2018 我的回顧 (上)

2018年, 我有進步嗎?


生活及工作

打工仔(普通打工仔)要財自難, 打工+投資亦未見得一定可以財自。只要計一計條數就知道, 基本上一定要靠資產增值, SIDE BUSINESS, 或橫財。

當自己REALIZE 呢個問題後, 就要諗條路點行好。主動收入, 還是希望會增加, 因為暫時係二當家唯一累積財富既渠道, 大當家份糧暫時只係夠養自己。主動收入要增加, 一係轉工, 一係升職, 所以二當家同時進行緊呢兩樣野。「魚唔過塘唔肥」, 係打工仔永恆既真理。

而生活上, 因為二當家怕多人, 而住緊果區, 不論元朗, 屯門, 荃灣等都超級多人。多人到二當家不能忍受的地步。所以忽發奇想, 公司有冇機會可以安排調職 (環境唔轉, 就自己轉)。由年中開始, 二當家就密謀緊調職安排, 包括同大當家恊調一下, 係公司收下風 (因為過往公司既 EXPAT 多數都係俾老外), 自己又放下風聲, 一齊安排好之後就係等機會。Relocate, 我有本事嗎?

以 EXPAT 黎講, 其實最大機會係上海, 新加坡等大城市。但由於二當家既調職私人原因係改善生活環境及慢活一下, 自己都唔係太想去呢類大城市。到10月份果陣, 公司突然間有個機會o係台灣, 二當家當然第一時間去爭取, 宜家已經進行中, 亦都見左果邊既老闆, 暫時可以做既只係等待結果。

成個過程中最大既難題係大當家既收入問題, 因為台灣人工出名低, 就算大當家去搵工, 都未必可以搵到一份收入一樣既工。而如果最後去左台灣後既家庭總收入仲少過係香港, 又會令我無乜誘因去台灣, 只係慳左份租。解決方案暫時有

1. 大當家問下宜家間公司係台灣有冇合適既 POSITION, 但人工一定唔會高
2. 大當家去搞小生意
3. 大當家接香港 FREELANCE

而去台灣除左想改善生活外, 另外仲有一個好處就係洗費低。二當家上一篇文 <我的發達大計>其實就係想睇下二當家既思維可以去到幾遠幾闊, 要減低住屋呢個 FIXED EXPENSE 係香港唔易, 一係同屋企人住, 一係租細D, 再唔係住工廈。 如果公司俾錢我去第二個地方住, 而自己又有咁既想法, 何樂而不為? 以HK$13,000 一個月租金計, 3年可以慳 47萬, 已經可以慳到筆小小首期。

一切都係 ON-GOING, 希望 2019 有新景象。

學業

MASTER 始終唔捨得俾錢讀, 最後決定讀個 PMP 算。計晒所以洗費一萬蚊搞掂, COURSE 已經讀完, 宜家等緊報考, 應該會安排新年後考試。

不得不提報讀前上網搵 REF 既時候, 搵到魔兄係 SINA 既文章, 非常之有用。講 details, 魔兄真係第一人。
魔術師的伊謝爾倫日記 - PMP快速攻略

人生大事

仍然未有消息。可以做既 TEST 都做左, 可幸的是沒有大問題。除左努力外, 就係令自己健康D。之前已經有整D 花膠俾大當家補身, 點知阿中醫話大當家係身子麻麻地, 開藥俾佢補都無乜反應, 建議自己買D 貴D既藥材, 如鹿茸等, 係秋冬進補。鹿茸暫時係我買過最貴既藥材, 成千蚊得果一兩, 分得4, 5次煲。

之前睇果幾個中醫都係阿伯, 但一D都唔平, 最貴果個係400蚊一劑, 連睇7日就已經2800, 2個人就5600.........呢D就係「燒錢」。而宜家睇果個係中年女人(博士級), 感覺上呢個係最 PRO, 一黎可以話佢係專睇呢科, 二黎佢西醫方面佢地好有認識, 所以我地做完既 TEST 都會俾佢睇下。

樓
一切隨心, 我仲係覺得貴到離譜。屯門區垃圾蚊型單位, 睇下最後邊個接手。
以前覺得樓係必須品, 因為家人, 朋友, 媒體不斷叫你買樓, 自從有 plan relocate 之後, 個人反而無緊 stress, 因為有 plan on-going, 至少叫做有進展。

前文提及既<前人種樹，後人乘涼>, 問親人借樓, 建議已提出, 一如所料, 親人既反應係普通, 始終覺得借錢係一件唔好既事, 又話怕失業等等。二當家明白老人家梗係唔想 take risk, 仲要係用佢層樓, 所以二當家都會順其自然, 再加上親人仲未買樓, 我唔會因為想借錢而迫人買樓。

但親人那邊廂又話預左舊錢俾你第時買樓 (第時? 幾時?), 我都唔想解釋咁多, 唯唯諾諾應左佢就算。

興趣
其實二當家已經學左一種樂器5~6年, 阿 SIR 叫我試下考級, 5級或者8級。但係學樂器既過程係無捷徑, 二當家以工餘時間學, 純粹係為興趣, 如果要考級, 基本上一日要練一粒鐘以上。仲考慮緊, 呢個可能係二當家 2019 年既 BREAKTHROUGH TARGET. 😎