敗走台灣 - 台北搵樓記 (上)

二當家黎台灣話咁快已經一星期, 新工作忙到不得了! 一直想打篇「搵樓記」記錄一下之前搵樓既情況, 點知拖下拖下又一星期。

要理解台北, 簡單黎講可以從呢3點著手, 1. 地理環境, 2. 分區, 3. 捷運線,

1. 以地理環境黎講, 台北「市區」係被兩條河包圍住, 淡水河以東, 基隆河以南果一帶既平地就係台北最黃金既地段。而河既外國陸陸續續發展緊既就稱為新北市。而台北係以台北車站為中心點, 所以係地圖上成日見到D咩一段, 二段, 三段, 其實都係以台北車站作為分界線, 越近台北車站既路數字就越細。

2. 以上為台北分區, 最旺既為士林區以下, 文山區以上, 南港發展好慢, 內湖係高級住宅區。

由於小弟係黎做野, 而非退休, 所以盡量都會搵番D近公司既地點。而二當家做緊果間公司位於松山區, 所以一開始既時候已經鎖定左幾個區, 包括大安區, 信義區, 中正區, 內湖區。最旺, 最多人建議既一定係大安區, 因為真係中心個中心, 去邊都非常方便。

3. 以捷運黎睇, 最黃金既地段就係由「中山」, 「南京復興」, 「大安」及「中正紀念堂」包圍住既區域。當然, 信義區101/大直 等亦係非常旺既地點, 所以二當家只係可以好粗疏咁介紹一下。


二當家黎之前, 所有人都叫我先上 591.com.tw 睇下樓先 (當地人都係咁講), 至少對台北既價位有一定既感覺。以買樓計, 台北市大慨賣緊 80萬~100萬 台幣一坪, 一坪約36尺。亦即約5000蚊~7000港紙一尺。但係二當家黎到台灣實地睇樓, 至知坪數其實參考價值好低。一黎宜家新起既樓都包含左「公共設施」, 一般黎講要打7折或更多。二黎, 其實佢地d 「則」都可以好癲, 可以向高或低發展, 要睇樓底幾高同本身既設計係點, 可以有時見到10坪既樓, 事實上可能用到17坪。但亦有機會寫住20坪既樓, 去到用得10坪。

至於租金, 二當家因為要經「仲介」(即經紀)去租, 睇既樓一定係比較新既, 租金約為TWD2000~4000 一坪。大當家黎之前既目標係TWD35000 以下, 15坪以上既兩房單位。

一句講晒, 平就一定平過香港, 但要買樓租樓一定要實地去睇。