股票研究 - 0697 首程控股 - 股本與股東

 

睇住唐朝本書, 心入面果團火又出番黎, 決定真心去研究一隻股票, 首程係小弟係其中一隻持股, 小薯兄都有介紹過, 但二當家決定由零重新去認識呢隻股票, 暫時打算出一個系列, 一步步咁理解呢隻股票。

聲明: 二當家都係自學會計,非專業人士, 亦非投資建議

首程控股 2020年報 2021042300460_c.pdf (hkexnews.hk)

唐朝本書有講到, 新手睇年報, 先睇income statement, 但係老手通常都係先以 balance sheet 為主, 而係首程2020年既balance sheet入面, 其中有個位係非常 eye catching 既, 就係股權變動非常多。

上圖表示, 係2019年12月31日, 股本為 101億, 而到2020年12月31日, 股本為 121億 , 增加左成20%。第一個諗法就係首程係唔係缺水, 睇番首程既現金水平, 係2019年底係有30億現金😲, 總負債為11億, 就咁睇比例, 財務健康到一個點.........

股市/股票原本最重要既一個功能就係集資 (雖然世人都忘記左), 如果唔等錢洗又要集資, 二當家諗到既可能性有幾個, 一係 GAP 平水(息低環境), 一係真係有集資需求, 未來有投資計劃, 當然, 仲有好多可能性, 不過我未諗到。

講到 GAP水, 都要睇下對象係邊個, 所以二當家將上面既CB, 同發行新股做左小小整理。

所有 CB 既資料都可以係年報附註25, 26到搵到, 又或者可以係董事會報告書到有提到, 但因為好多時候都係用附屬公司去 OWN, 好難搞清楚所有關係, 所以最簡單既方法係用公司名查下, 例如當中的最大一筆CB係11億, 發行日期係2019年11月29日, 年報中寫到

發行和轉換港幣12億元可轉換債券（2019年11月）

於2019年11月29日，本公司與歐力士亞洲資本有限公司（「歐力士亞洲」）、Matrix PartnersChina V, L.P.（「Matrix PartnersV 」）及Matrix Partners ChinaV-A, L.P.（「Matrix PartnersV-A」）（統稱為「可轉換債券認購人」）訂立可轉換債券認購協議（「可轉換債券認購協議」）。

但當轉換為股份時, 股權係轉換俾一間叫 Mountain Tai Peak 既公司

於2020年2 月4 日，本公司向歐力士亞洲於相關可轉換債券認購協議項下之指定人士Mountain Tai Peak I InvestmentLimited（「Mountain Tai Peak 」）發出強制轉換通知，以兌換本金額為港幣1,115,000,000元之可轉換債券

呢間 Mountain Tai Peak 係咩公司黎? 二當家再係年報到 seach 就發現左, 原來呢間 Mountain Tai Peak 都係歐力士係一部份 

歐力士股份有限公司於其直接全資附屬公司歐力士亞洲資本有限公司及間接全資附屬公司Mountain Tai Peak I Investment Limited分別持有之全部300,748,346股股份及743,333,333股股份中擁有權益。

換句話說, 到頭來首程都係問原本既股東拎錢, 而且各股東都非常配合, 2019年出既 CB, 2020年2月就換晒做股票, 而且大家都可以留意兌換價, 兌換價為5合1前既 0.3 (即現價1.5), 作為小股東, 心裡有個底, 呢隻野大股東用1.5 既價錢入左11億, 並非一個小數目。二當家睇埋其它 CB 既交易方, 其實大部分都係原本既股東, 係披露易到下載最新大股東名冊, 所有野都一目了然。

睇完以上, 心中既疑問就解決得7788,。 作為小股東, 如果未來再發行新股, 又或者繼續發行 CB, 都要繼續留意, 但如果用以上資料去睇, 首程係向原本既股東要緊加大公司資本, 而3個大股東 (首程, ORIX, 新創建) 都有科水落去, 令到股本於一年內增加了20億。而發行新股本或CB既行使價,  大約係1.5~2.0蚊左右, 如果想買得平過大股東, 可以係 1.5下至入貨😝 。

 

至於未來仲有冇集資需要, 二當家覺得仍然是有這個需要, 主要係因為同首程個 business model 有關, 遲D再講。