling, 而新既資金會泊係美金到收息, 多過 US$10000 就收 4.58%, 仲要唔駛定期, 用黎 balance 番個流動性。有錢就身痕, 係香港睇下樓, 但O岩價既就舊, 預左難甩手, D 半身盤叫價又鬼咁進取, CCL 又升番少少, agent 已經吹到話會減息, 二當家當然笑而不語。反正自己唔急, 黎緊要搬, 又開一份新租約, 暫時都係將個 focus 放係黎緊既新生命到。

Interest Rates | Interactive Brokers LLC

新生命

話咁快已經去到29周。 先講講之前做 T21 advance, 係港安做, 前後做左兩次, 兩次都出唔到 REPORT, 最慘個醫生係冷冰冰既, 剩係叫我地唔駛擔心。 我地最後拎住番 REPORT 轉左去另一個醫生到睇, 人地一睇話, 雖然個 RESULT 無出齊 (incompleted), 但係最常見既 T21, T18, T13 都無事, 只係130組微缺失症候群果部份出唔到報告, 一般 T21 只會檢查6~7組, check 得越多, 出報告既難道就越大。最後港安全數退款, 我地都無再係港安睇, 轉投外面執業既婦產科醫生, 退番黎既錢, 我地再做多次 Panorama 求個安心, 最後報告出黎都係無問題既, 安樂晒。

檢測方面, 都係私家同政府夾住做, 每2星期一次, 私家收千幾蚊次, 一個月至一千, 買個安心, 抵俾! 唔知係唔係因為高齡產婦, 政府果邊肯同大當家做照結構, 又慳番幾千銀。 二當家初時以為照結構係一D高科技既野, 原來都係拎住個 scanner 左睇睇, 右睇睇, 數下D 手指腳指, 講真, 得個醫生知道自己照緊D 乜, 係政府醫院, 一切都係求有而唔係求好。

之番再去測糖尿, 其實無乜特別, 晨咁早去醫院飲杯糖水, 之後等2個鐘左右再抽血檢驗, 中間兩個鐘, 我地兩個無聊到係醫院到睇D人排隊番工同睇醫生, 都係果句, 無錢盡量唔好病, 否則排隊都排到你傻。黎緊進入最後直路, 要搵屋搬, 又要睇左大當家, 大部份朋友都係勸勉我地「有得飲好飲, 有得食好食, 有得訓好訓, 盡量休息多D, 以後有排挨呀」!!!!!

COVID

係 5 月份內, 身邊既朋友同事多多少少都中左 COVID, 傳染力特強, 二當家都不幸中招。話說有日二當家其實已經番左工, LUNCH 都食埋, 突然間覺得頭重重, 狀態急劇下滑, 隨即請假番屋企, 一番到屋企就訓, 邊訓邊標冷汗, 關節又痛, 手軟腳軟, 輕燒 (38度), 連食慾都無乜, 但 RAT 一直都係 netgative。第二日就去左睇醫生, 開始喉嚨病, 有啖, 隨後就咳咳咳咳, 一直都宜家都未好晒。RAT 終於係第三日轉positive, 原本想同大當家分開訓, 佢訓房我訓客廳, 但病到半死, 又一直都訓唔到, 最後載住口罩都係番房訓。 結果, 大當家隨後跟住就病住, 其實住埋一齊真係好難避免, 醫生話在懷孕中期, 中 covid 其實對bb 影響都唔算大, 係會有增加早產既風險。係有記錄以黎, 二當家係3年幾以來第一次中 covid, 但係呢波 covid 好似仲係 office 到漫延緊, 大家記得保重身體!!!

 

投資日誌 - 2023-04-30

 

NAV: YTD +5%

Symbol	Gain/Loss	% of Portfolio
TSM	14%	12%
700	3%	9%
1883	19%	8%
9988	-5%	8%
697	7%	8%
659	1%	7%
2318	10%	6%
823	-11%	5%
P40U	-2%	4%
MDT	18%	3%
Others		23%
Cash		7%

US Fed Rate: 5%-5.25% (May 2023)

Prime Rate: 5.75%

1Month HIBOR 3.47% (as of May 9)

銀行同業市場流動資金狀況: 44,527 mn (as of May 9)

CCL 165

恆指 19762

Dow Jones 33561

Nasdaq 12179

S&P500 4119

太耐無更新, 自己亦都無 follow 個 market trend, 雖然有時仲會睇下匯君兄, update 下自已, 但投資方面真係乜都無做。 最主要原因係唔想d 錢蟹左落股票到, 所以新錢都係做定期, 到期就 renew, 港紙大約 3厘至 3厘半, 人仔得一厘六, 美金就四厘半 (非定期)。 網傳話全世界走去美元化, 但都係聽住先, far away from that. 

股票無特別, 又留意下D 新盤, 有幾個盤要減價速銷, 包括飛揚同University Hill 都有減， 未來主要供應會係元朗 yoho hub, 啟德, 屯門 novo, 天水圍天榮站, 但新樓d 價真係好難接受。 如果今年再續租, 可能買樓既計劃又再延後, or 用雙租既方法買個細 lump sum 既單位。

成就解鎖 - 買車易 養車難

 

話咁快, 二當家已經楂左部錢七一段時間, 養車, 真係分分鐘都係錢, 尤其係錢七已經係一個老人家, 好多暗病, 雖然維修未必一定係必須, 但因為安全及方便性問題, 唔整, 第時會發生既問題分分鐘好大鑊, 所以作為新手, 二當家已經洗左一大筆錢去整姐, 今次細數一下養車既難處。

牌費價錢攻略2023︱不同汽車續牌費、續領牌照程序及文件 | MoneyHero

牌費燕梳: 先講牌費, 我諗大部份人都係俾一年牌費, 而價錢係按汽缸容量計, 由HK$5000~至HK$15000 不等, 二當家架錢7 超過1500cc, 所以每年要俾 HK$7498。 以電車按重量計, 每1000KG 至 $572,  MODEL 3 每年牌費將 HK$1000。

汽車保險大比併　10Life︰三保保費相差1.7倍　財物自負額差5倍 (hk01.com)

至於燕梳分全保三保, 又按駕駛經驗, 車款等會有不同價錢, 二當家買三保, 價錢為 HK$1700。

驗車: 新車7年免驗, 及後年年驗車, 每次 HK$2000~HK$2500. 

停車場: 香港地地少人多, 停車場梗加係兵家必爭之地, 除左住宅, 連車位都有得炒, 一個車位過百萬係等閒事。二當家見過最平既月租係 $1600, 自己租緊附近爛地就收 $2900, 樓下屋苑收緊 HK$ 4000+, 有平有貴。如果楂車番工分分鐘就兩邊停車場, 每個月剩係停車場六七千真係等閒事。

另外就係時租車位, 香港錶位嚴重不足! 而時租車位價錢都好飄, 睇你去屋苑定商場, 最平我見過 HK$14 蚊個鐘, 一般九龍區域都 HK$20+, 出街泊4個鐘閒閒地都過百。

牛肉乾: 同朋友講開, 如果車主收牛肉乾已經習以為常, 事關搵車位真係唔易, 有時要放低架車買少少野, 食個早餐, 番黎見到張牛肉乾, 成為 $320。 

油錢: 油價上升, 宜家折實要成 HK$17 / L, 打爆一缸油過千係等閒事。 二當家只係 sunday driver, 一個月入兩次油 ONLY。一般車主會計幾錢一公里, 二當家架錢七應該 >HK$1.3 一公里, 混能車就 around $0.8~$1 一公里, 電車暫時應該係最平約 $0.3 ? (有免費電, 又有 SUPER CHARGE)。跑單程屯門公路 around 20 公里長, 大約 HK$20~30。

整車: 呢個真係可大可少, 睇你係歐洲車定日本車, 日本車一般黎講換零件會平過歐洲車。如果係非新車, 朋友話每年預萬幾兩萬, 睇你車既年份同公里, 因為實在太難去有個標準, 所以先假設每年HK$15000 維份保養費。

雜費: 例如洗車, 補品, 隧道等, 假設每個月 HK$500 (好少過海)。

以上就係二當家平價低用量養車既開支, 亦都係因為咁, 所以好多男仕唔會同身邊既女伴講養車既開支 😋 。

奇貨可居 - 銀主盤 / 業主法理情

 

在得知大當家有左後, 問題接連而來, 而大部份香港人都會遇到既問題都係 - 住宿 同 邊個湊。

二當家都幾抗拒工人, 一黎屋企要住多個人, 好多生活習慣一定好唔同, 而且二當家一直都係兩個人住, 根本無需要。但周圍既人都同我講, 生次後就太遲, 唔請你就後悔, 但針唔到吉到肉係唔知痛, 所以我都係決定唔請住, 到最後至再算。而邊個湊呢個問題, 我同大當家已經諗住好幾個方案, 講真, 真係唔能夠靠四大長老, 四位都有番咁上下年紀, 體力係一個問題, 安全係另一個問題, 有腳痛既, 有耳仔唔聽駛既, 有記性退化中既, 交個小朋友俾佢地, 二當家真係唔放心。最後好在大當家有個親戚 FIRE, 而佢又肯幫手湊, 實在係幫在我地一個非常大既忙。 到另一個大問題就係揀住邊到, 因為要日日帶個 B 兩邊走, 梗係想住番近個家人果頭, 問題來了, 二當家份租約完果日, 同預產期只係差一星期, 咁二當家梗係想提早搬走, 生左之後再搬又多好多野煩, 所以即刻搵業主傾傾。

唔知各位業主點睇, 二當家同業主講果陣, 梗係講晒原因, 所以想提前解約, 賠償果到睇下有冇得傾, 二當家當時已經係提前兩個月通知, 諗住賠多一個月 (or less) 就算, 好黎好去, 當時離完合約期仲有5個月, 咁即係業主收少兩個月租 (死約), 但可以提前招租。 當然, 若果租客要上黎睇, 二當家都會樂意配合。 點知後來 AGENT 通知, 業主果邊一步不讓, 即係要二當家陪足3個月, 咁我梗係啋佢都傻,  如果要賠足, 就唔係「傾下賠償」。 當下突然想起在台灣的業主, 有好多人, 包括二當家, 都講台灣係「情理法」, 香港係「法理情」。係台灣, 相信二當家用呢個原因提早完約, 好多業主 (不是全部) 都會體諒, 而香港就, 可能咁O岩我遇著個係咁, 唔代表個業主好唔好, 只係大家既 Mind 來好唔同。又再者, 朋友同我講, 話我地只係住左半年左右, 業主至唔會 SO 你, 除非係住左都一段時間。所以宜家二當家要係大當家生之前一個月至搬。

當二當家知道未來要搬走, 就同住果區既家人打聽一下, 睇下有冇筍盤, 因為未來開支都會大左, 又買左車, 一闊三大。 點知同家人傾傾下, 佢話有個筍盤, 不過唔係放租, 而係投資用, 問我有冇興趣。 首先講下, 個盤係鳥不生蛋既地方, 低成交 (近乎零), 村屋, 僭建, 仲要劏左, 雖然回報 > 10%, 但一般而言, 二當家唔會沾手, 因為唔係地頭虫, 分分鐘手尾多到暈。不過問我有冇興趣果位家人係地頭虫, 所以至思量一下。 番到屋企, 即刻計計數, 睇下有幾多可動用資金, full pay 一定唔夠, 又上網望下有下有冇可能做到按揭, 首先村屋已經難做按揭, 按揭成數低, 估價又未必估足。另外有僭建物, 分分鐘又扣按揭成數或直頭唔批。劏房, 要睇下有冇分契, 無既又係無得解, 連按揭仲介都聽到擰晒頭。退而求其次, 又望下財仔 (財務公司), 利息高好多, >7~8% 起跳, 如果借得唔多及有還款能力, 其實借 P Loan 仲好, 不過一般而言還款期短 (12~24個月), 利息 2~3%, 金額有限 (2~3M)。 好彩個銀主盤 lump sum 唔大, 計完數, 就決定去馬。

同家人傾左, 可以夾份, 二當家唔想獨資因為怕管理問題, 呢位家人一定信得過, 所以落邊個名無所謂, 家人亦都開個家庭會議, 準備幾日後落 BID。點知, AUCTION 前一日, 經紀打黎話銀主收起個盤唔拍賣, 真係「頂」.... 浪費左我既腦力。不過經過今次, 又學到不少知識, 同埋有財商, 機會黎到自然識反應, 知道有咩方案, 風險又係D 乜, 落唔落 BID 好閒, 但整個過程其實就係幫自己既財務狀況做一次壓力測試。

2023-03-27_幫 1883 更新股值

 

味皇

受賞恆息食息性也: 1883業績 (sigumdick.blogspot.com)

近來 1883 破頂, 亦係二當家 Top 10 入面唯一有賺既一隻股票 (真係羞家), 係決定放唔放之前幫 1883 做個股值先。

年份 派息

0 2018/12 0.18 

1 2019/12 0.20 

2 2020/12 0.21 

3 2021/12 0.23 

4 2022/12 0.25 

Dividend G rate = 8% (CAGR)

市場利率 = 3.5% ~ 5%

市場必要回報率 = 8%, 10%, 12% (數字越大越, 估價越保守)

BETA 值為 0.54 (Morning Star, Reuters)

以下為不同 Scenario, r 值平均為 10%~11%

無風險回報 必要回報率 Beta r

3.50% 8% 0.54 8%

3.50% 10% 0.54 9%

3.50% 12% 0.54 10%

4.00% 8% 0.54 8%

4.00% 10% 0.54 9%

4.00% 12% 0.54 10%

4.50% 8% 0.54 9%

4.50% 10% 0.54 10%

4.50% 12% 0.54 11%

5.00% 8% 0.54 9%

5.00% 10% 0.54 10%

5.00% 12% 0.54 11%

同樣, 我 assume D1 (用最新派息當作 D1), 假設 1883 未來派息跌到4%, 必要要求回報率 11%, 參考價格為 3.5, 現價為3.29。

二當家的理財日誌: 用DDM評估1883 中信國際電訊的內在價值 (vicemaster2nd.blogspot.com)

近況 (14) - 買車及樹洞

 

二當家最近發生了幾件人生大事, 要開啟樹洞 Mode

最最最大既一件事, 大當家無端端有左。二當家知道呢個係一件喜事, 但為免自己最後失望, 自己做左大量既情緒管理。先講錢, 老實講二當家算係中上收入人士, 加上我兩口子都係慳底, 錢...係我最唔駛擔心既野。咁唔擔心錢, 擔心d 咩? 第一, 大當家都算係高齡產婦, 我係好怕佢身體負荷唔黎。第二, 阿 B 既健康, 當你有過一次「跌」既經驗, 就好怕有第二次。暫時叫左過左頭3個月, 做左 T21, 第一次出唔到報告, 宜家做左第二次又再等報告, 前前後後我驚足一個月。

二當家有親戚係「唐仔」, 老實講, 二當家一定接受唔到。接受唔到並唔係因為怕照顧, 更加多既係社會上既眼光及缺乏支援。我個「唐仔」親戚俾我阿娘串左咁多年, 我阿娘唔係壞人, 只係一般既師奶, 但最衰係佢把口永遠唔收, 個口快過個腦, 講者無心, 聽者有意, 「唐仔」阿媽咁多年收到既單單打打, 我自問無可能承受到, 亦都唔想去承受。老土D 講, 只有無限既愛至可以接受呢個缺憾, 二當家宜家都仲係緊張到半夜會醒左訓唔著, 但又可以同大當家講, 怕影響佢心情, 唯有搵個樹洞埋左佢。

一直想等埋 T21 個 RESULT 至同家人講, 但因為出唔到 REPORT, 最後都同左家人講。知道大當家有左後, 第一件事係...買車。二當家個雪藏牌N 年無「木查」, 買左個FD 架「腳車」黎操車, 一架車, 前前後後用左兩萬幾 (整車, 驗車, 連牌費), 大當家知道後牙痛咁聲, 好明顯佢對車既市價係無乜認識。 買車容易養車難, 泊個爛地都3000, 入油彈鎗都5/600, 未計出街泊下車 ($20~$4X / hr), 牛肉乾等等, 5~6000 一個月應該走唔甩, 不過買多左 me time, 買多左自由, 可以去多d 郊外, 及為未來自駕遊練習 都係 「木查」車帶來既好處, 所以生唔生都好, 車我都應該會「木查」。

除左車, 未來仲有好多野諗, 例如住邊同請唔請工人, 我見到貓師姐做野好快手, 二當家暫時乜都未諗, 第一 T21 個結果未出, 我無心情, 第二我真係唔鐘意有外人住係我屋企, 四大長老應該搞唔掂, 要大當家做 FTM?  又或者有其他選擇, 歡迎大家俾D 意見。

近況 (13) - 生活改變

 

簡單講幾句, 投資, 受惠於大市回升, YTD 升 11%

過去咁多年, 二當家學習了不同投資招式, 但想既時間多, 實際操作既時間少, 有陣時明明有投資想法, 但礙於自己信心不足, 往往見財化水。番香港後, 打理既時間更少, 所以穩健更為緊要, 至少 bottom line 唔好執, 都仲有機會返生。

最近兩單最 HIT 既 NEWS, 一為 823 LINKS 折讓價供股, 一為 股神放左 ATM。

先講 823, 由最呢幾既收購開始, 又大陸商場, 又 SG, 又 AU, 咁買法, 點會夠錢。遇著加息, 與其高息發外債, 不如供股集資。小股民梗係唔膠興, 因為唔供又俾人攤, 供又要係自己荷包到拎錢出黎。二當家暫時無資金壓力, 供既機會係 90% 以上。 從企業既角度諗, 用最平既方法集資, 減少利息支出, 呢個係正路既做法, 但資金既用途不明係死罪 (無收購目標)。至於之前既收購是否 GOOD DEAL, 二當家無研究唔敢講, 但睇隔壁BLOG - 領展大集匯, 連一向對領展既大好友今次都 X 到反艇, 可見領展今次真係得罪好多人。

另一單就股神短炒 TSM, 小薯兄寫左幾篇文去講呢樣野。老實講, 股神係勁, 但佢高楂沽關我Q事咩, 佢可能見到美國市場有更好既機會, 而作為一個老散, 我要既係穩定既表現。我都係睇 IEObserve 既雞精圖, 三五七年後好難講, 但短期 TSMC 仲係 Unbeatable. 

至於 Munger 話 "Investing In Alibaba Was The Biggest Mistake" 就仲好笑, 根據報導, Munger 話佢忘記左阿里係一個「零售商」。不過睇番個 interview, 最重要還是馬生得罪人。

<生活>

Expect Unexpected!

生命中每每帶來不同既驚喜, 二當家未來又可能有生活上既轉變, 今次二當家已經係從容面對。 宜家二當家減少左部份錢既煩惱, 例如以前會唔捨得俾多2蚊叫凍飲, 宜家想叫就叫。 二當家唔覺得話俾人聽 FIRE 會威D, 一黎自己未得, 連樓都未有。二黎 FIRE 既定義係咩, 個個都唔同。二當家只能算係比上不足比下有餘, 正如股神所講, 退潮時至知邊個仲有褲著。

2022 - 自我回顧

 為2022年寫下總結!

Income Statement

主動收入 growth: +34% (新職位, 新人工) 👍👍👍

今年最大既得著係番左香港, take up 左個新既職位。其實整體來說同二當家當初既想法非常 align, 當初去台灣, 係為左自己既事業, 亦俾自己3年時間去浸。之後 protest, 疫情, 二當家全都避過, 是幸運得不能再幸運。疫情話咁快又3年, 香港又有新一輪既移民潮, 而咁O岩機會黎到, 就係年中決定舉家回港。新職位當然辛苦, 但人工都合情合理, 係未夠時間退休既情況下, 二當家希望用 10年時間準備退休。

值得一提既係過去10年人工既 CAGR 係 17%

總支出: -1.6%

一般洗費: +29%
信用咭: +42%
家用: -24% (番香港後大當家都有自己既收入所以停左家用, 但2023 年會加屋企人家用)
租金: +13.5% (香港既租金 = 台灣既 1.8倍)
其他: -27% (非經常性洗費, 包括上堂, 國內旅行等)

開支增加, 主要係因為番黎香港買傢俱, 電器等。如果剔除左果部份, 一般性開支都應該係增加, 始終紙水唔同。其實有樣野好奇怪, 有部份開支係可以係公司 claim 番, 係二當家本 BOOK 入面, CLAIM 番既錢會當係 income (non taxable income), 換句話說, 出下 trip 等既expense 如果係預付後claim的話, 係二當家本 book 入面收入+開支都增加, 雖然唔代表係做數, 個amount都唔係大, 因為到最後交稅都只係睇 taxable income, 但呢個位真係不可不留意。

個人資產總收入

Asset -22.6%

<前人種樹>系列係 2022 年結束, 為左防止家人誤會, 年初時已經減股還債, 所以資產暴跌。但都慶幸一早賣晒D 野, 雖然都係輸錢, 但如果年尾至賣會更加輸得更加甘。

Debt / Asset:  1.65 > 1.18

<前人種樹>系列 2022 年結束, 但部份資金仲未還斷。再加上大當家將部份資金借我個戶口做定期, 所以仲有 1.18 既 debt/asset ratio。

Profit Margin (net profit / total income):  50% (上年 32%)
自己 Set 既 Target 係 35%, 今年超標完成!!!  

Profit Growth (YTY) +111%
今年同上年比仲多左 >100%, 宜家既策略係儲多6個錢, 希望下年可以夠錢置業!

NAV+8.5% (最主要既指標! 就算income 增加, 但最後都係被投資拖累) 

雜談

 

終於去到年底。

二當家年中回港, 近幾個月都忙家事, 公司事。9月搵到個單位租, 業主係退休人士, 揀租客, 個單位雖然係執過, 但全清水房, 所有傢俬電器都要自己買, 但大當家鐘意過個單位, 二當家就配合下。

雖然入住過程順利, 但訂左既傢俬部份要等成個月, 所以住起上黎無咁順暢。到10月中至叫完全 settle down.

另一邊廂, 回港後, 新既工作環境, 新既老闆, 新既挑戰, 由 9月到12月完全無停過, 開關後國外班大神又即刻飛過黎。飛過黎當然係為左睇下香港個場搞成點, 二當家梗係覺得「唔樂觀」, 當時 (10月~11月)又未完全開關, 大陸又繼續玩 lock down, 澳門7月 lock down, 位置又近近珠海, 真係人心煌煌。有趣既係7~8月果陣, 澳門同香港既防疫政策各走不同方向, 澳門傾向更加嚴謹, 香港則傾向更加開放。 20大後塵埃落定, 點知疫情竟然由白只KO, 重症變輕症, 主旋律已變, 進入香港由黃碼, 宜家連黃碼都唔駛, 身邊朋友紛紛出走, 去日本, 去泰國, 去韓國.....二當家則只有羨慕的份。

美國加息 0.5厘, 前幾次係0.75, 香港 HIBRO 1mth 去到 4.8%, PPI 7.4%, CPI 7.1%, 睇黎 2023年仲有排搞。投資, 好坦承咁講, 呢幾個月我乜都無睇過, 無睇年報, 連指數幾點我都無睇, 有點完全脫離市場。但二當家並不是放棄投資, 只係如果我買入既股票(公司), 每3~4個月就要換馬, 呢個非二當家所想。時不利兮, TSM, 700, 9988, 3隻既股價都表現唔好, 但業績是否唔好呢? 又好似唔係, 阿Q D 諗, 一日唔執既, 一日都仲有翻身既機會, 12 月做年結果陣至分享最後成績。

二當家寫文時剛剛睇完世界盃, 其實二當家無乜真心捧邊隊, 情意結係荷蘭, 因為名宿柏金。當代球皇 Messi 同 C朗, 一個帶住遺憾, 一個為自己既職業生崖帶來完美句號。而新世代球皇 - Mbappe 真係勁, 決賽仲做埋帽子戲法。有料既人都有種傲氣 (C朗, Mbappe, F1既 Max), 而二當家個人梗鐘意Messi 沉穩既個性。世界盃期間, C朗同曼聯決裂, 亦係世界盃花邊新聞之一。

世界盃正式完結, 又係時候回到平凡既生活, 迎接聖誕既來臨!!!

那些年的.....零息時代

 事隔4年加P 600萬樓每月多畀371元 (yahoo.com)

網上好多人都講, 加息供樓, 每年至多千幾二千蚊, It's nothing...對樓價無影響。

二當家心諗, 宜家D 人去做定期, 都要做個 benchmark, 3個月港元定期由 3.6% ~ 4% 不等, 當500,000咁計, 其實計落都係 0.4% 係差距, 即係 $2000, 但係大把人就係為左 0.4% 寧願去走多幾間銀行, 甚至 take additional risk。 

當你得一層樓, 0.4% is really nothing, 但當你有十億, 百億, 千億時, 0.4% is huge... 你估樓價係受前者定後者影響多D? 個重點是否真係每月供多幾千蚊?

如果 無風險利率+ Premium Risk = 租樓回報率, 當無風險利率=0, 租樓回報率 大約 2~3%, 最近幾年3%都無乜見過, 台北既樓回報率連2%都無。 要租樓回報率高, 一係劏 - 劏房劏鋪, 一係加租, 加租就要睇承租人既經濟條件, 而香港經濟真係麻麻地, 同國內又未通關, 暫時加租條件唔夠。

另一邊睇老美最新既 CPI 7.7%, 即係通脹減慢左? 有陣時二當家睇到市場解讀真係 R 晒頭, CPI 如果 YTY KEEP 住升 8% 真係超級恐怖,  CPI 2021年11月係升6.6%, 今年11月係7.7%, 個 base 己經增加 6.6% 既情況下再升 7.7%, 咁減慢果少少只能代表好少少, 但依然有排都未落到正常水平。

到最後, 都係果句, 升定跌無人有 crystal ball, 但睇外圍環境真係唔算好, 連貨幣既波動性都可以大到咁 (JPY, EUR, etc.), 小市民真係保本為上, 無謂手多多。連貨幣既波動性都可以咁大,大機構一睇錯邊就好易輸到甩褲, 二當家都諗緊今/明年會唔會有黑天鵝, 大家都係密切關注下市場。

二當家既 plan 都係先儲 9個月錢, 「或者/可能/有機會」係下年年中買樓, 希望到時樓價可以合理少少。

Interbank Liquidity 銀行同業市場流動資金狀況

2022-01-13 -377,516 mn

2022-11-11- 96,098 mn

投資日誌 - 2022-10-31 + 近況(13)

 

Oct: -30%

Sep: -23.4%

As of 2022 Sep, 

Currency	Symbol	Description	Gain/Loss	% of Portfolio
USD	TSM	TAIWAN SEMICONDUCTOR-SP ADR	-35%	11.7%
HKD	9988	ALIBABA GROUP HOLDING LTD	-36%	8.7%
HKD	659	NWS HOLDINGS LTD	-4%	7.9%
HKD	700	TENCENT HOLDINGS LTD	-42%	7.8%
HKD	1883	CITIC TELECOM INTERNATIONAL	-4%	7.5%
HKD	823	LINK REIT	-19%	6.8%
HKD	697	SHOUCHENG HOLDINGS LTD	-23%	5.2%
HKD	2318	PING AN INSURANCE GROUP CO-H	-30%	4.6%
SGD	P40U	STARHILL GLOBAL REIT	-22%	4.3%
USD	PDI	PIMCO DYNAMIC INCOME FUND	-25%	3.6%
		Top 10		68.1%
		Others		28.7%
		Cash		3.20%

二當家其實無乜好講, 個 portfolio 跟住個市場跌, 只要 FED 繼續加息, 成個股市都會受影響。最恐怖既係連外匯市場都咁波動, 分分鐘又有銀行/保險計錯數爆煲都唔出奇。另外, 資訊宜家已經無咁透明, 內房債既影響有幾大, 暫時真係無人知, 外人睇好似無乜野, 但係 who knows? 全世界都係睇緊呢4 樣野, 中美, 俄烏, 通脹, 息口, 最多加埋台海局勢。

投資悶局, 反而人生體驗多左, 更加理解自己。例如近來要訂傢俱, 見到D 運輸既哥哥仔既態度真係差到呢, 咁厭世不如唔好打呢份工。職業係無分貴賤, 但人格有分, 做保安既有D盡忠職守, 見樣就知你住幾樓幾室, 見你手上拎住野仲會幫你開門, 有次八掛問個保安點解成日都見到佢, 佢話一更要12小時。而有D保安就..........坐係到聽歌訓覺, 明既, 大家覺得受人二分四, 驚自己做多左蝕底, 今時今日要搵到個有「要做好呢份工」呢個想法既人真係唔易。

另外二當家有個特點, 好易就睇到人既不好個性 (反而發掘別人好處對我黎講仲難), 二當家常常用別人的不好來警惕自己, 所以搞到自己好 stress。例如有人明明已經 set 好左個目標俾自己, 但又見唔到佢既努力, 又或者唔肯捨去一D 娛樂去換取成功。每次提醒要向住目標進發, 之後又有一大堆理由, 例如工作忙, 放工好攰 (萬用KEY), 拖了又拖, 最後二當家都係提都費時提, 反正目標係你既唔係我既, 二當家既人生目標已經達成大半, 剩下小半只係 matter of time。  成功背後, 一定有努力, 亦有犧牲, 而運氣也佔左一個好重要既比例。

「講你又唔聽 聽你又唔明 明你又唔做 做你又做錯 錯你又唔認 認你又唔改 改你又唔服 唔服又唔講」

在職場上, 個個都想成功, 而成功最重要既一件事, 就係「改變自己」。在二當家既職場生涯中, 真係遇到過不少「講你又唔聽」既例子。「改變自己」真係唔易, 因為首先要有 awareness, 個個都以為自己係世一, 間公司無左我唔得, 又或者唔憂做, 事實上呢個世界無左邊個都得。再者, 知道要改變自己, 同實際上要改變自己係兩樣野, 有好多人覺得 「改變自己」好委屈, 如果係有料有本事，去都邊都可以成功，否則，大家最後都係要係公司制度下求存。

最後想呢篇文其實已經打左個幾月, 一來自己忙於工作, 二來公司 block 晒 USB / public cloud drive, 搞到要用番屋企部 MAC, 身為一個 WINDOWS人, 點都唔習慣 MAC 既 standard, 最簡單既 ctrl+c, ctrl +v, mac 機就要用 command+c/v, 速成出字既排序又唔一樣, 天呀....莫非要整部牙石俾自己用。