投資日誌 - 惘然的半年結 2019

二當家在2019半年內, 發生了好多事。

由有移民嘅想法, 到決定去台灣做嘢, 再收到公司一個俾「閹割」嘅Offer, 到最後五月中到步台灣。

係大當家過嚟台灣前用佢最後嘅借貸力借咗一筆錢, 及將兩人既 MPF全部提出, 希望用呢筆錢可以喺台灣同大當家有個比較好嘅生活。六月份香港發生一百萬人及二百萬人既大遊行, 慶幸自己唔係香港, 減輕了一點心痛嘅感覺, 至少減少被傳媒洗腦既機會。

按揭借左200萬, 只係拎左130萬來投資。另外D錢 放左係大當家個MORTGAGE LINK戶口到作為備用現金。目的還是「進可攻, 退可守」, 依舊錢其實作為一個首期雖然未必夠, 但係大當家如果收到係香港嘅MPF, 再加埋手頭上嘅現金都有百多萬, 應該勉強夠俾香港既首期(如果真係買的話)。

而二當家拎咗個130萬, 加埋MPF嗰40萬, 再加埋自己本身嘅股票倉, 宜家大概有250萬係投資戶口, 暫時嘅諗法係盡量買一啲高息產品 (LTV 1.85), 希望回報可以去到5至6% (Asset 計)。當然係IB 到其實仲可以槓, 但因為錢已經係借番黎, 所以都係睇定D先, 暫時先保留住呢個權利。

錢到手後我無再 time the market, 隨即入左 SG REIT, 香港既 REIT, US 既 PREFERRED STOCK / CEF, 大部份都係風兄到「抄」考番黎。但係老闆同風兄都有入果隻 GOF 我就無買, 始終見佢近黎 ROC 有得點 (27%), 可以買左其他無咁好回報既 CEF。

至於會否在台灣買樓, 暫時仲未有決定, 因為而家仲係適應緊喺台灣既生活。大當家暫時無業, 養好個身子, 如果再無小朋友就可能會係台灣做 IUI, IVF 等人工受孕, GOD BLESS。

暫時最理想既情形係高息產品足夠負擔到我同大當家既生活駛費, 我份人工就用黎還層樓既錢+家用, just in case 我有d 咩事, 大當家就利用收到既息還供樓既錢。

圖來自飛鳥兄

股票方面, 雖然我有係26000左右加倉. 不過果陣手上嘅資金未到手. 所以無係靚位入足子彈。到大市回到差不多28,000左右資金才到, 亦係果個位加大左港股既倉位。

我記得飛鳥兄之前係個群組裏邊分享過一幅圖, 講既係一個黃金比例嘅圖大師由高位32,000回落根據過往經驗其實落到去26,000點左右已經係一個底, 如果根據指標去入貨嘅話, 深信大家都一定會有相當既斬獲。二當家非圖表派, 但用黎參考下入貨既位, 我覺得未嘗不可。到大市插穿二萬七時, 亦都有叫家人加點倉。

宜家全球經濟由「加息」轉吹為去「減息」。另外大家期待已久嘅 G20, 出嚟嘅結果亦都好正面, 估計大市又會再繼續會上。以前二當家既心態係拎住 CASH 等入貨, 宜家既心態係盡量唔好拎 CASH, 只要一日各國唔收水, 唔加息, 現金應該都仲係最不可取既一個投資工具。

把資產集中在IB後, 還在研究 IB 各樣不同的功能

Time Weighted Return (TWR) -1.99% 😭

敗走台灣 - 我的第一份糧

(網上圖片)

等了又等, 終於出糧。

5月份開始已經過左黎台灣, 但由於要等體檢, 居留証等文件才可以在台灣開戶, 所以搞下搞下等左個幾月。在6月中戶口才開通, 6月底 (即今日) 終於收到第一份糧 @ TWD 😆。

一拎份糧單就發覺少左錢, 即刻望一望張單, e, 點解扣左 Income Tax 既。我明明記得台灣D同事講係5月份至要交/俾稅, 所以無理由扣左咁多架WO, 即刻打俾 HR 問究竟。

HR 既解釋係, 由於我係外國人, 在台工作 183 天之內都未被認定為「居住者」, 所以薪水都會先被扣掉 18% (withhold tax)。

而183天之後既工資, 可以根據「居住者」既規定來扣, 即

1. 按全月給付總額, 依薪資所得扣繳辦法查表扣繳；(即係根據你所屬既稅階)
2. 或按全月給付總額扣取5﹪ (即係點都扣你5%, 咁似 MPF 既)

而183天既計算, 係以每個課稅年度去計算 (每年1月1日~12月31日), 即係我即使2019年內達成183天既要求, 2020年的首183天還是要先扣 18% 😭。

問完出糧, 順便問埋父母既扣稅額啦, 因為我下年5月份至要開始報稅, 到時才有機會見到 tax advisor。 我問 HR 駛唔駛每月匯款去香港做証明, HR 既回答係基本上只要係該課稅年度 (每年1月1日~12月31日) 將一個份額打去香港既戶口(高於父母免除稅), 証實你有供養父母就OK (如果有父及母, 最好將筆錢分開打進不同戶口)。

好彩我問一問, 因為如果今年內 (12月底前) 無做到呢個動作就白白浪費了父母免稅額。詳細既步驟大慨係不管是台灣的戶口或是香港的戶口, 只要証明到我有打錢去父母香港既戶口就可以。而要求既金額係要高於免稅額, 70歲以上為 TWD132,000 / HKD~33000, 70歲以下 TWD88,000 / HK$~22000, 而且要證明父母還在生 (例如: 睇醫生既單, 機票等)。用同一份收入去計, 香港不論稅金, 免稅額都比台灣優惠, 不愧為稅務天堂。如果有興趣來台工作, 記得自己先計一計條數。


https://www.etax.nat.gov.tw/etwmain/front/ETW118W/CON/444/8445482004577549874?tagCode=

民國108年1月1日起外籍人士所得報帳注意事項
說明：

• 依據勞動部107年9月5日勞動條2字第1070131233號函、所得稅法第7條及各類所得扣繳率標準第3條第1項第2款規定辦理。
• 配合勞動部公告每月基本工資自108年1月1日起調升為23,100元，爰此，自該生效日起在中華民國境內居留合計未滿183天之外籍人士，各單位申報所得時，全月薪資給付總額超過34,650元（基本工資之1.5倍）者，應扣繳18％稅額；未超過34,650元者，則應扣繳6％稅額。
• 外籍人士得否以居住者身份扣繳所得稅，係以「一課稅年度」在中華民國境內居滿183天為判斷標準，即107年度與108年度須分別計算，請勿以107年度已滿183天，108年度即逕予填寫已滿183天。
• 各單位於申報108年度外籍人士所得時，請重新確認該外籍人士108年度(指108年1月1日至108年12月31日）在中華民國境內居留是否會滿183天，並依其身份適用之扣繳率標準扣繳稅額。（為確保境內居留滿183天，請依其護照出入境紀錄計算之）

MONEY101_輕鬆解析2019年所得稅級距與試算方式(持續更新中

108 年度（2019）所得稅應納稅額級距與累進差額試算
公式：應納稅額 = 綜合所得淨額 X 稅率 – 累進差額
綜合所得淨額	稅率	累進差額
TWD0 – TWD540,000	5%	TWD0
TWD540,001 – TWD1,210,000	12%	TWD37,800
TWD1,210,001 – TWD2,420,000	20%	TWD134,600
TWD2,420,001 – TWD4,530,000	30%	TWD376,600
TWD4,530,001 以上	40%	TWD829,600

單身族群：

免稅額：一般扣除額 88,000+ 標準扣除額：單身 120,000＋薪資所得特別扣除額 200,000= 408,000。平均月薪不到 35,000元應該是扣不到稅。

雙薪無小孩族群：

免稅額：一般扣除額 176,000 (88,000＊2)
+ 標準扣除額：有配偶者 240,000＋薪資所得特別扣除額 400,000(200,000*2) = 816,000。

雙薪扶養一位小孩或長輩族群：

免稅額：一般扣除額 264,000 (88,000＊3)
+ 標準扣除額：有配偶者 240,000＋ 薪資所得特別扣除額 400,000(200,000*2) = 904,000。

雙薪扶養一位 未滿 5 歲學前幼兒

免稅額：一般扣除額 264,000 (88,000＊3)
+ 標準扣除額 ：有配偶者 240,000＋ 薪資所得特別扣除額 400,000(200,000* 2)+ 幼兒學前特別扣除額 120,000= 1,024,000。

庸人自擾 - 如果我有三千萬.............

以前細個, 成日同大當家發夢, 假如有日我地中左六合彩會點做, 其實都係不外乎

1. 買樓
2. 唔駛做
3. 環遊世界

人大左, 諗既野又唔同左, 假如我係六合彩中左三千萬 (Asset = 100% Equity + 0% Debt)

1. 買樓 - 三千萬又唔夠買到 dream house, 就算買到但又唔可以唔打工, 最理想係用盡人頭同 MARGIN 借爆佢, 剩低既買穩定派息既股票, BOND, REIT, CTF 等等等, 希望一個月收到 6~8 皮
2. 唔駛做 - 可以打風流工, 番工同人吹下水, 最好薪高糧準, 方便每兩年又轉按一下。真係頂唔順老闆的話最多咪唔撈。
3. 環遊世界 - 打得風流工,  環遊世界唔係問題, 最多請 NO PAY LEAVE




但假如三千萬係按出黎 (Asset = 20% Equity + 80% Debt), 即係要俾息, 首要任務係搵投資工具以息養息。

1. 買樓 - 按出黎既錢, 即係人頭上或借貸上已經有限制, 如果買多間, 風險就會增加。
2. 唔駛做 - 按出黎既錢, 即係要還, 雖然可以以息養息, 但一般人仍然會希望有份主動收入, just in case.
3. 環遊世界 - 係保住份工既情況下, 去旅行應該唔係問題, 但要請假去環遊世界就有點難。



呢個世界, 有錢既有錢既煩, 無錢既有無錢既煩。但如果有得揀, 我梗係想有錢咁煩。

打工仔的兩難 - Long Term Retention Bonus Scheme

好耐無講錢, 首先講下自己既財政收況

依然無樓, 無車, 利用老婆離開前既僅餘借貸力借左兩球 (詳細看前人種樹系列)。五月份開始係台灣生活, 走之前申請左提出取回強姦金 😻, 五月中收到 MPF 公司既信叫我提交「居留証」資料, 而我張「居留証」因為要先過左台灣再可以出到 (因為要做體檢等), 5月底提交「居留証」資料, 6月11號已經收到晒錢。而大當家既「居留証」O岩O岩至出, 好快佢都可以拎番D 強姦金, 子彈現在已經儲到七七八八, 等 RIGHT TIMING..........

正題

二當家打緊工間公司有一個「長期留任獎金計劃 / LTRBS」, 金額真係唔多, 不過同大家分享下。

簡單黎講, 係公司為左留住你, 會俾一D著數你希望你繼續幫公司出力, 通常佢會交出兩個選擇

1. STOCK OPTION, 3年後, 每年可取 1/3, 7年內要完全行駛
2. CASH, 3年後俾你 (當然係 DISCOUNT左)

問題係你決定前永遠唔會知行駛價係幾多, 根據公司既講法, 行駛價會根據授予日期的開市價或更高。

"The Strike Price is determined on the Grant Date and must be at least equal to the opening market price on the Grant Date and may be higher"

上網睇下公司既過往既股價, 感覺上公司股價都係浮浮沉沉, 近呢幾年都係一直徘徊在80蚊左右。

2013 - 88.7
2014 - 105
2015 -  81
2016 -  58
2017 -  83
2018 - 85
現價 - 82

如果在2016年, 以當時既股價作為行駛價 ($58), 以2500股黎計, 今時今日係值 ($82-$58)*2500 = $55200, 但如果只可以行駛1/3, 只係得HK$18400, 真係唔多吸引。假如當年佢另一個 OFFER 一筆過實收 $42000, 你會點揀?

二當家考慮既因素有三點, 1. 行駛價/市價 是否夠低 2. 未來公司的業務發展 3. 你會在這間公司服務多久

如果以 OPTION 1 黎計, 基本上要鎖你 3 ~ 5年, 無謂為左小小錢浪費青春 (你估間間都係 FB 咩), 揀 OPTION 2, 挨到夠期就可以拎舊錢走, 挨唔到都無傷大雅。

而今年既 SCHEME 又變, OPTION 2 由 CASH 變左做 STOCK, 而且一樣係第3至5年至可以變現, 每年會拎到 1/3, 即係同公司共同生死。行駛價如果以 82 作定價, 講真OPTION 1真係唔多吸引, 而且計 NET GAIN, 現價要升 25% 至會令到 OPTION 1 比 OPTION 2 吸引, 基本上我會覺得係迫你揀 OPTION 2。如果我係高層, 可能我都會考慮下 OPTION 1, 但作為一個小薯, 呢一刻我只會諗點樣可以盡快 REALIZE 呢筆錢。

人生的斷捨離

搬來台灣後, 把原本在香港的雜物全部都帶來了台灣。台灣新居雖然跟香港的差不多大小, 但空間分佈不同的情況下, 有好多野都唔知放邊好, 最後二當家決定黎一次斷捨離。

講<斷捨離>, 不得不提NETFLIX 一個非常出名既節目 <Tidying Up with Marie Kondo / 怦然心動的人生整理魔法>, 老實講, 當我知有呢個節目事我真心覺得非常之ON9, 乜 DUM 野都要有人教架咩!? 仲要搵個日本人去美國 😵 。 該節目由日本「整理諮詢顧問」 近藤麻理惠主創, 每集都去一個人屋企到幫你 DUM 野, 我前後睇左一集多D, 招數來來去去都係兩招 (可能我未睇到)

1. 迫自己正視問題
2. 信自己感覺去留底要用既野, 其它既野懷住感恩既心拋棄佢

先講正視自己既問題, 就二當家黎講, 我既問題係
1. 收藏了相當數書既書籍及 VCD 
2. 唔壞既野唔會 DUM。

書, 有大部份睇左一次唔會再睇, 又或是係買左又唔睇。二當家已經有相當日子無拎實體書出街, 一部 KINDLE 幾百本書, 有部份既書二當家又有實體版, 又有電子版, 最後只係會係 KINDLE 到睇書。而 VCD 就更加連睇既興趣都無, 記得前陣子二當家放假, 拎左隻N年未睇既 VCD 出黎, 睇左15MINS 頂唔順, 上網搵下有冇HD VERSION。 時代/科技進步, 舊既野就被淘汰, 有陣時唔 DUM 只係心裡面覺得自己總有一日會用, 又或者覺得浪費。但當空間有限時, 空間既重要性往往比其他東西重要。書, VCD 只是載體, 內容才是最重要的部份, 竟然已經看過讀過, 又不會再看, 留來何用?

至於麻理惠既第二招, 就係將物件放到手上, 看看有沒有心動既感覺😹。二當家無佢咁情感豐富, 不過我DUM 之前都將三四箱書同VCD放係面前, 一一篩選, 留番十本八本覺我會睇既書就算。


雖然二當家對個節目真係無乜興趣, 不過以上2招都可以應用在人生其他方面。

在 6/4, 6/9 及 6/12 在香港發生的事, 二當家看在眼裡心裡百感交集, 而回望以前的文章, 二當家不只一次對香港感到有不滿。上年7月寫了一篇「我心己死 - 傷港」, 11月寫了「香港問題「面斥不雅」」, 及前陣子的「敗走台灣: 講政治」等等等, 一堆又一堆的問題。

在此先不討論對錯。只是想說我決定來台灣之前, 其實也問了自己一句

Hong Kong, Does it spark JOY?

前人種樹,後人乘涼 （四）

黎到「前人種樹,後人乘涼」嘅最終章, 回顧返二當家當時嘅想法

1. 想製造現金流, 但單靠收入並不足夠。尋求資本增值嘅快速方法
2. 由於收入及儲蓄嘅進度非常緩慢, 所以考慮可否杠桿
3. 如果係IB到槓桿, 去到LTV 2 嘅水平已經係頗高, 即係可以將資產增加一倍
4. 最簡單嘅快速增值方法就係買樓, 因為一般而言可以做到八成, 甚至九成, 即係LTV 可以8～9
5. 但二當家想享受高樓價嘅益處, 但係又唔想承擔係呢一刻買樓嘅風險 （高位買入非自住）
6. 所以就尋求將家人嘅磚頭變現嘅方法, 及請教了R兄
7. 一開始係諗住自己屋企嘅已供滿居屋。但由於未補地價, 要先補後加按, 未見官先打八十
8. 到最後有親人有需要買樓, 並且只可以full pay （退休人士）
9. 同大當家商量好後,就決定同親人解釋我哋嘅諗法
10. 同時間二當家收到有機會去台灣嘅資訊, 所以亦將呢個資訊通知親人
11. 最大嘅風險係二當家走佬, 層樓俾銀行收番, 所以一切都係只係講個信字
12. 最後決定借貸人為大當家, 因為當我地搬去台灣之後, 大當家就會冇收入, 希望係離開之前可以用盡大當家嘅借貸力
13. Cash in 左舊錢可以進可攻, 退可守, 加上我哋而家仲有兩個人頭, 一份海外收入
14. 由於二當家五月份就要去台灣做嘢,時間其實有啲緊迫, 因為收樓嗰度有啲意外要延遲, 二當家一直都好緊張因為大當家已經係五月中都辭咗職, 並會過黎台灣
15. 雖然按揭已經係批出咗, 但好怕銀行會發現大當家已經沒有收入
16. 到最後, 層樓終於係5月底到收左樓, 而我地都已經身左台灣

Its all about timing！

故事暫告一段落

敗走台灣 - 台北搵樓記 (下)

前言: 二當家襯住復活節既假期同大當家去左台北搵樓住, 係短短三日既時間入面睇左 1X 間樓, 以上係我地睇過既地點

___________________________________________________________________

6. 小巨蛋附近 (大安區)

17坪1房 (樓中樓) 約600尺, 43000+2500NTD 管理費

講地點, 呢區其實我唔係好熟,   因為呢到唔算係重點商圈  (如忠孝復興 / 101附近 / 西門町), 以前黎台灣果陣都係只會經過而唔會停留。 呢間屋其實都係在大馬路旁, 附近都係小店及銀行,  如果係行去捷運站大慨要10分鐘, 不過坐公車應該會非常方便。

屋內都係分開上下兩層, 好彩樓底夠高, 上下兩層都可以企得直果人。間屋有兩邊窗, 但其中一邊被另一座大廈擋住, 而開揚果邊就有三間房 - 包括浴室, 廚房同書房(/客房), 大部份廳既光線都係由呢3間房到透入黎。

呢個浴室又係O係香港未見過既, 睇<安樂鍋>, 都知好多人都會係浴室到整個「日式風呂」既風格, 即係得2尺空間既溫泉😹。而呢個下陷式的風呂我見到既時候真係呆左, 因為高身落地玻璃加一個可以容納2~3人既浴池真係勁多香港人夢寐以求既野。雖然我覺得衛生上有D怪怪地既感覺 (因為馬桶就係一米外), 而且浸浴呢家野, 一個月都唔知用唔用到一次, 但此設計確實令人好 impressive。

廳, 電視機左手邊是浴室及廚房, 右手邊是書房/客房

相外既右手邊有條樓梯往上層

下陷式風呂+落地玻璃, 但就算唔浸淋浴都要行落去

廚房+小洋台

書房/客房, 兩邊落地玻璃

 上層睡房+衣帽間/雜物房

上床景觀, 左: 同客廳同一個景, 比另一座大廈擋住左

右: 與書房同景

上層夾硬整左個套廁, 但係比條「陣」擋住左

7 大直區

43坪3房2套, 尺, NTD45000+1000 管理費

呢間其實我出發之前已經睇中左, 雖然知道 OUT BUDGET, 但勁想去現場睇。間屋位於大直區, 露台對住河景。去到至知原來係國宅黎, 成1500尺, 3房, 所以開價一D都唔平, 個則四四方方, 非常好用, 最正都係河景, 河旁邊就係公園, 如果放工想去做下運動, 慢活一下其實非常之不錯。

至於生活機能, 其實主要還是聚集左美麗華百樂園 (劍南路站旁), 行路過去約10分鐘。所有野都十分好, 但係個屋苑就比較幽靜, 因為呢個國宅既設計有D 似一個無商場既第一城 (大型屋苑), 附近只有住宅, 靜到有D 似老人村....對我地兩個由香港過黎既人黎講, 真係有D難以接受。況且到時候我要番工, 剩係留低大當家看屋, 雖然佢地會出街, 但住大直下下都要過條河去番台北市區, 又真係唔算十分方便。

另外有朋友同我講, 文湖線其實係郊游線, 卡數同車身空間都會較少, 加上係O係架空路軌行走 (類似泰國 BTS), 所以唔會太快, 打風仲會停駛。仲有此線會經過松山機場, 假日都多日拎住行李坐此線, 所以我D朋友唔太建議我地住文湖線沿線。

國宅既環境大約係咁

無敵既景觀, 附近係松山機場, 見到飛機升降

四四方方既大廳

其中2間房都見到呢個景

超大廚房, 仲另外將洋台改埋為室內, 位置更好洗 (涼衫都唔駛收衫)

8 內湖區

15坪2房, 尺, NTD35000+2X00 管理費


友人同我講內湖係高級住宅區, 去之前我做過小小 RESEARCH, 的確由於內湖有科技園區, 所以越黎越多高收入人士會住果邊, 但係講緊既應該係指內湖4區/5區等, 果邊會較多新樓及大單位 (20坪以上)。

今次睇既係內湖捷運站旁既一棟全新樓, 而且仲賣緊, 只係有小部份單位入左伙。老實講, 睇相已經無乜興趣, 不過想黎呢區感受下係點。內湖捷運站旁其實仲係好 LOCAL, 唔好期望有大型商店, 百貨公司等。只有小店, 銀行, 街市, 平時應該唔會係呢區逗留。

間屋其實唔算細 (如果用香港既尺度), 但個價錢都唔係平 (因為係全新樓)。最大既問題係佢提供既傢俱唔多同太好用, 儲物空間又唔多, 而我地又超多野。

長條型既廳, 窗既右手邊係廁所黎(怪怪地), 去廁所一家會阻到睇電視既人
廳既另一邊(我影相個位後面)係開放式廚房 (無窗), 煮食野成屋都會有陣味
大門係右下角個格仔櫃旁, 我見到個格隔第一個問題係, D 鞋可以放係邊呢? (唔係放係個格仔櫃呀)

廁所正常

房都正常, 無 COMMENT

書房, 內府小洋台一個

後記

我地去台灣睇樓, 第一個感覺係, 個經紀係廢既, 乜都唔介紹, 只會答你問題。
佢地已經做外商既租賃業務, 至少都要介紹下呢區既野, 但係佢都好多時都好似啞左咁, 香港呢方面真係積極好多。而我地有大慨一半機率會係睇樓果陣見到業主, 業主通常都係好熱情 (因為知道有外商水魚), 會好主動咁介紹自己間屋, 又講下自己既 DESIGN。 就算業主係有錢人, 一切都係客客氣氣, 有問必答, 近乎有求必應。

例如我地睇中果個單位, 業主主動提出換電視, 換洗衣機, 做多2個入牆櫃, 而我地對乜D野有要求, 佢都話可以一次過做埋。我地完全無諗過咁易話為.........

另外, 租樓仲可以講價, 我同經紀講我地 OUT BUDGET, 叫佢傾下, 到最後成交價差左成10%, 當然佢有可能已經 MARK UP 左, 但睇多左幾間後, 我地至少大慨知道 MARKET PRICE 係邊, 邊D 係瘋狂 MARKET UP, 邊D 係合理價 (例如古亭又租38000, 大安又租38000, 一睇就知咩事)。

終於完左搵樓記。

敗走台灣 - 最低工資

在台灣 MOS BURGER 門口看到招聘廣告, 日薪TWD 1050, 即時薪HK$ 37.5? 翻查一下, 原來台灣最低工資在 2019年開始定下時薪最低為 TWD150, 即 MOS BURGER 用緊最低工資黎請人。

但點解同香港差唔多架!? 如果一個月做 20 日 PART TIME, TWD1050 * 20 DAYS = TWD21000 / HK$ 5250, 同台灣最低工資定下既月薪差唔多 (TWD23100/HK$5775)。但係O係香港最低工資月薪就多台灣差不多3倍, 其實條數點定? 😵




1台幣 =
0.249523137 港幣

• 中華民國的基本工資制度依據《勞動基準法》及《基本工資審議辦法》，於每年第三季由勞動部邀請各界人士組成「基本工資審議委員會」進行審議，如會中決議調整，則將結果交由行政院核定公告後實施。現行基本工資為月薪新臺幣23,100元、時薪新臺幣150元，2019年1月1日實施 (月薪港紙錢 5775, 時薪約37.35)
  https://zh.wikipedia.org/wiki/%E4%B8%AD%E8%8F%AF%E6%B0%91%E5%9C%8B%E5%9F%BA%E6%9C%AC%E5%B7%A5%E8%B3%87
  
• 由2019年5月1日起，法定最低工資水平由每小時34.5元調升至每小時37.5元。就僱主備存僱員的總工作時數紀錄的金額上限，亦同時由每月14,100元修訂為每月15,300元。
  https://www.labour.gov.hk/tc/news/mwo.htm

記事: Interactive Broker 匯入流程

皮老闆GROUP 到有人講宜家轉數去 IB 好方便, 仲唔駛錢, 因為有 FPS (轉數易)。二當家好耐都無入過錢去 IB, 適逢股市回調至27000, 二當家試下入定子彈入貨先。

FPS 係近年二當家覺得香港政府少有既德政, 如果可以一直免費有呢個服務就正!


IB 既 CONCEPT, 都係要先"報數" (入錢OR出錢 OR 轉貨)

今次用電匯

 最重要係填寫入幾多錢

IB每次都有提示, 唔好直抄下面D 資料

DONE

HSBC 網上銀行介面

轉去HSBC 網上銀行介面, 先揀"轉賬"

揀對應既銀行
***上一張圖講到明係006, 你唔好走去揀250***

***銀行可能有每日轉賬上限, 自己ADJUST***

即時扣數

大約2小時候後係IB見到數啦

完

近況(三)

睇番舊文, 原來近況 (二) 係二月底既文章, 二當家係呢幾個月內做左好多重大既決定

1. 5月頭二當家正式去台灣做野, 以後就要睇晒個 DEPT, 有咩事都要靠自己, 無人頂。 至於大當家呢, 佢會不日到步, 要佢一個人搞掂晒搬屋D野其實我都有D 於心不忍, 但太保護佢只會令佢唔識照顧自己, 所以狠下心腸自己過台灣先。好彩所有野都叫順利, 當佢黎到台灣一齊生活果陣, 二當家才開始真正既新生活。
   
2. 外父既「大腸癌」已經係私院做左手術切除, 及後去左公立醫院睇埋個「肝」。公院醫生檢查左之後發現有擴散現象, 要盡快做手術切部份肝臟。 宜家兩個手術都做完左, 根據報告其實兩個手術都好成功, 但問過幾個醫生, 佢地都建議做埋「化療」。以我所知既係因為「肝」係同其他器官有血液交流, 所以極有機會有擴散性既癌細胞走左去其他器官。至於化療D藥有幾重我暫時都唔知。
3. 前人種樹，後人乘涼 (三) - 無諗過借錢原來咁方便, 所有野都係 WHATSAPP + EMAIL, 到最後有初步批准至上去簽份幾份文件, 唔駛30MINS 就搞掂, 仲方便過 CUT 寬頻。搞掂按揭, 諗住一齊順順利利之際, 但因為欠一張側窗紙, 成交要遲多半個幾月。
   
   老人家又心急成交唔到, 又擔心租果到被迫遷, 中間要搵短租又駛幾萬銀。律師行建議搵經紀幫下手加快流程, 點知祥益D 經紀原本一早已經收晒錢😡。收晒錢仲會幫你咩, 果個經紀仔搵左條廣東話唔咸唔淡既8婆扮幫手, 幫唔到手之餘佢搞到我地扯晒火, 呢D真正既「有錢既就係老細, 無錢既當你契弟」。
   
4. 讀書方面, 放底左 PMP一段時間, 要再開始溫番書, 好在考試期限在一年之內, 加上考試地點可以揀海外, 唔係就嘥左幾千銀。黎到台灣, 其實我一直都好想讀埋個 MASTER 佢 (香港太貴), 叫做完全自己一個心願, 遲D得閒CHECK 下台灣 MASTER 咩價位先。
   
5. 投資方面, 一淡死水😭。基本上只係做左一單買賣, 就係買左偉易達 @ $90. 再一次証明唔好係頭腦唔清晰既期間做投資活動, 錯到離晒鋪,一動不如一靜。
   
   宜家戶口整合左去IB, 公司係走之前出左個 B 仔, 未來仲有MPF 提取權益後既錢, 再加上順利既話按揭得來既錢, 所以就算貿易戰都唔駛減倉。問題係反而有新錢後點投資係最好, 呢段時間要做/抄多D功課先 🙆
   
6. 去台灣既 CHECK LIST 都搞得 7788, 係妖才個戶口要等埋87001派息先去取消。

1. WORK PERMIT 台灣同事搞緊 (7days) - Done
2. 申靖良民証, 結婚証書, ONLINE PERMIT (20 days) - In Progress
3. CUT 多餘既信用咭, 戶口 - Done
4. 試用 IB 電匯功能 - Done
5. 妖才射倉去IB  - Done
6. 妖才提取餘額 - Done
7. 取消妖才戶口 - In Progress
8. 保險箱入面既野要提取/ 變賣 /  保留 - Done
9. 停租水/電/寬頻 - Done
10. 變賣家當 - Done
11. 斷捨離, 約搬屋公司 - Done
12. 去台灣搵屋 (EASTER) - Done
13. 同朋友食FAREWELL - Done
14. 公司 OFF BOARDING - 清稅, 申請退還 MPF - Done
15. 老婆申請按揭 - Done

敗走台灣 - 台北搵樓記 (中)

前言: 二當家襯住復活節既假期同大當家去左台北搵樓住, 係短短三日既時間入面睇左 1X 間樓, 以上係我地睇過既地點

___________________________________________________________________

1. 南京復興站旁, 鄰近遼寧夜市

19.38坪2房, 689尺, NTD35000+2400 管理費

講地點, 呢間既地點真係非常之一流, 旺中帶靜, 5mins 內就去到捷運站 , 鄰近遼寧夜市, 食野非常方便。size 都唔細, 差不多700尺。當我地滿心歡喜之際….

現實邊有咁筍, 首先入到屋, 個廳真係細到呢, 唔係我奄尖, 大家可以望下張圖, 完全唔覺有700尺, 400尺都唔知有冇。間屋雖然係話兩房, 但係一間係上面, 一間係下面。間房唔知有冇一百尺, 下層睡房只係好o岩o岩好咁企直個人, 為左就個空間感, 張床較矮, 即係床下底係放唔到野。上層係一個吉左既空間, 感覺普通, 唔太實用, 開張麻雀枱後應該無乜位。因為我同大當家係搬家過黎, 所以本身已經有勁多野, 呢間屋剩係諗點樣放我地1 大2細既行李喼已經頭都大埋。所以我好快就剔除呢間。

個廳既活動空間就得呢2sqm

由廳走向上層

上層既房, 企得直人

廳既旁邊有個廚房仔同露台仔

___________________________________________________________________

2. 行天宮附近

26.25坪2房2浴, 935尺, NTD45000+5000 管理費

呢間屋本身未睇果陣已經唔會考慮, 主要係因為 OUT BUDGET 得太多, 抱住望下靚野既心態去睇樓, 去到又係失鬼望。

首先呢區係比較LOCAL既一區, 其實我唔介意, 「人」氣好夠, 附近仲有菜市場, 間屋對出已經係一條巷, 都幾多車, 不過間屋樓層較高, 所以唔算太嘈, 景觀都可以, 望到松山機場果邊。但係呢間「則」係我見過其中一間最奇怪既「則」。



首先間屋係得一邊窗, 長方型廳一眼睇晒, 但係3間空間分別係廳既旁邊, 上下層 (見圖示)。黑廁就一定, 第一間房雖然近窗但好細, 張床又係較矮左, 有個好細既衣櫃, 間房除左訓就真係無乜位。而中間房2上半層後其實係 LIVING ROOM 2 連浴間。最後間房又係落半層既黑房, 感覺好似士多房, 但係又唔知點解加左個浴室係到, 仲要有個浴缸, 真係摸不著頭腦。

廳既右手邊有三度門

廳仲有個OPEN KITCHEN

望松山機場

房1

房2 LIVING ROOM, 其實幾舒服, 但係功能性好似重疊左, 定係當做打機房 / 音響房?

房2 LIVING ROOM 內既廁所

房3 - 全黑房, 似士多房, 但係又整個浴缸

29.22坪2房1浴, 1040尺, NTD37000連 管理費

係同一區我地仲睇左另一間, 呢間位於2樓, 比較矮。間屋樓底好高(估有3米半~4米), 亦都無一層斬兩層。所有野都好簡潔, 兩邊窗, 仲要落地玻璃, 不過景觀就麻麻, 對住對面樓既鄰居(其實係台灣可能好常見), 亦見到樓下既路人。最主要令我地唔考慮既原因係因為附近係行天宮, 有好多白事既鋪頭係呢一帶, 大當家一聽到呢到, 即刻表示不考慮。

而且楝樓仲有個好FUNNY既地方, 就係一梯兩伙, 但係有兩條防火樓梯。所以話就話成千尺, 實際用到既都唔知有冇600尺 =_=。

壽衣鋪頭

3米多既樓底

對到正一正 

望到行人

一梯2伙, 但係有兩條求生梯!

___________________________________________________________________

3. 行天宮”站”附近

約17坪1房1浴, 約650尺, NTD3X000

呢間係行天宮站5分鐘距離左右既「住辦大樓」 , 地點其實超一流。所謂既住辦大樓, 即可用於住宅及辦公室兩用。二當家去睇樓當日為假日, 由於辦公室唔開, 所以前門都CLOSE左, 所有住戶要走後門。二當家當日去睇果層有4戶, 當中3戶都係辦公室, 另一戶就被業主一開三, 分租俾3個住戶, 每個住戶都有獨立洗身間, 電箱等。大家可以想像下一個無人番工既大廈其實係非常之咁冷清, 連看更都無, 感覺有D恐怖。

入到屋, 間隔OK正常, 不過一打開窗呢……….好L嘈! 因為樓下就係一條大馬路, 在此必須說明, 雖然台北一般黎講駕駛者態度OK, 但係電單車(機車)真係好多又好嘈。所以如果住係大馬路附近, 有窗等於無窗。

(住辨 - 示意圖)

___________________________________________________________________

4. 新生北路

15坪1房1浴, 556尺, NTD32000連 管理費

講位置, 新生北路係幾個站既中間, 唔太方便 (完全反映左係個價錢到), 而且感覺上中正區好似再落後少少 (純感覺)。呢楝大廈係舊式住宅, 一梯十幾伙。一入屋, 一眼望晒, 雖然係兩邊窗, 但其中一邊係廚房加廁所, 另一邊係睡房, 所以唔算光猛。個廳係正間屋既中間, 連荼几都唔可以放。洗完既衫要放係廁所涼乾, 好在有浴室寶。

空間唔夠係呢間屋一個好大問題, 如上文所講, 二當家有三個行李箱, 如果租呢到, 我完全唔知可以點擺, 雖然床頭床尾有2個全高櫃, 但成屋既儲物空間就剩係得咁多。所以平一平都無用。

一眼睇晒

OPEN KITCHEN

床頭床尾全高櫃

___________________________________________________________________

5. 古亭

除左市區, 我地都考慮過遠小小既, 例如古亭。
如果係古亭站附近既都可以,但係呢間要行成10MINS, 開價仲要38000,   基本上都唔會考慮。
因為業主太過熱情既關係, 所以我地無影相。業主將間屋約三米高既樓底間左兩房 (上下), 上面間房企都企唔直, 要爬入去訓, 見到就覺得慘。

如果有得揀, 我寧願住舊D揀公寓都唔會揀呢間啦。

未完待續