近況

近呢幾星期都冇野好 update, 所以講下近況。


近來二當忙緊幾樣嘢

1. 人生大事 - 之前都有提及過, 二當家同大當家想要一個小朋友, 但暫時仲未成功。已經睇左好一段時間既中醫, 西醫, 如果仲係無消息的話, 到最後可能會決定 IVF, 上網係咁易望左個價, 都要差不多六位數字, 如果生果陣要住埋私院的話, 廿萬應該走唔甩。比起住屋, 讀書, 暫時呢個係二當家既 FIRST PRIORITY
   
2. 娛樂 - PS4 近來出左隻 RED DEAD REDEMPTION2, 二當家每日沉迷做牛仔同打獵。可能香港太過石屎森林, 一玩呢隻 GAME 就好享受入面個世界 (宅)。
   
3. 讀書 - 經過幾番思量之後. 決定唔讀MBA...........住。而去讀一個短期課程, 雖然呢個課程唔算出名, 但總算同二當家目前嘅工作有一定嘅關係。雖然明知讀完唔代表啲乜嘢. 但都畀自己一個短期嘅目標去進步。
   
4. 工作 - 因為公司發生左一D事, 二當家近來飛得密左, 好好彩咁每次都係飛短程。兩日一夜, 否則實被人投訴。

二當家而家做緊嗰間公司尚算不錯, 但公司內部嘅政治鬥爭令到二當家嘅晉升機會不大, 加上就算升, 都係加你 7 / 8 個%, 薪金永遠追不上樓價既呢十年學到既教訓。另外, 二當家不得不承認自己係一個負面撚, 但近日有略為改變, 原因係二當家喺一個training嘅場合, 認識到幾位同工作無關係嘅同事, 有一次我哋去傾野嘅時, 二當家講左工作上既不如意俾同事聽, 個同事用左一句就點醒左我 「環境唔轉, 就自己轉」。

二當家當時有如一頭棒喝, 突破間就諗通咗好多野, 既然職場上晉升嘅空間有限, 咁就唔好浪費自己時間, 一係轉工, 就算唔轉工, 都要令自己進步, 所以即時就去同一個短期課程, 增加自己既本錢。另外就係環境上, 我既然無能力去改變美國既息口, 香港嘅樓, 香港嘅金錢嘅進出, 香港嘅貨幣基礎, 咁不如去改變自己, 所以暫時二當家好努力咁去爭取緊一個調職嘅機會, 雖然到最後唔知會係點, 但係有目標咁去過活, 都好過HEA住咁樣去過人生。